AVONNH15K респираторларын құрастыру «Астана – жаңа қала» АЭА индустриялық аймағында (Нұр-Сұлтан қ.) жолға қойылған. Жобаға салынған инвестициялардың жалпы көлемі – шамамен 1 млрд теңге. Жаңа 16 жұмыс орны ашылып отыр.
Респираторларды құтқару құралы ретінде 30 секундтан төмен уақытта қолдануға болады және бұл 15 минутқа дейін ауаның сүзілуін қамтамасыз етеді. Бұл – төтенше жағдайларда қауіпсіз жерге жету үшін жеткілікті уақыт. Бетті түгел жабатын мөлдір бетперде улы сұйықтықтардың шашырауынан қорғайды. Оның үстіне буланудан қорғалған. Қазақстанда шығарылатын модификация жергілікті климаттық жағдайға арнайы бейімделіп жасалған. Теңіз және Қарашығанақ кен орындарының операторлары «QHSE-Akbarys» ЖШС өнімдеріне осындай қасиеттері үшін ерекше қызығушылық танытуда.
Таяуда қазақстандық кәсіпорынның құрастыру цехы таныстырылды. «QHSE-Akbarys» ЖШС-нің бизнесті дамыту жөніндегі менеджері Тимур Жарылқағановтың айтуынша, Қазақстан аумағында өндірісті ұйымдастыруға «Теңізшевройл» ЖШС бастамашы болды.
«Сіздер, біздің тапсырыс берушіміз ретінде Қазақстаннан осы өндірісті ашуға көмектестіңіздер. Бүгін осы зауыттың жұмыс істеп тұрғанына куә болып отырмыз», деді Т.Жарлықағанов өндіріс алаңының ашылу салтанатына қатысқан ТШО бас директоры Имер Боннерге қарап.
«Теңізшевройл» ЖШС-нің отандық нарықты дамыту бөлімінің үйлестірушісі Олжас Лұқмановтың айтуынша, осы өнімді жеткізу келісімшартында қазақстандық үлесті арттыру жоспары бойынша AVONNH15K респираторларын өндіруді оқшаулау қарастырылған.
Ұзақ мерзімді келісімшарттардағы қазақстандық қамтуды арттыру жоспары – 2017 жылдан бастап «Теңізшевройл» ЖШС-де жергілікті қамтуды дамытудың кешенді стратегиясының бір бөлігіне айналды. «QHSE-Akbarys» жетістігі осы тәсілдің бір ғана нәтижесі емес. Осылайша, KISCO компаниясы қазақстандық қамтуды дамыту жоспарын ұсынды, соған сәйкес Атырауда фланец төсемдерін шығаратын цех іске қосылды.
2018 жылдың соңынан бастап Атыраудағы KISCO өндірістік алаңында 23 қазақстандық жұмысшы жұмыс істейді, ал кәсіпорын ТШО-ға барлық халықаралық стандарттарға сәйкес келетін отандық өнімдер жеткізеді. Айтпақшы, цех Атырау құмдарындағы немістің инженерлік ой жемісінің оазисі іспеттес. Өндіріс процесі неміс технологиясына сай, жұмысшылар да соған сәйкес оқытылған.
Жергілікті өндіріс үшін жеткізушілер инфрақұрылымға қаражат салатын осындай жергілікті қамтуды дамыту үлгісі жаңа жұмыс орындары түрінде ғана пайда әкелмейді. Мұндағы негізгі артықшылық – технологиялар мен дағдылар трансферті.
Тағы бір мысал – «Шымкентцемент» АҚ. Кәсіпорын Теңіз кенішіндегі ұңғымаларды цементтеу кезінде белсенді қолданылатын G маркалы бітегіш цемент өндірісін оқшаулауға мүмкіндік алды. ҚР аумағында осындай сыныптағы цемент өндірісін ұйымдастыру мүмкіндігі ТШО-ның ұзақ мерзімді мақсаттарының бірі болатын. «Шымкентцемент» АҚ кездейсоқ таңдалмады. ТШО және ұңғымаларды аяқтау бойынша негізгі қызмет жеткізуші Шлюмберже мамандары өндірістік мүмкіндіктерін анықтау үшін үш цемент өндірушіге аудит жүргізді. Тек «Шымкентцемент» қана API 10A бойынша сертификатталған болып шықты, оның өнімдері Шлюмберже мен Шевронның зертханаларында сынақтан ойдағыдай өтті. Технологиялық процесс жолға қойылып, кәсіпорын Теңіз жобасының қажеттіліктері үшін әлемдік деңгейдегі цементті өндіре бастады. Бұдан басқа, G маркалы қазақстандық цемент халықаралық нарыққа экспорттау үшін жарамды. Қазіргі уақытта қазақстандық мамандар бүкіл компания штатының 95%-ын құрайды.
Теңіз жобасын жүзеге асыруға мердігер мекемелердің қызметкерлерін қоса алғанда, барлығы 80 мыңға жуық қазақстандық жұмылдырылды. 2018 жылы «Теңізшевройл» ЖШС-нің отандық өндірушілердің тауарлары мен қызметтерін сатып алу шығындары 1,3 трлн теңгеден асты. Салыстыру үшін айталық, сол жылы ТШО қызмет ететін бүкіл Атырау облысы бюджетінің шығыс бөлігі 100 млрд теңгеден сәл астам болған еді.
Қазақстандық тауарлар мен қызметтердің негізгі көлемі Келешек Кеңею Жобасы (ККЖ) мен Ұңғы Ернеуіндегі Қысымды Басқару Жобасы (ҰЕҚБЖ) аясында сатып алынды. Бүкіл шығындардың 65%-ы – осы жобаларға тиесілі.
«Теңізшевройл» ЖШС-де тауарлар мен қызметтерді сатып алудағы жергілікті қамту үлесі үнемі өсіп келеді. Компанияның мәліметінше, 1993 жылы қазақстандық тауарлар мен қызметтерді сатып алу шығындары – 27 млн АҚШ долларына жетті. 2003 жылы бұл көрсеткіш 500 млн АҚШ долларынан асқан-ды. Ал 2013 жылы ТШО отандық тауарлар мен қызметтерді сатып алуға 2,3 млрд-тан астам АҚШ долларын жұмсады. Салыстыру үшін айталық, осы жылдың бірінші жартыжылдығындағы қорытынды бойынша бұл көрсеткіш 2,1 млрд АҚШ долларына жетті.
Қызметтер мен жұмыстар ТШО-ның негізгі сатып алулар бөлігін құрайды және компания атап өткендей, бұл үрдіс өзгермейді. 2018 жылы қазақстандық жеткізушілер ТШО-ның қызметтер пен жұмыстар бойынша негізгі өндіріс қажеттіліктерінің 70%-ын
қанағаттандырған.
