Облыстық Энергетика және тұрғын үй-коммуналдық шаруашылық басқармасының хабарлауынша, биылғы жылыту маусымында жергілікті халыққа қажетті көмірдің мөлшері шамамен 428 мың тоннаны құрайды.
– Көмір өнімдерін сату орындарында дүрлігуді болдырмау үшін облыс тұрғындарына жылыту маусымына көмірді алдын ала сатып алу қажеттігін ескертіп, түсіндіру жұмыстарын жүргіздік. 2019-2020 жылдардың жылу беру маусымына тұрғындар үшін шамамен 428 мың тонна қатты отын керек. Қазір 19,9 мың тонна көмір қоры бар. Бір тонна көмірдің бағасы жеткізумен қоса есептегенде
6 800-16 500 теңге аралығында. Халық негізінен «Майкөбе» ЖШС, «Богатырь көмір» ЖШС, «Қаражыра ЛТД» ЖШС көмірлерін сатып алады. Бөлшек сауда нарығында халыққа көмір жеткізуді 300-ден астам жеке кәсіпкер жүзеге асырады. Қазір облыста көмір тапшылығы байқалмайды, – деп хабарлады басқарма.
Жоғарыда айтып кеткеніміздей, облыс орталығындағы әлеуметтік нысандар күзгі қара суықта қалтыраудан аман. Мектеп, балабақша, аурухана сынды нысандар ішкі температуралық режімді өздері реттеп отырады.
Дайындық жұмыстары қаншалықты тыңғылықты жүргізілді дегеннің өзінде облыс орталығында 100 шақты үй жылу маусымына дайын емес. Бұл ешбір құрылымдармен басқарылмайтын үйлер. Сондықтан қыс мезгіліне әзірлік те тиісті дәрежеде жүргізілмеген.
Соңғы гидравликалық сынақтар кезінде де облыс орталығындағы жылу желілерінде ақаулар бар екені анықтады. Қазір коммуналдық сала мамандары оны қалпына келтірумен айналысып жатыр. Былтыр жылу деңгейі жеткіліксіз болған бес магистральда күрделі жөндеу басталған.
Қалалық энергетика және тұрғын үй-коммуналдық шаруашылық бөлімінің өкілі: «Бұл жылдан-жылға жалғасып келе жатқан мәселе. Жылу магистральдарының әбден тозығы жеткен. Ағымдағы жылы Нұр-Сұлтан, Лермонтов және Набережная көшелерінде, сонымен қатар Толстой көшесі 82 мекенжайы бойынша жұмыс жүріп жатыр. Былтыр бұл аумақтарда жылумен қамту деңгейі төмен болды. Сондықтан ұзындығы 250 метрлік желіні ауыстыруға тура келді», дейді.
Бүгінгі таңда облыс орталығындағы 1276 тұрғын үйдің жүзден астамы маусымға дайын емес. Бұл пәтер иеленуші кооперативтері, өзге де басқару құрылымдары жоқ үйлер. Тұрғындар оны өз күштерімен дайындауға қауқарсыз. Сол сияқты ішкі жылумен қамту жүйесіне жөндеу жүргізу үшін қаржы жинауға мүмкіндіктері жоқ.
Павлодар облысы
