Алматы қаласы Әлеуметтік әл-ауқат басқармасы басшысының міндетін атқарушы Данияр Әлкебайұлының айтуынша, 10 мыңнан астам отбасы атаулы әлеуметтік көмек алатындар тізімінде. Бұл төлемдер аз қамтылған және көп балалы отбасыларға маңызды көмек болды. Мемлекеттік қолдау арқылы зәру отбасылардың жағдайы біршама тұрақтанған.
Атаулы әлеуметтік көмек алатындардың еңбекке жарамдысы «Еңбек» нәтижелі жұмыспен қамтуды және жаппай кәсіпкерлікті дамытудың 2017-2021 жылдарға арналған мемлекеттік бағдарламасына орай жұмыспен қамту шараларын пайдалануға мүмкіндігі бар. Нәтижесінде тұрақты және уақытша жұмыс орындарына жұмысқа орналасуға, еңбек нарығында сұранысқа ие мамандықтар бойынша қысқа мерзімді кәсіби курстардан өтіп, бизнес жобаларын іске асыру мүмкіндіктері қарастырылған. Осы бағыттағы жобалар үшін 200 АЕК – 505 мың теңге көлемінде грант беріледі.
Алматылық жалғыз басты ана Зәуреш Жүсіпова мемлекеттік қолдауға ие болғандар қатарында. «Шебер» орталығында тігінші мамандығын игерген Зәурешке де әлеуметтік көмек тағайындалған. Тігіншілікті қажетті кәсіп деп санайтын Зәуреш ендігі кезекте бизнес жоспарын жасап, жеке кәсібін ашуды жоспарлап отыр. Ал үш баланың анасы Анар Қылышева отбасының жалғыз асыраушысы. Бақылаушы-кассир қысқа мерзімді курсынан өткен Анарға 77 186 теңге көлемінде әлеуметтік көмек тағайындалып, қазіргі кезде отбасы мектептің қажеттіліктерін алып, жағдайын біршама жеңілдетті.
Мемлекеттік бағдарламаны тиімді пайдаланып, туризм агенттігінде тәлім алған Альбина Әмренова да кәсіпкерлікпен айналысуды мақсат етеді. Оның айтуынша, жұмыспен қамту орталығынан берілген нақты көмек жаңа мамандық алып, заманауи ақпараттарды игеріп, өзін өзі дамытуға зор мүмкіндік беріп отыр.
Сонымен қатар 2 жас пен 17 жас аралығындағы баласы бар көп балалы ана Сымбат Абатоваға да әлеуметтік көмек тағайындалыпты. Отағасының жұмыс істегеніне қарамастан, келетін табыс жеткілікті болмағандықтан отбасына көмек ретінде берілген 67 604 теңгенің пайдасы әжептәуір. Ал Сымбат Жұмыс беру орталығына тіркеліп, аспазшы мамандығы бойынша қысқа мерзімді курстан өткен. Қазіргі кезде Алматы мемлекеттік бизнес колледжінен сертификат алып, өз кәсібін ашу үшін бизнес жоспарын жасауда. Сонымен қатар Жұмыс беру орталығында тіркеліп, кейіннен «Агропромэнергоснаб-1» ЖШС жұмысқа орналасқан. Мектепке дейінгі 1, мектеп жасындағы 3 баласы бар көп балалы ана Виктория Филлипович ағымдағы жылдың мамыр айынан бастап әлеуметтік көмек ала бастаған.
Ал соңғы кездері мемлекеттен берілетін әлеуметтік көмекке зәру отбасылармен қатар өз табысын жасырған, жағдайы бар азаматтардың алып жатқандығы жайындағы деректер анықталуда. Мұндай кереғар әрекеттер қоғамды алаңдатуымен қатар, жалған деректермен құжат өткізіп келген азаматтардың отбасындағы ахуалға да әсер етеді деп санайды әлеуметтік сала мамандары. Сондықтан да азаматтардың жалған ақпарат беруге бейім пиғылдары, жоқты желеу етіп келеңсіздіктерге саналы түрде жол беруі бүгінде қоғам болып күресуді қажет ететін көкейкесті мәселе.
АЛМАТЫ
