Теріскейліктердің түрлі байрақты жарыстардағы көрсеткіштері де ауыз толтырып айтарлықтай. 413 спортшы еліміздің ұлттық құрамаларына қабылданып, сәтті өнер көрсетіп жүр. Биыл 17 халықаралық, 34 республикалық додаларға қатысып, 266 медаль иеленуі – осы сөзіміздің айғағы. Олардың арасында еркін күрестен Азия чемпионы Нұрғожа Қайпановтың, сары құрлықтың қола жүлдегерлері, жеңіл атлетшілер Маргарита Мұқашева мен Михаил Литвиннің, әйелдер күресінен Азия біріншілігінде үшінші орынға табан тіреген Екатерина Фирстованың, «Astana» кәсіпқой велокомандасының белді мүшелері Алексей Луценко, Жандос Бижігітов, Артем Захаровтың, гір көтеруден Еуропа жеңімпазы Артем Головиннің, тағы басқаларының есімдері құрметпен аталады.
Өткен ғасырдың тоқсаныншы жылдары өңірде небәрі 10-ға жуық балалар мен жасөспірімдер клубы болса, бүгінде 30-ға жуықтаған. Соңғы жылдары облыс орталығында әмбебап спорт сарайы, заманауи теннис орталығы, екі ауданда дене шынықтыру және спорт кешені пайдалануға берілсе, Айыртау, Ақжар аудандарында «Ауыл – ел бесігі» бағдарламасы шеңберінде салынуда. Жүзден астам шағын футбол алаңдары мен хоккей корттары тұрғызылды. Қазақ күресінен «Қызылжар арландары», ат спорты және ұлттық ойын түрлерінен «Тұлпар» кәсіби спорт клубтары жұмыс істейді. Таяу арада олимпиадалық резервтегі мамандандырылған мектеп-интернат-колледжі ашылмақ.
Десек те, саламатты өмір салтын қалыптастыру бағытында атқарылатын жұмыстар әлі аз емес. Оны әкімдіктің отырысында аймақ басшысы Құмар Ақсақалов санамалап берді.
– Біріншіден, спортта жарақат алу жиі кездеседі. Осы себепті спортшылар үшін кәсіби дәрігерлер даярлауды, штаттық режімде жұмыс істеуін қамтамасыз ету керек. Екіншіден, балалар мен жасөспірімдер мектептерінің материалдық-техникалық базасының жабдықталуы көңіл көншітпейді. Бұл орайда спорттың нәтижесімен қоса, әлеуметтік жауапкершілігі де өте маңызды. Ақжар, М.Жұмабаев аудандарында спорттық сайыстарға тиісінше бар болғаны 349 мың, 421 мың теңге ғана қарастырылған. Үшіншіден, олимпиадалық спорт түрлеріне ғана басымдық беріліп, бұқаралық жағы кенжелеп жатады.
Өз басым жергілікті спортшылардың жыл бойы түрлі жарыстарға барып тұруына қаражаттың қажетті мөлшерде бөлінбеуін түсінбеймін. Керісінше, барлық клубтар спортшыларды сырттан, шетелден шақыруға құмар. Меніңше, оларсыз-ақ жоғары нәтижелерге қол жеткізуге болады. Мәселені тек легионерлер арқылы шешеміз деу, еш ақылға сыймайды. Шебер спорт сайыпқырандарын дайындау –сіздердің міндеттеріңіз. Қит етсе рейтинг қууға бейімбіз. Ол сатыдан түсіп қалсақ, ештеңе етпейді. Демек, деңгейіміз сол болғаны. Бірер жылға келетін адамға қыруар қаржы шашамыз. Ол ақшаны өзіміздің спортшыларға беріңіздер, – дей келіп, Құмар Іргебайұлы легионерлер алуға тыйым салатынын кесіп айтты.
Дене шынықтыру және спорт басқармасының басшысы Руслан Есеналиннің 9 спорт клубының құрамында 924 спортшы жаттығады, олардың 855-і жергілікті, 65-і басқа өңірлерден дегеніне келісейік. Ал 4-уі ғана легионер деуі күмән тудырмай қоймайды. Мәселен, Қазақстанның кубогын екі рет жеңіп алған «Құлагер» хоккей клубы сапындағы ойыншылардың басым бөлігі – ресейліктер. Сол сияқты «Қызылжар-СК» футбол клубында да сырттан шақырылған аяқдоп шеберлерінің үлесі көп.
Сөзі мен ісі үйлескен облыс әкімінің талабы орындаларына, жергілікті спортшылар үшін барлық жағдай жасаларына сенейік.
Солтүстік Қазақстан облысы
