Кездесуде депутат В.Волков Қазақстан Республикасының Президенті Қ.Тоқаев қойған 10 басты міндетті іске асыру бойынша қабылданып жатқан шаралар туралы айтып, азаматтардың табысын арттыру, тұрғын үй саясаты және аймақтарды кешенді дамытуға қатысты мәселелерге кеңінен тоқталды.
Сенатор Елтай ауылдық округіндегі Көкөзек ауылында 2006 жылы ашылған былғары шығаратын «Almaty Tannery» ЖШС зауытында болды. Кәсіпорын ірі қара малдан қуаттылығы жылына 2500 тонна шикізат өндіріп отыр. 2018 жылы өнеркәсіп өнімі 199,9 млн теңгені құрап, 75 жұмыс орны ашылды. Кездесу барысында сапалы шикізаттың жетіспеуі мен отандық былғары өндірушілердің жағдайы сөз болды.
* * *
Ал Парламент Мәжілісінің депутаты Нұрлан Дулатбеков Маңғыстау өлкесіне жұмыс сапарымен келді. Мәжіліс депутаты бірқатар нысанды аралауды бастап кетті. Бүгін халық қалаулысы «МАЭК-Қазатомпром» ЖШС-да болып, ұжыммен кездесті. Алдымен мекеменің мұражайына бас сұғып, кәсіпорынның тарихымен танысты. Одан әрі ЖЭО-1
жұмысымен танысты. Кәсіпорын Ақтау қаласы мен жақын маңдағы ауылдардың тұрғындарын, сондай-ақ өңірдің өнеркәсіптік кәсіпорындарын ауызсумен және шаруашылық сумен, жылумен және электр энергиясымен қамтамасыз етеді. Бүгінде мекемеде төрт мыңға жуық маман жұмыс істейді. Қазіргі уақытта комбинат 600 Мвт-дан астам электр қуатымен жұмыс істеу және тәулігіне 60 мың текше метрден астам дистиллят шығару мүмкіндігі бар. Халық қалаулысы әлеуметтік қамсыздандыру саласына баса назар аударып, азаматтардың әл-ауқатын жақсартуға ерекше мән беріліп келе жатқандығын алға тартты. Бірқатар өзекті әлеуметтік мәселелер көтеріліп, айтылған барлық ұсыныс-пікір Мәжіліс депутаты назарына алынды. Одан әрі Мәжіліс депутаты Ш. Есенов атындағы университеттің ұжымымен кездеседі. Одан әрі аудандарға барып, тұрғындарды жеке қабылдау жоспарда бар.
* * *
Сондай-ақ Мәжіліс депутаты Nur Otan партиясы жанындағы Сыбайлас жемқорлыққа қарсы іс-қимыл жөніндегі қоғамдық кеңес төрағасы Омархан Өксікбаев Алматы облысының Ескелді ауылында азаматтарды қабылдады.
Қабылдауға келген азаматтар депутаттан тұрғын үй құжаттарын реттеу, тұрақты жұмыспен қамту және басқа да өздерін толғандырған көптеген мәселені көтерді.
– Партиялықтар кез келген уақытта тұрғындардың тілегіне ерекше назар аударып, сұрақтарына жылдам жауап беруге әзір болуы тиіс. Қазір біз цифрлы заманда өмір сүреміз. Өтініштер онлайн тіркеледі. Қоғамдық қабылдау бөлмелерінің де жұмысын барынша оңтайландырып, азаматтардың өтініштерін шұғыл шешуге күш салсақ, жұмысымыз жемісті болады. Алдыма келген азаматтардың әр сұрағына ден қойып, қолымда бар мүмкіндікті аянбастан ұсындым, – деді Омархан Нұртайұлы.
Жалпы, Ескелді аудандық филиалының қабылдау бөлмесіне жыл басынан бері 177 өтініш келіп түссе, олардың 60-ы оң шешімін тапқан. 4 мыңнан астам партия мүшесі, 13 бастауыш партия ұйымы бар. Партиялық бақылау қызметі мен жемқорлыққа қарсы іс-қимыл жөніндегі аудандық кеңес жыл басынан оннан астам отырыс өткізіп, мемлекеттік мекемелерге 17 ұсыныс берген.
