Грант көлемі- 250 мың және 505 мың теңге. Бұл қаржы болашақ кәсіпкерлерге өз ісін ілгерілету үшін беріледі. Ақтауда өңірлік кәсіпкерлер палатасында осы бағдарламасы бойынша үміткерлерді анықтауға арналған шара өтті. Арнайы комиссия бұл жолы 24 үміткердің жобасын сарапқа салды. Қатысушылар әлеуметтік жағдайы нашар, яғни мүгедектігі, жарымжан балалардың асыраушылары, көпбалалы, толық емес отбасы, оралман және жұмыс көзін көптеп ашуы жағынан сараланды. Әр қатысушыға өз бизнес-жобасының тиімділігін дәлелдеу үшін жеке-жеке уақыт беріліп, комиссия алдында қорғауға мүмкіндік жасалды.
Солардың бірі - Інжу Медиева. Үшінші топ мүгедегі, алты баланың анасы. Ол Шетпе ауылынан кілем жуу қызметін қолға алғысы келеді. Сөйтіп отбасына тұрақты табыс көзін таппақ. Ұзақ жыл жұмыссыз отырған ол мұндай кәсіп шағын ауылда мүлдем жоқ екенін алға тартты. Сондықтан да тапсырыстың көп боларына сенімді.
Әлеуметтік осал топтарға жататын жандар шаштараз, кондитер өнімдері, тігін шеберханасы, құс және мал шаруашылығы т. б кәсіп ашуға дайын.
Сондай-ақ, Ақтауда «Жас кәсіпкер» жобасының тыңдаушылары да 200 АЕК грант алудан үмітті. 33 жас талап тың жобаларын арнайы комиссия алдында қорғап шықты.
-Комиссия отырысында тың, халық үшін аса қажет жобалар мақұлданады. Барлығы да жұмыссыз жандар. Олардың алған құрал-жабдықтары жасаған кәсіптері бір жыл бойы тексеріліп отырады. «Атамекен» кәсіпкерлер палатасы әлеуметтік жағдайы аз қамтылған жандардың аяққа тұрып кетуіне үлкен мүмкіндік жасап отыр, дейді комиссия төрағасы Н.Жарылғапов.
«Еңбек»- әлеуметтік жоба. Маңғыстау облысының кәсіпкерлер палатасында бұл бағдарлама қатысушыларына жаңа бизнес-идеяларды іске асыруға арналған мемлекеттік гранттар беру жөніндегі комиссия кәсіпкерлердің жоспарларын егжей-тегжейлі талқылады. Қайтарымсыз қаражатқа қол жеткізуге облыстағы Қарақия, Маңғыстау, Түпқараған, Бейнеу, Мұнайлы аудандары мен Ақтау, Жаңаөзен қалаларының тұрғындары ниетті.
Маңғыстау облысы
