«Бүгінгі шараның Алматы қаласында өтуінің маңызы зор. Ұлы жазушы бозбала шағында осында келіп, өмірінің ең бақытты да мағыналы шақтарын осы Алматы қаласында өткізді. Жазушылық өнердің, суреткерлік шеберліктің шыңына шықты. Мемлекеттік қызмет пен саясат сахнасында жасындай жарқылдап, сөз бастар шешенге, ой тастар көсемге айналды. «Жақсы болудың жақсылық жасаудан басқа жолы жоқ» дейтін Әбіш Кекілбаевтың сөзінде де, шығармашылығында да жасандылық болған жоқ. Әбіш шығармаларын оқи отырып, қазақ деген халықтың ұлттық мінезін, мәдениетінің сан қырлы қатпарын жазбай тануға болады. Ол туындылар ұлт тарихының жылнамасындай, өзіміз өмір сүріп жатқан қоғам мен заманның тынысындай болды»,– деді Бақытжан Сағынтаев.
Өзен жағасында орналасқан көшеге көрік берген көрнекті тұлға туралы белгілі жазушы, Мемлекеттік сыйлықтың лауреаты Қажығали Мұхаметқали, Мереке Құлкенов, Қазақстанның еңбек сіңірген қайраткері, желаяқ спортшы Әмен Тұяқов сынды замандастары, жары Клара Жұмабаева жылы естеліктерімен бөлісті.
