Қазақтан шыққан Стив Джобс

Бейсенбі, 24 қаңтар 2013 7:19

Санкт-Петербургте тұратын бауырымыз Серікбай Бисекеев Ресейдің «Жыл кәсіпкері» атанды

«Бүкіләлемдік тәжірибенің көрсетуінше, бүкіл инновациялық өндірістік циклды жеке бір елде жүзеге асыруға тырысу – велосипед ойлап шығару деген сөз. Бұл – өте қымбатқа түсетін және әрдайым нәтижелі, жемісті бола бермейтін іс.

Бейсенбі, 24 қаңтар 2013 7:19

Санкт-Петербургте тұратын бауырымыз Серікбай Бисекеев Ресейдің «Жыл кәсіпкері» атанды

«Бүкіләлемдік тәжірибенің көрсетуінше, бүкіл инновациялық өндірістік циклды жеке бір елде жүзеге асыруға тырысу – велосипед ойлап шығару деген сөз. Бұл – өте қымбатқа түсетін және әрдайым нәтижелі, жемісті бола бермейтін іс. Табысқа жету үшін ғалымдардың талай буынының тәжірибесіне, тарихи қалыптасқан ғылыми мектептердің арнаулы ақпарат және білімдерінің көп терребайт көлеміне негізделген дербес ғылыми база қажет болады. Жаңа технологиялық толқын жалына жармасып, теңдессіз инновациялар жасау барлық елдің қолынан келе бермейді. Біз осыны жете түсінуге тиіспіз. Сондықтан біз өте шынайы, барынша прагматикалық стратегия құрғанымыз жөн. Біз шығыны көп емес зерттеулер мен әзірлемелерге ден қоюға тиіспіз», деген еді Мемлекет басшысы Нұрсұлтан Назарбаев «Қазақстан-2050» Стратегиясы – қалыптасқан мемлекеттің жаңа саяси бағыты» атты елімізді дамытудың түбегейлі мақсаттарын көздейтін айрықша Жолдауында.

Елбасының осы сөзінің заманауи шындығын дәлелдей бастаған қазақ азаматтары қазірдің өзінде жоқ емес екен. Сол жағдай біздің осы мақаламызға жоғарыдағыдай тақырып қоюға түрткі болды. 

Тақырыпты осылай қойғаннан соң ең алдымен қазақтың қалың оқырманы үшін Стив Джобс кім деген сұраққа жауап бере кетейік.

Стив Джобс адамзат қауымының даму бағытына үлкен әсер еткен қазіргі замандық технологиялық жетістіктерді өмірге енгізген ұлы кәсіпкер. Былайша айтқанда, дербес компьютерлер жасау саласында революция жасаған адам. Ол қазіргі күні өнімдерін күллі адамзат қауымы үлкен сұраныспен пайдаланып отырған Apple корпорациясын құрды. Сөйтіп, планшеттік компьютерлер жасау саласында Американы ең алдыңғы қатарға шығарды. Қазіргі күні Стив Джобс­тың есімі Америка автомобиль өнер­­кәсібінің атасы Генри Форд пен ком­пьютерлік бағдарламалар жасаудың дү­ниежүзілік пионері Билл Гейтстің қа­та­­рында аталады. Өкінішке қарай, Стив Джобс өткен жылы қайтыс болды. Оның қазасын әлемде көптеген адамдар аза тұтты.

Ал енді осы әлемдік деңгейдегі кәсіп­кер Стив Джобсқа ұқсататындай біздің қазақта азамат бар ма екен? Иә, ондай азамат бар екен. Ондай азамат біздің халқымыздың арасынан да топ жарып шығып келе жатқандығына куә болып отырмыз. Мұны бізге әлемдегі аса ірі «Эрнст энд Янг» консалтингтік компаниясының ұйымдастыруымен Ресейде өткен ең үздік кәсіпкерлерді айқындау жөніндегі конкурстың қоры­тындысы әйгілеп берді. Осы конкурстың «В2В» номинациясы бойынша бас жүлдені Санкт-Петербург қаласындағы кәсіпкер Серікбай Бисекеев жеңіп алды. Ол жүлде  бизнес саласындағы Оскар деп аталады.

Сонымен, Серікбай Бисекеев ие бол­ған бұл сыйлықтың мәні мен маңызы зор. Бірақ ол қазақтан шыққан Стив Джобс дейтіндей бұл өмірде не тындырды?

Серікбай Бисекеев өнеркәсіп саласындағы мобильдік байланыс құралын шығаратын және оны әлемдік деңгейде саудалайтын дүние жүзіндегі бүгінгі таңдағы ең үздік холдингтік корпорацияны құрды және оны тақыр жерден дүниеге әкелді. Міне, осы үлкен жетістікті қазақтың қарапайым жігіті жасады.

Сонымен, адамзат өміріндегі жаңа сала – ақпараттық технологиялар саласында әлемдік деңгейдегі бәсекеде топ жаратын жаңа бизнестік құрылымды посткеңестік елдерде де құруға болады екен. Серікбайдың «Арман» атты корпорациясының қызметі осының жарқын дәлелі. Бұл жағдайды қазіргі күні Ресей бұқаралық ақпарат құралдары жарыса жазып жатыр. Серікбайдың ісін бүкіл Ресей кәсіпкерлерінің алдында үлгі етіп көрсету үстінде.

Серікбай Бисекеев бұл корпорацияны қалай құрды? Және аз жылдың ішінде осы құрылымды қалайша әлемдік көшбасшылардың біріне айналдыра білді? Бұл ұзақ әңгіме.

Серікбай Бисекеев Қостанай облы­сының Қамысты ауылынан. Осы ауылда мектеп бітірген. Сабақты өте жақсы оқыды және спортпен беріле шұғылданды.

Осы мақаланы жазу барысында біздің Қостанай облысындағы меншікті тілшіміз Нәзира Жәрімбетова Серікбайдың анасымен және ұстаздарымен тілдесіп, бізге мына хабарларды жеткізіп үлгірді.

Қазақтың «үйдің жақсысы – аға­шы­нан, жігіттің жақсысы – нағашыдан» дегеніндей, Бисекеевтер әулеті де осал емес екен. Серікбайдың әкесі Жол­­­­дыбайдың туыстары арасында оқыған, елге қызмет істеген, елеулі азаматтар жетерлік. Де­ген­мен, анасы Жамалдың ұлы атасы Дербісалды Беркімбаевтың есімі бүкіл қазаққа мәшһүр. ХІХ ғасырдың ортасында патшаның аса маңызды тапсырмалар жөніндегі шенеунігі болған ол, Мәскеуге Торғай қазақтарының делегациясын бес рет басқарып барады. Кемеңгер ағартушы Ыбырай Алтынсарин мектеп ашқанда көмек қолын созған адамның бірі де Дербісалды Беркімбаев болатын. Осындай текті атадан тараған Қонысбай Жаманбалин Ұлы Отан соғысы кезінде Иранда болды, шекараны күзетті. Оның елге өлеңмен жазған сағынышқа толы хаттарын жары Ұлтай бір жолын қалдырмай жаттап алып, кейін де айтып отыратын. Қонысбай соғыс аяқталған соң елге аман-есен оралып, шаруашылық ұйымдастырды, есепші болып істеді. Ұлтай әжеміз екеуі бес бала тәрбиелеп өсірді. Серікбай – сол бес баланың бірі Жамалдың тұңғышы. Жолдыбай мен Жамал Қамыстыдан 1978 жылы Қостанай қаласына көшіп келді. Бірі инженер, бірі бухгалтер болып қызмет етті. Бір ұл, екі қыз тәрбиеледі.

Серікбай Қостанай қаласындағы №3 орыс орта мектебіне 4-сыныпты аяқ­тағанда келген болатын. Орыс тілі пәнінің мұғалімі Людмила Петровна Сторожева сынып жетекшілігіне тағайындалды. Ол сынып сағатында балалармен түрлі шаралар өткізетін. Сонда Людмила Петровнаның көбіне арқа сүйенері Серік­бай болатын.

– Мен 4-8 сынып аралығында сынып жетекшісі болдым. Әдетте 7-8 сыныптар баланың жасөспірім жасқа келген, ауыр кезеңі болып саналады. Бірақ мен осы сыныптан бір ескерту, бір жаман қылық көрмедім. Серікбайды және оның достарын әлі күнге дейін тек жақсы жағынан ғана еске алып отырамын. Әсіресе, Серікбайдың адамгершілігі биік азамат болып өскені мен үшін үлкен мақтаныш! Олар мектепті 1988 жылы бітіріп кетті. Содан бері Серікбайдың мені мерекелермен, туған күніммен құттықтамаған кезі болған емес, – дейді Людмила Петровна.

«Ұстазы жақсының – ұстамы жақсы» деген ғой. Людмила Петровна қария аңқыл­даған, әңгімешіл, қарапайым кісі екен. Ол бала тәрбиені алдымен отбасынан алатынын айта келіп, арада жиырма бес жылдай өтсе де Серікбайдың ата-анасының да түр-тұлғасын ұмытпағанын айтты.

– Серікбай өте еңбекқор болатын. Сынып сағаттары болғанда тапсырманы көбіне соған беретін едім. Өйткені, жанымды тындырып, өзімнің айтқанымнан артық етіп жазып, сызып келетін. Кәдім­гідей көмекшім еді. Сонда ойын баласы сабаққа, спортқа, менің тапсырмаларыма қалай үлгереді деп іштей сүйсініп қоюшы едім. Оның ата-анасы мектепке ылғи келіп тұратын, баласының сабағын, спортын қадағалайтын. Ал баласы бітіргенше мектептің бетін көрмейтін ата-аналар да болады, – деп әңгімесін жалғайды ұстазы.

Спорт демекші, Серікбай Бисе­ке­­ев

№3 мек­тептегі спортқа маманданды­рыл­ған  сы­ныпта оқыды. Баскетболдан жат­тық­тырушысы Сергей Худанко болатын. Әрбір ата-ана баланың жолында жақсы адамдарды жолықтыр деп тілесін деңіз. Сергей Николаевичтің тәрбиелеген ба­лаларының жерде қалғаны жоқ шы­ғар. Ол сыныптағы баламен бала болып өмір сүретін. Ол балаға ұрыс­пай­­тын, дүр­се қойып, бұйырмайтын. Жат­тық­­­тырушылық, тәрбиелік жұмысы­ның барлығын адамгершілік қатынасқа құ­­ратын.

– Мен 1988 жылы бітірген баскетбол сыныбының балаларымен осы күнге дейін қарым-қатынасымды үзіп көрген емеспін. Әсіресе, Серікбаймен туған бауырдаймын. Екінші қызы ту­ғанда оның шақыруымен сонау Санкт-Петербургке арнайы барып, немере қызымның шілдеханасына қатысып қайттым. Жолымды, қонақ үйімді, бәрін өзі көтерді. Алдағы жазда мен алпысқа толамын, Серікбай мен оның достарының барлығы да тойыма келеді, – дейді дос-ұстаз масаттанғанын жасыра алмай.

Ұстаздарының айтуынша, Серікбай өжет бала болатын. Айтқанынан өмі­рі қайтпайтын. Ал істеймін деген ісін тындырмай тыным таппайтын. Жат­­тық­тырушысы да шәкірттерін үнемі қа­да­ғалап отыратын, қатаң тәртіпте ұстады.

– Ол кезде де Ресейдің жоғары оқу орындарына түсу жеңіл болмайтын. Бір сыныптан Серікбай, Ахмеров Алек­сандр және Петряков Игорь үшеуі бір­дей Ленинградтың политехникалық инс­титу­тына түсті. Серікбайдың сынып­тас достарының да көпшілігі бизнесте. Олардың арасында қазір ірі зауыт, фабрикаларды басқаратындар бар. Қос­танайға келгенде олардан «мық­тыларың қайсысың?» деп әзілдеп сұрап қоямын. Барлығы да «Мықтымыз да, мақтанышымыз да Серікбай ғой» деп жауап береді. Ол – менің де мақтанышым! – деген Сергей Николаевич.

Міне, Серікбайдың өскен ортасы туралы мәліметтерді бізге әріптесіміз Нәзира осылайша жеделдетіп жазып берді.

Енді әңгімемізді одан әрі жалғай­тын болсақ, Серікбайдың өзі сол кезде спортпен бірге шұғылданған сынып­тастарымның барлығы да сабаққа ал­ғыр болғандығын айтып, осы үшін өз ұстаздарына деген алғыс сезімін жет­кізді. Артынан бірге оқыған сол жі­гіт­тердің барлығы Мәскеу мен Санкт-Пе­тер­бургтің, Екатеринбургтің жоғары оқу орындарына оқуға түсті. Бүгінгі күні олардың барлығы өмірдегі табысты адамдарға айналды. Белгілі компанияларда жұмыс істейді. Ал қайсыбірі өзінің жеке бизнесін құрды.

Серікбай да мектеп бітіргеннен ке­йін осылардың қатарында Санкт-Пе­тер­бургтің политехникалық институтына қабылданады. Оның студенттік шағы Кеңес одағы тараған аса ауыр кезеңге тап келеді. Яғни, өзін өзі асырауға, оқи жүріп кәсіппен де айналысуына тура келеді. Студенттік құрылыс отрядтарына барып жұмыс істеді. Өзінің құрбы-құрдастарымен бірге көршілес Балтық жағалауы елдеріне барып, сөмкемен тауарлар сатып әкеліп, соларды өткізу ісімен шұғылданады. Серікбай ТМД елдерінде енді ғана қолға алынған кәсіпкерлік ісінің әліппесін осылайша игере бастайды.

– Мұнан кейін біз биржаларда жұмыс істедік. Өйткені, сол кезде валюта операцияларына қатысу жеке адамдар үшін табысты саланың біріне айналған болатын. Мұнан кейін мобильді байланыс құралдары шыға бастады. Кезінде әлем бойынша осы істің көш басында Финляндияның тұрғандығы белгілі. Ал Финляндия Питерден соншама қашық емес. Былайша айтқанда, бір сағаттың ішінде жетіп баруға да болады. Сөйтіп, ол жерден ұялы телефондар сатып алып, оны Питерге әкеліп саудалау ісіне кірістік. Бизнестің келесі бір сатысына міне, осылайша шықтық, – дейді Серікбай.

Ол журналистерге берген сұхбатында посткеңестік елдеріндегі бірінші GSM операторы көптеген адамдардың ойлаға­нын­дай Мәскеуде емес, Санкт-Петербург қаласында пайда болғандығын айтыпты. (Қазір бұл оператор «Мегафон» деп аталады).

– Қалада мен міне, осы бизнестің көш басына шықтым. Сөйтіп, алғашқы ұялы телефондарды ТМД бойынша бас­қа операторларға жеткізіп беру ісімен шұ­ғылдандым. Солардың арасында қазір­гі күні аты жер жарып тұрған К Сеll-де бар. Бұл іспен заман талабына сай шұғылдану үшін білім қажет болды. Сөйтіп, Стокгольм қаласындағы бизнес мектебіне оқуға түсіп, оны бітіріп шықтым. Менің диплом жұмысымның өзі «Қоғамдық орындарда ұялы телефон желісін құру» деп аталды. 1998 жылы мұндай байланыс құралдары негізінен тұрмысы жақсы адамдардың, көбінесе бизнесмендердің қолында ғана болды. Ал мұндай адамдардың көпшілігі дерлік жеке автокөліктермен жүретін. Сонымен қатар, олардың арасында метро көлігін пайдаланушылар да аз емес еді. Мен өз бизнесімді құрғанда осындай адамдар тобын есепке алдым, – дейді Серікбай.

Сонымен, Санкт-Петербург қаласын­дағы қазақтың кәсіпкер жігіті көпшілік шоғырланатын жерлерден бар-жоғы 5-6 шаршы метр тұратын орын-жайларды жалға алып, оларға ұялы телефондар жеткізіп, саудалау ісін қолға алады. Әрине, ол кезде ұялы телефондарды партиясымен топтап сатып әкелетіндей қа­ражат қайда? Дегенмен, бизнес дегеніміз тек ақшалылардың ғана емес, ең алдымен істің көзін таба алатындардың ғана қолынан келетін шаруа ғой. Серікбай ұялы телефон шығарушылардың өздері­мен тікелей байланысқа түсіп, тауарларды олардан қарызға алып отырады. Және өзінің қарыздарын да тауарларды саудалап болысымен, жүйелі түрде жеделдетіп қайтару ісін жолға қояды. Ұялы телефон саудасындағы дилерлік қызметті осылайша жандандырады.

Мұнан кейін бұл рынокқа «Евросеть» секілді аса ірі компаниялар келе бастайды. Қазақтың жас кәсіпкер жігітіне еуропалық мұндай магнаттармен бәсекелестікке түсетіндей қауқар қайда? Ниет, ынта, жігер қаншама күшті болғанымен милли­ард­таған доллармен ойнайтын ірі компаниялар Серікбай Бисекеевтің жолын кесе бастады. Сөйтіп, ол өзінің қаладағы құрған сауда желілерін сатты да, енді ақпараттық технологиялар саудасының әлі көп ешкім аяқ баса қоймаған жаңа бағыттарын қарастыру ісіне кірісті.

– Маған сол кезде өз бизнесімді одан әрі дамыту үшін алпауыт компаниялардың аяғы әлі бара қоймаған, яғни іс тетігі үлкен ақша емес, адамның өз ерік-жігері, ақылы мен қайратына, ілкімділігіне қатысты шешілетін салаға бару қажет болды. Яғни неғұрлым жаңа салаға барып, оны көтеруді жөн көрдім. ТМД кеңістігінде ірі кәсіпкерліктің аяғы баса қоймаған мұндай салалардың бірі – өнеркәсіптік байланыс болатын. Сол тұста ТМД-дағы ірі кәсіпорындар өз технология­ларын жаңарту үшін көбінесе өндірістік құрал-жабдықтар, станоктар мен техникалар сатып алу ісімен айналысып жатты. Ал мұның ақыры түптің-түбінде зауыттарда жаңа инфрақұрылымдар құруға әкелетіндігін алғашқылардың бірі болып түсіндім. Бірақ неге екенін білмеймін, дәл осы мәселеге сол кезде көп ешкім мән бере қоймады. Мен міне, жоғарыдағыдай өнеркәсіптік кәсіпорындарға осы істі жандандыратын құрал-жабдықтарды, атап айтқанда, ақпараттық байланыс құрал-жабдықтарын жеткізу ісін ойластыра бас­тадым, – дейді Серікбай.

Сөйтіп, Серікбай Бисекеев ТМД ел­де­ріндегі заман талабына сай жаңғыр­тылу үстіндегі кәсіпорындарды өндірістік мақсаттағы байланыс құралдарымен қам­­­­­­­­­­туға бағытталған жаңа істі бастады. Осы істі ұйымдастыруға оған Стокгольмдегі биз­нес мектебінде бірге оқыған азаматтар көмекке келді. Бисекеевтің құрған ком­паниясы бастапқыда неміс құрал-жабдықтарының дистрибьютері ретінде қызмет етті. Бірте-бірте ол құралдарды жасап шығудың көп қиындығы жоқ екендігін де түсіне бастады. Өйткені, Серікбайдың компаниясына тапсырыс беретін кәсіпорындардың, басқа да ірі көлемдегі тұтынушылардың барлығының бірдей неміс жерінен шығатын байланыс құрал-жабдықтарына қоятын талаптары бірдей болмай шықты. Олардың қызметтерінің өзіндік ерекшеліктері бар. Сондықтан «бұл құралдың мына жері мынадай болса» деген талаптар айтылады. Сондықтан ол құралдарға аз да болса өзгерістер енгізуге, тіпті кейбір жағдайда оларды жаңа бағдарламалармен қамтамасыз етуге тура келетін. Сөйтіп, бірте-бірте Серікбай құрған «Арман» компаниясының жаңа ізденістерінің нәтижесінде жаңа өнімдер де пайда бола бастады.

– Біз ақпараттандыру саласындағы жаңа технологиялар, жаңа үдерістер, жаңа чиптер әрбір жарты жыл сайын өзгеріске түсуге тиіс екендігіне көз жет­­кізе бастадық. Ал бұл сәтте біз­дің­ негізгі бәсекелестеріміздің бәрі бұл жа­ңалықтардың барлығын өз қыз­­­мет­­­­­­­­­­теріне тым баяу енгізіп жатты. Бір есептен алғанда мұны түсінуге де болады. Өйт­кені, біздің рыногымыздың өзі сол тұс­та консервативті болатын. Ал батыс­та­ғы оның негізі ойыншылары уақыттан біршама ілгері кетіп отырды. Олар әр жыл сайын жаңа өнімдер шығара бас­тады. Біз міне, осы үдерістердің алдына түсуді ойластырдық. Өнімдеріміздің қызметтеріне жаңалықтарды жиі қосып отырдық. Яғни өнімдерді жетілдіретін жаңа мүмкіндіктерді ұдайы қарастыру үстінде болдық. Сөйтіп, көп өтпей, осы рыноктың көшбасшыларының бі­ріне айналдық, – деген жерлесіміздің алғырлы­ғына шынымен сүйсіндік.

Заман талабына сәйкес Серікбай Бисекеев басқаратын «Арман» компаниясы холдингтік корпорация ретінде құрылды. Оның штаб-пәтері Санкт-Петербург қаласында орналасса, өкілдік­тері Қазақстанда, Германияда, Үндістан мен Сингапурда ашылды. Олар мұнай-газ секторының, металлургияның, энергети­каның ірі кәсіпорындарына қызмет ете бастады. Сондай-ақ, бірқатар елдердің метро, әуежай, теңіз порттары бұл күн­дері «Арман» корпорациясының өнім­дерін тұтынады. Корпорацияның алдында ен­ді­гі кезекте Бразилия мен Араб елде­рі, Үндістан мен Оңтүстік-Шығыс Азия­дан өз өкілдіктерін ашу міндеті тұр. Серікбай осы өңірлерде өз корпорациясын көшбасшыға, яғни №1 компанияға айналдыру мақсатын алға қойып отыр.

Міне, сөйтіп күллі әлемнің жартысын жаулай бастаған холдингте қанша адам жұмыс істейді екен деген ой басыңызға келер. Бар болғаны 180 адам ғана. Сонда олар өз өнімдерін қалай шығарады деп ойларсыз. Серікбайдың бұған беретін жауабы да дайын. Өндіріс түрлері әбден дамыған қазіргі заманда жаңадан велосипед ойлап табудың қажеті жоқ деп есептейді ол. Бұл өмірде бар және әбден қалыптасқан дүниелердің мүм­кіндіктерін дұрыс пайдалана білу қажет. Әйтпесе, жаңадан пайда болған бір өнеркәсіптік ұтқыр байланыс құралын одан әрі жетілдіру үшін жаңа өндіріс ашып жатудың қазіргідей мың құбылған заманда әбден артық шаруа екенін түсінуге болады. Тіпті мұндай жағдайда ақшаны былай қойғанда, алтынға бағаланатын уа­қыт­тың өзі зая кетеді. Сондықтан Серікбайдың корпорациясы өз өнімдерінің кейбіріне өзгеріс енгізу қажет болса, оны жасап шығаруға осы істі жүзеге асыруға әбден шеберленген батыстық өндірісшілердің бірін жалдайды. Яғни оларға тапсырысшы есебінде әрекет етеді. Жоба авторы ретіндегі идеяларын ешкімге бермей өздері жүзеге асырып шығады. Осылайша көп артық қаржы да, артық уақытты да шығындамастан жаңа өнімге қол жеткізеді. Оның үстіне енді біраз уақыт өткеннен кейін осы өнімнің өзіне қайтадан өзгерістер енгізуге тура келеді. Сол кезде жаңағы тәсіл қайтадан қолданылады.

Оның үстіне Серікбай құрған хол­динг­тік корпорацияның атқаратын негіз­гі қызмет – софт. Софт дегеніміз – ең қысқаша тілмен айтатын болсақ, ақ­­па­раттық технология құралын әртүрлі салалар немесе жекелеген қызмет түрлері бойынша бағдарламалық қамту. Яғни, «Арман» корпорациясы тұтынушыға қажетті жаңа өнімді жасау ісіне қаты­сады және оны қажетті мақсатқа сәй­кес тиісті бағдарламамен қамтиды. Серікбай корпорациясының осындай өнімдерін бүгінгі күні біздің елімізде «ҚазМұнайГаз», «ҚазАтомпром» АҚ-тар және Астана әуежайы, бірқатар электр стансалары пайдаланатындығын айта кетсек артық болмас.

Серікбай өз корпорациясының ұдайы түрде өсіп, дамып отыруын көздейді. Ол үшін ең алдымен корпорацияда қызмет ететін адамдар өз білімдерін тыңғылықты түрде жетілдіріп отыруы, жаңа идеялар бойынша жұмыс істей алуы, корпорация қызметіне ой-азық бола білулері қажет. Міне, сондықтан да корпорация қызметкерлерінің білімдерін жетілдіріп отыру, оларды әлемдегі жаңалықтармен үздіксіз таныстырып отыру үшін оқыту тренингтері жүйелі жолға қойылған. Қысқасын айтқанда, корпорацияның басты қазынасы білім болып табылады. Біздің Елбасымыздың Қазақстан халқының бәсекелестік қабілетін арттыру бағытында алға қойып отырған көкейкесті мақсаттарының бірі де нақ осы мәселе емес пе. Міне, осыған Санкт-Петербург жеріндегі қазақ жігіті жақсы қол жеткізіп отыр. Соның арқасында ол қазіргі уақытта бүкіл әлем бойынша бәсекелестік қуаты мол ең үздіктер қата­рындағы аса ілкімді де икемді компания­ны құра білді. Серікбайдың бұл ізденісі текке кеткен жоқ. Әңгімеміздің басында айтып кеткеніміздей, 2012 жылдың қорытындысы бойынша оған «Ресейдің үздік кәсіпкері, яғни «Жыл кәсіпкері» деген атақ берілді. Ал бұл атақ оған елдер бойынша осындай конкурс өткізудің шебері атанған әлемге танымал «Эрнест энд Янг» компаниясы мамандарының бағалауы бойынша берілгендігін есепке алатын болсақ, Серікбай Бисекеевтің кәсіпкерлік саласындағы тың табыстары халықаралық деңгейде мойындалып отырғандығына көз жеткіземіз.

Әңгіме түсінікті болу үшін «Эрнест энд Янг» компаниясы мұндай конкурс­тарды өткізуді 1986 жылдан бастап қолға алғандығын айта кетейік. Әуелгі кезекте компанияның ұйытқы болуымен бұл конкурс АҚШ елінде жүргізілген болатын. Мұнан кейін осындай жарысқа Канада, Ұлыбритания, Ирландия, Норвегия, Швеция, Дания, Франция, Германия, Италия, Испания, Бразилия, Жапония, Үндістан, Австралия, Сингапур, Малай­зия, Индонезия, Украина, Қазақстан елдері қосылды. Қазіргі күні «Эрнест энд Янг» компаниясы ұйымдастыратын конкурстардың географиялық аумағы 50-ден астам елді қамтып отыр. Соның ішінде Ресей осы үдеріске 2003 жылдан бастап қосылған болатын. «Эрнест энд Янг» компаниясының негізгі штаб-пәтері мен оның әлемнің көптеген елдерінде орналасқан өкілдіктерінде қазіргі күні 4000-нан астам маман қызмет етеді. Яғни бұл компанияның кәсіпкерлік қыз­метке қатысты берген бағалаулары бү­кіл әлем бойынша ең білікті деп есеп­теледі. Оның бизнес саласында өт­кіз­ген конкурстарының маңызы өнер сала­сындағы «Оскар» сыйлығымен теңелетіндігі де осы себептен.

Осындай биік марапатқа ие болып отырған Серікбай бауырымыз біз онымен телефон арқылы тілдескенімізде Қа­зақстанда жүріп жатқан қазіргі үдерістерді үнемі назарында ұстап, соған үлкен қуанышын да білдірді.

– Қазақстанда қазіргі күні Ресей­ге қарағанда, көптеген өміршең мәселе­лердің қолға алынып, жүргізіліп келе жатқандығына ерекше қуанамын. Мәсе­лен, Мемлекет басшысы Нұрсұлтан На­зарбаев елде жұмыс істейтін компа­ния­лардың алдына Қазақстанда шыға­рылатын өнімдер мен қызметтерді тұтыну көрсеткіштерін мүмкіндігінше арттыру мәселесін қойды. Бұл дегеніңіз елде жаңа жұмыс орындарын ашумен қатар, отандық орта және шағын бизнесті талабы қатаң тұтынушының көңілінен шығатын деңгейде жетілдіру деген ұғымды білдіреді. Былайша айтқан­да, әрі жұмыс болады, әрі компаниялар да заман талабына сай дами түседі. Ресей болса бұл іске әлі кіріскен де жоқ. Жал­пы, кәсіпкерлікті қолдау мәселесінде Қа­зақстан қазір алға шығып отыр. Ал мұ­ның нәтижесі жылдар өткен сайын барынша жарқырап көріне бермек жә­не халықтың әлеуметтік жағдайының жақ­саруына, адам ресурсының дамуына қолайлы әсерін тигізбек, – дейді Серікбай Бисекеев.

Ресей секілді алып елде жүріп, мил­лиондаған кәсіпкерлердің ортасынан жарып шығып көзге түсіп отырған жер­лесіміз өзінің осы салада жинаған білімі мен тәжірибесін туған Отаны Қазақстан жастарымен бөлісуге де дайын. Еліміздегі ірі оқу орындарында жас­тар алдында тегін лекциялар оқуға әзір екендігін білдірді. «Қазіргі жас ұрпақ – алғыр әрі батыл, тек оларға дұрыс білім беріп, заман талабына бағыттау қажет. Атам қазақ айтатын «тәуекел түбі – жел қайық, өтесің де кетесің» деген сөз бар емес пе. Егер өзіңнің білімің мен білігіңе, ойлаған ісіңнің дұрыстығына сенетін болсаң тәуекелдерден, әсіресе, бизнес саласындағы тәуекелдерден қорқуға болмайды. Жалпы, бәсекелестікке толы қазіргі заманда тәуекелсіз іс бітпейді», дейді кәсіпкер бауырымыз.

Бұл сөздің дұрыстығына оның осы уақытқа дейін атқарып келе жатқан істері жақсы дәлел бола алады.

Сұңғат ӘЛІПБАЙ,

«Егемен Қазақстан».