Жылыту маусымына дайындық пысықталды

Қазақстан • 23 Қыркүйек, 2019

Жылыту маусымына дайындық пысықталды

Орталық коммуникациялар қызметінде өткен баспасөз мәслихатында Индустрия және инфрақұрылымдық даму министрінің бірінші орынбасары Қайырбек Өскенбаев алдағы жылыту маусымына дайындық барысын баяндады.

Бауыржан Мұқан

Биыл жылыту маусымына дайын болу мақсатында министрлік 2019-2020 жылдарға арналған жұмыс жоспарын бекітті. Соған сәйкес облыстардың, Нұр-Сұлтан, Алматы және Шымкент қалаларының әкімдіктері 15 қазанға дейін барлық нысандарды, соның ішінде инженерлік желілерді, дербес қазандықтарды дайындап, халықты және коммуналдық-тұрмыстық ұйымдарды отын қорымен қамтамасыз етуі қажет. Жоспарға сай, «Нұрлы жол» мемлекеттік бағдарламасы шеңберінде 37,9 млрд теңге сомаға жылумен, сумен жабдықтау және су бұру бойынша 18 жоба жүзеге асырылуда.

Инженерлік инфрақұрылымды жылыту маусымына дайындау үшін жоспарлы түрде жөндеу жұмыстары жүргізілді. Атап айтар болсақ, 10 212 дербес қазандық (жоспардың 96,1%-ы), 4,8 мың шақырым жылумен жабдықтау желісі (жоспардың 96,2%-ы), 14,5 мың шақырым сумен жабдықтау желісі (жоспардың 95,9%-ы) жөнделді. Қалған жұмыс жылыту маусымы басталғанға дейін аяқталмақ.

2019 жылғы 16 қыркүйектегі жағдай бойынша әлеуметтік нысандардың жылыту маусымына дайындығы ойдағыдай. Білім беру нысандарының 99,6%-ы, денсаулық сақтау нысандарының 98,6%-ы, тұрғын үйлердің 94,9%-ы сақадай-сай.

Қ.Өскенбаевтың айтуынша, алдағы жылыту маусымында қажет болатын көмір мөлшері –10,4 млн тонна. Қазір 4,9 млн тонна көмір дайын.

Көмір өндіруші компаниялар өндірген 74,1 млн тонна көмірдің 50,8 млн тоннасы ішкі нарыққа бағытталды. Соның 9,1 млн тоннасы энергия өндіруші кәсіпорындарға, 4,7 млн тоннасы отын-өнеркәсіп кәсіпорындарына, 6,9 млн тоннасы коммуналдық-тұрмыстық қажеттіліктерге бөлінді. Экспорт 19,6 млн тоннаны құрап, былтырмен салыстырғанда 1,7%-ға асып түсті.

«Облыс, қалалар және аудан әкімдіктері шілде айынан бастап көмір дайындау жұмысын бастады. Олар тұрақты негізде көмір жеткізу мониторингін жүргізеді, халыққа көмір сатылатын орындар мен онда отынның бар-жоғы туралы түсіндіру үшін жедел желі құрды. Сондай-ақ БАҚ-тар мен әлеуметтік желілерде жалған ақпараттың таралуына жол бермеу жөнінде түсіндіру жұмысын жүргізіп жатыр», деді министрдің бірінші орынбасары.

Қазіргі таңда коммуналдық қызметтер үшін тұтынушылардың берешегі 11,6 млрд теңге екен. Жоғары дебиторлық берешек Алматы қаласында – 2,7 млрд теңге, Нұр-Сұлтан қаласында – 1,7 млрд теңге, Маңғыстау облысында – 1,5 млрд теңге, Шымкент қаласында – 1,3 млрд теңге.