Жанартау
Сейсенбі, 19 ақпан 2013 7:30
Жастар – үлкен күш. Жастар дегеніміз – жалын от. Жас жүрген жер – мереке. Оңтүстік жастарының көптігімен ерекшеленеді. Бүгінде облыста 14 пен 29 жас аралығындағы жастар 765 мыңнан асады. Бұл облыс халқының үштен бірін құрайды деген сөз. Оның ішінде 900-ден астам елді мекендердегі ауыл жастары 453 мың болса, қала жастары – 312 мыңға жетіп отыр.
Сейсенбі, 19 ақпан 2013 7:30
Жастар – үлкен күш. Жастар дегеніміз – жалын от. Жас жүрген жер – мереке. Оңтүстік жастарының көптігімен ерекшеленеді. Бүгінде облыста 14 пен 29 жас аралығындағы жастар 765 мыңнан асады. Бұл облыс халқының үштен бірін құрайды деген сөз. Оның ішінде 900-ден астам елді мекендердегі ауыл жастары 453 мың болса, қала жастары – 312 мыңға жетіп отыр.
Оңтүстік Қазақстан облысында жастарға көптеген жағдайлар жасалуда. Оның ішінде, облыс әкімі Асқар Мырзахметовтің тікелей қолдауымен жастардың білім алу, мамандық таңдау, жұмысқа орналасу бағытында көптеген оң тірліктер атқарылды. Елбасымыз Н.Назарбаевтың салиқалы саясаты арқасында қазір жастарымыз қолдаушысы, панасы, демеушісі бар екенін сезінеді. Жастарға жақсы жол көрсетіп, бағыт-бағдар сілтеп, еліміздің түкпір-түкпірін шарлап кеткен «Дипломмен – ауылға!», «Қазақша сөйлесейік!», «Жастар – Отанға!», «Ауылдың гүлденуі – Қазақстанның гүлденуі», «Еркін пікір» және басқа да жобалар, міне, сол жас толқынға көрсетіліп жатқан қамқорлықтың нақты дәлелі.
«Қазақстан-2050» Стратегиясында Елбасымыз жастар туралы «Ал кейінгі толқын жастарға айтарым: Сендер – болашаққа деген үкілі үмітіміздің тірегісіңдер. Біздің бүгінгі атқарып жатқан қыруар шаруаларымыз тек сендер үшін жасалуда. Сендер тәуелсіз Қазақ елінің перзенттерісіңдер. Тәуелсіз елде туып, тәуелсіз елде тәрбие алдыңдар. Сендердің азат ойларың мен кемел білімдерің – елімізді қазір бізге көз жетпес алыста, қол жетпес қиянда көрінетін тың мақсаттарға апаратын құдіретті күш» деген болатын.
Бұл жолдар бойында жалыны бар жастардың патриоттық сезімін оятып, күш-жігерін тасытып, асқақ арман, үлкен мақсаттарға жетелейтіні анық. «Тегінде адам баласы адам баласынан ақыл, ғылым, ар, мінез деген нәрселермен озады. Одан басқа нәрсемен оздым ғой демектің бәрі ақымақшылық», деген екен ұлы Абай. Шынында, ақылдың көркі – білім. Қазіргі заман – білімдінің заманы. Жастарға сапалы білім беру, еңбекке баулу мәселесінде Оңтүстік Қазақстан облысында орасан тірліктер бар.
Бүгінде Оңтүстікте мемлекеттік колледждердің саны – 44, жеке меншік колледждер саны – 50. Барлығы 94 колледжде 75 645 оқушы білім алуда. Қазақстан Республикасының «Білім туралы» Заңына енгізілген өзгерістерге байланысты облыстағы 27 кәсіптік лицей колледж болып қайта рәсімделді. 2012-2013 оқу жылына 97 мамандық бойынша 12 714 орынға сұранысты облыс әкімдігінің өңірлік кеңесінің қарауына ұсынып, нәтижесінде, кәсіптік лицейлерге 4861 орын, колледждерге 2435 орынға мемлекеттік тапсырыс қалыптастырылды.
Өндіріс орындарының сұранысы бойынша Шымкент, Түркістан, Созақ, Сайрам өңірлеріне қажетті жаңадан 9 мамандық ашылды.
«Жол картасы» және «Жұмыспен қамту-2020» бағдарламасы бойынша 2012 жылы облыстағы 32 кәсіптік білім мекемесінде 10 825 оқушы білім алды, оның 3400-і бітіріп, 2890-ы жұмысқа (83%) орналасты. 2012 жылы техникалық және кәсіптік білім мекемелерін мемлекеттік тапсырыспен бітірген 7385 бітірушінің 6783-і, яғни 91,8 пайызы жұмыспен қамтылып, 2011 жылмен салыстырғанда бітірушілердің жұмысқа орналасуы 3,7 пайызға артты.
Жергілікті биліктің қамқорлығының тындырымды істерінің нәтижесінде облыста жылдан-жылға білім сапасы жақсарып, көптеген оң жетістіктерге қол жеткізілуде. Облыстағы кәсіптік лицей мен колледждерді бітірушілердің кәсіптік біліктілігін және білім сапасын бағалау бойынша Білім және ғылым министрлігі тарапынан жүргізілген тәуелсіз бағалаудың көрсеткіші 2010 жылы 88,1 пайыз болса, 2012 жылы 94,1 пайызға жетіп, облысымыз республикада 1-орынды иеленді.
Қанатбек ДОСАЛИЕВ,
Жаңа технологиялар колледжінің директоры,
Оңтүстік Қазақстан облысы колледждер директорлары кеңесінің төрағасы.
Оңтүстік Қазақстан облысы.
