![«Altyn oimaq» шеберлердің жолын ашады](/media/2019/08/26/crop-5_87_565x1105_bca8f6a7b4d9c73c0e4741c2852974ce.jpg)
Отандық жеңіл өнеркәсіпті қолдау және саланы дамытуды мақсат еткен форумға 80-ге жуық отандық компания қатыспақ. Көрмеге киім, аяқ киім және үйге арналған тоқыма бұйымдары, әшекейлер, қолөнер шеберлерінің жұмыстары қойылады. Сонымен қатар көрмеге жоғары деңгейдегі трейдер компаниялар да шақырылған. Баспасөз конференциясы барысында спикерлер тамыздың аяғына жоспарланған айтулы шараға қатысу шарттары туралы хабарлап, көрменің арнайы қонақтары – Fashion Academy a Paris өкілдері, Polimoda, Eurasian Fashion Week киім дизайны институтының мамандары туралы ақпарат берді. Форум мен көрме қатысушыларына тегін семинарлар, еуропалық және отандық жетекші мамандардың шеберлік сабақтарын өткізу жоспарланған. Мысалы, «Бизнес ретіндегі қолөнер» дәрісі шеңберінде италиялық өндіріс жүйесі туралы мәлімет беріліп, Апеннин түбегінде өндірілген өнімдердің аңызға айналған сапасы, өндіріс жүйесінің құрылымы, ерекшеліктері түсіндіріледі.
Форумның екінші күні тоқыма және мата таңдау туралы дәрісте Chanel, Dior, Kenzo, Celine сән үйлеріне арнап жібек және жаккард маталарын өндіретін француз фабрикасының өкілі, Fashion Academy a Paris компаниясының маманы дәріс оқиды. Онда алдағы маусымдардың жаңа, сәнді маталардың үлгілері таныстырылып, оның құрамы және өндіру процесі талқыланады, маталарды жіктеу және өрім типтері туралы ақпарат беріледі.