Кино • 09 Қыркүйек, 2019

«Қаламгер» фильмі жарыққа шықты

1414 рет
көрсетілді
2 мин
оқу үшін

«Хабар» агенттігінің тапсырысымен даярланған «Қаламгер» атты толықметражды фильм жарыққа шықты. Қазақ әдебиетінің Кеңес дәуіріндегі тынысын арқау еткен тарихи драма еліміздің кинотеатрларында 12 қыркүйектен бастап көрсетілмек.

«Қаламгер» фильмі жарыққа шықты

Оқиға Сәтжан есімді жас жазу­шының Алматыға келуімен бас­талады. Жазушылар одағына қабылданып, шығармаларымен бірден көзге түскен жас талант ғылым жолына бет бұрады. Жабық тақырып саналып келген Алаш тақырыбына диссертация жаза бастаған ол қыспаққа алынып, қатаң идеологиялық бақылаудың үстемдігі жазушы мұратын аяқасты етуге күш салады. Фильмде өткен ғасырдың 70-80-жылдарындағы ақын-жазушылардың басынан кешкен жағдайы бас кейіпкер Сәтжан арқылы бейнеленеді. Сәтжан – жиынтық образ. Кинокартинада әдебиеттің қоғам ісіне батыл араласуы, әдебиеттің тақырыптық арнасының кеңеюі тұсында атсалысқан ақын-жазушылар образы, оған қоса махаббат драмасы осы Сәтжанның бойына тоғыстырылған.

«Жазушылар одағының биік мінберінде партияның жалын­ды үндеулері жарияланса, ірге­дегі «Қаламгер» кафесінде айты­­­латын әңгімелердің ауаны тіпті басқа болатын. Ком­пар­тия нұс­қауларының күші жүр­мей­тін, цензураның қамыты қыс­пайтын, жазушылардың әзілі мен астарлы әңгімесі, қал­жы­ңы мен қағытпасы қатар жүретін «Қаламгер» кафесі сол кездегі қоғамның шынайы бет-пер­де­сі­нің символы ретінде алынып отыр», дейді фильм режиссері Мұрат Бидосов. Оның айтуын­ша, драма атауы – қолына қа­лам ұстаған жазушы қауымды меңзесе, астарлы мағынасында азаттыққа ұмтылған қаламгер қауымның бұлқынысы, ішкі шерін көрсетеді. Фильм өмірде болған адамдардың про­то­тип­те­рі арқылы олар бастан кешкен оқиғаларға сүйене отырып, сол дәуірдің тыныс-тіршілігін көрсетуді мақсат тұтқан.

– Туындыдағы кейіп­кер­лер­дің дені тарихи тұлғалар. Бас кейіпкер Сәтжан сол дәуірдегі қалам­герлердің жиынтық обра­зы болса, оған қарсы тұра­тын жағымсыз кейіпкер де пар­тия­ның сойылын соққан, уа­қыт­тың құрбанына айналған жан, – дейді «Қаламгер» фильмінің сце­нарий авторы Сержан Зәкер­ұлы.

Картинаға көрнекті жазу­шы Дулат Исабеков, ақын Бақыт Бе­делхан кеңесші ретінде тар­тылып, туындының жалпы мазмұны мен көркемдік талаптарын мұқият пысық­та­ған. Басты рөлдерді сом­да­ғандардың қатарында Бағ­дәу­лет Шаймахан, Жал­ғас Толғанбай, Нарғыз Алтай­бай, Ергенбай Әбуев, Досжан Жанботаев, Балтабай Сейіт­мамыт, Арнұр Құдиярбек бар. 14 бөлімнен тұратын көп се­риялы туындының теле­ви­зиялық нұсқасы Тәуел­сіз­дік күні қарсаңында «Хабар» арнасынан қалың көрер­мен­ге жол тартады. Жоба Ақпа­рат және қоғамдық даму минис­тр­лігінің қолдауымен жүзеге асырылып, «Рухани жаңғыру» бағдарламасы аясында түсіріл­ді.