Елбасының «Рухани жаңғыру» бағдарламасы аясында өтетін іс-шарада Махамбеттің «Қайран, Нарын», «Шілтерлі терезе», «Жайық асу», «Жорықта», «Исатайдың Ақтабаны-ай», «Жұмыр-Қылыш», «Өкініш», «Арысымнан айрылдым», «Мен, мен, едім, мен едім» сынды, т.б. қадау-қадау күй-мұралары орындалып, сахналық көріністер тарту етілмек. Сондай-ақ бағдарламаға Құрманғазының «Кішкентай», КСРО халық әртісі Нұрғиса Тілендиевтің «Махамбет», Қазақстанның еңбек сіңірген қайраткері, «Парасат» орденінің иегері Айтқали Жайымовтың «Ереуіл атқа ер салмай», Нұрлан Бекеновтің «Қызғыш құс» сияқты көптеген күй-симфониясы еніп отыр.
Халқы ардақ тұтқан асыл ер Ұлы даланың азаттығы жолында, тәуелсіздік таңы үшін күресті десек, баһадүр батырдың отты жырлары мен жүректі қақ жаратын туындыларының маңызы кейінгі ұрпағы үшін әлі де құнды, әлі де баға жетпес байлық саналады. Махамбет – қазақтың қашанда асқақ рухы, аласармас арманы, мәңгілік үлгі тұтар тұлғасы. Оның ерлік жолын, күрескерлік болмысын дәріптеу, ұрпақтан-ұрпаққа насихаттау – келешектің ортақ парызы, ұлы миссиясы. Мемлекеттік академиялық филармониясының күй жобасын «Рухани жаңғыру» бағдарламасы аясында қолға алудағы мақсаты да сол – тарихи-мәдени мұраны сақтау, дамыту және кеңінен дәріптеу.
Қаршыға КҮЛЕН
