Жуырда ғана Жамбыл облысында 4 адам сібір жарасы ауруын жұқтырып, ауруханаға түскен болатын. Бірақ болжам болмаса, олардың нақты неден ауру жұқтырғаны белгісіз. Түсініксіз кеселге шалдыққандардың бірі Жуалы ауданы, Шақпақата ауылындағы шаруа қожалығының шопаны болса, екіншісі сол шопанның әйелі екен. Ал кесел жұқтырған өзге екі азамат Жамбыл ауданының тұрғындары, яғни қасапшылар болып шықты. Бұл науқастарға аса қауіпті індет мал сойған кезде жұққан деген болжам бар. Өйткені науқастар он шақты күн бұрын қыстақтағы қожайынның сиырын сойғанын растаған. Артынша бәрінің де денесін жара басып кеткен.
Жалпы, сібір жарасы мал арасында өте кең тараған қауіпті кеселдің бірі. Алайда мамандардың айтуынша, бұл ауру адам баласына жұққан жағдайда, оның өміріне қауіп төндіреді. Абырой болғанда науқастарға дер кезінде көмек көрсетіліп, қайғылы жағдай орын алған жоқ. Ақ халаттылар бүгінде аса қауіпті індетке шалдыққан 4 науқастың жағдайының қалыпты екенін айтып отыр. Оларға тиісінше нақты көмектер көрсетілуде. «Қазір науқастар тиісті ем қабылдауда. Олар облыстық жұқпалы аурулар ауруханасында 20 күн болады. Сібір жарасы адам өміріне өте қауіпті індет», дейді облыстық инфекциялық аурулардың қатерлерін бақылау кеңестік-әдістемелік орталығының жетекшісі Гүлфайра Мырзабекова. Бүгінде науқастармен байланыста болған 44 адам мен ауылдың мал дәрігері де қатаң бақылауға алынған. Ал өңірдегі ветеринар мамандар кәсіпкердің қорасында өлген 6 бас сиырдан сынама алған. Алайда, өлген малдардың бірде-біреуінен күйдіргі дертінің белгілері анықталмапты. Енді мал дәрігерлері бұл кеселдің қайдан келгенін білмей бас қатыруда. «Қазір біз аурудың ошағын іздеу үстіндеміз. Бірақ кеселдің неден болғанын таппай жатырмыз», дейді облыстық ветеринария басқармасының бөлім басшысы Қанатбек Қартабаев.
Бұл мәселе облыстық денсаулық сақтау басқармасының да қатаң қадағалауында. Басқарма науқастарға уақытында тиісті ем көрсету жұмыстарына қадағалау жүргізуде. Аталған басқарманың баспасөз қызметінің жетекшісі Толқын Өмірбаеваның айтуынша, олар ауруханаға түскен кезде 3 науқасқа «түйнеме» диагнозы қойылған. Сонымен қатар түйнеме диагнозын болдырмау мақсатында жараның ішіндегісін алып, облыстың санэпидсараптама орталығының аса қауіпті зертханасына жіберілген. «Жұмыс барысында серологиялық талдаудың оң нәтижесі алынды. Кейін барлық 4 науқастың да диагнозы сібір жарасы, тері түрі ретінде расталды. Бүгінде барлық науқастар боксталған 2 палатаға жеке орналастырылды. Олар тиісті ем алады. Қазір науқастардың жағдайы тұрақты», дейді басқарманың баспасөз хатшысы.
Аталған жағдай Жамбыл облыстық әкімдігінің де назарында. Облыс әкімі Асқар Мырзахметов өңірде Сібір жарасының шығуына байланысты пікір білдірді. «Түйнеме ауруымен 4 адамның ауырғандығы анықталды. Олар ауруханға жатқызылған. Дәрігерлердің мәлімдемелеріне сәйкес, бүгін олардың өміріне ешқандай қауіп жоқ. Ал енді олармен байланыста болды делінген адамдар да тексеріліп жатыр. Мұнан бөлек, орын алған жағдайға қатысты қылмыстық іс қозғалып, заң аясында тиісті шаралардың барлығы атқарылуда», деді А.Мырзахметов. Әкімнің айтуынша, өңірде карантин енгізу үшін Қазақстан Республикасының бас санитар дәрігерінің ресми шешімі қажет екен. Алайда қазіргі уақытта Ветеринария комитеті тарапынан облыс әкімдігіне ешқандай құжат келіп түспеген. Әкім сондықтан да әкімдік өздігінен карантин енгізе алмайтынын айтты. Осы мәселеге орай, А.Мырзахметовтің тапсырмасымен облыстық арнайы штаб құрылып, тиісті басшыларға аурудың ошағын анықтау үшін тапсырмалар берілді. Сонымен қатар қазір облыста тұрғындардың сібір жарасын неден жұқтырғанын анықтау жұмыстары жүргізілуде.
Әзірге індеттің шығу және науқастардың жұқтыру себебін ешкім анықтай алмай отыр. Ал ел арасында күйдіргіден өлген 20-дан астам ірі қараның еті Тараз қаласындағы шұжық цехына өткізілген деген қауесет тараған. Бірақ бұл да нақты емес. Бұл орайда облыстық ветеринария басқармасының бөлім басшысы Қанатбек Қартабаев аурудың ошағын анықтау бойынша тиісті жұмыстар жүргізіліп жатқанын жеткізді. Ауру ошақтарында Жуалы және Жамбыл аудандарының, сонымен қатар Тараз қаласының эпидемиологтары мен ветеринариялық қызметкерлері эпидемиологиялық тексеру мен профилактикалық және эпидемияға қарсы іс-шаралар кешенін жүргізуде. Ал облыстың тауарлар мен қызметтердің сапасын бақылау департаментінің деректері бойынша, өңірдің 11 аймағының аумағында 191 сібір жарасының ошақтары орналасқан. Ағымдағы жылы эпидемиологтар мен ветеринария қызметкерлері 1 мыңнан астам топырақ сынамаларын зерттеу үшін алған. Бірақ күйдіргінің қоздырғыштары табылмаған. Жамбыл облыстық денсаулық сақтау басқармасының мәліметінше, биыл сібір жарасына қарсы егу тобы 2159 адамды қамтыған.
Сібір жарасы Жамбыл өңіріндегі 4 бірдей тұрғынды сергелдеңге салды. Ең бастысы, адамдар аман. Бірақ жергілікті тұрғындар үшін бұл оқиғаның жайшылықта жай түскендей болғаны анық. Енді қауіпті кеселдің ошағы анықталып, адамдарға оның қайдан жұққаны анықталса игі. Адамдардың қауіпсіздігі қай кезде де маңызды.
Жамбыл облысы
