Турнирдің алғашқы бәсекесінде отандасымыз қытайлық теннисші Чжу Линьннен 7:5, 2:6, 6:0 нәтижесімен басым түссе, екінші кездесуде тунистік Онс Жаберді 6:1, 6:7, 6:2 есебімен қапы қалдырды. Ал ширек финалдың жолдамасы үшін өткен бәсекеде әлемнің экс-бірінші ракеткасы румыниялық Симона Халепті алғашқы сетте 5:4 есебімен жеңіп жатқан-ды. Бірақ румыниялық теннисші жарақатына байланысты кездесуді жалғастырудан бас тартты. Осылайша отандасымыз турнирдің ширек финалына жолдама алды.
Енді қазақстандық теннисші жартылай финалға шығу үшін Арина Соболенко (Беларусь) және Кики Бертенс (Нидерланд) жұбының жеңімпазымен күш сынасады.
