Қазмедиа орталығында өткен баспасөз мәслихатында Ақпарат және қоғамдық даму министрі Дәурен Абаев «100 жаңа есім» жобасының үшінші кезеңі басталғанын хабарлады.
– Бүгін үлкен жобаны бастағалы жатырмыз. Осыдан екі жыл бұрын Елбасының бастамасымен «Рухани жаңғыру» бағдарламасы жарияланды. Соның аясында «100 жаңа есім» жобасының үшінші кезеңін өткізуді қолға алдық. Бұл жоба қоғамның дамуына өзінің үлкен ықпалын тигізіп келеді. Сондықтан оны жалғастыруға бел будық. Аталған бастама тәуелсіздік жылдарында еліміздің іргесін бекітуге үлес қосқан азаматтарды таныстыруды, олардың еңбегін насихаттауды көздейді. Бұған екі жылдың ішінде 5 мыңға жуық адам қатысты. Үздіктерді анықтау үшін екі миллионға жуық қазақстандық дауыс берді, – деді министр.
Одан кейін «Рухани жаңғыру» Қазақстандық әлеуметтік даму институтының төрағасы Кемелбек Ойшыбаев «100 жаңа есім» жобасы туралы жан-жақты мағлұмат беріп, дауыс беру процесін түсіндірді. Оның айтуынша, өтінімдерді қабылдау 20 қазанға дейін жалғасады. Жастар жылына арналған жобаға қатысуға ниет танытқандардың жасы 39-дан аспауы керек. Үміткерлер 100janaesim.ruh.kz сайтында сауалдаманы толтыруы қажет. Қатысушыға сенімді әрі нақты ақпарат беру міндеттеледі. Барлық өтінімдер модерациядан өтіп, кейін сайтта жарияланып, желіде дауыс беруге рұқсат алады. Сонымен қатар белгілі қоғам және мәдениет қайраткерлері, спорт және бизнес өкілдерінен тұратын қазылар алқасының қарауына ұсынылады.
Ал үміткерлерге дауыс беру үшін жобаның ресми сайтына тіркелу керек. Дауыс берушілер әр саладан тек бір үміткерден таңдай алады. Конкурстың нәтижелері биыл желтоқсан айында Елбасының қатысуымен өтетін таныстырылымда жарияланады.
Сонымен қатар аталған жобаның өткен жылдардағы ең белсенді жеңімпаздарынан «Бюро 100» командасы құрылды. Олар байқауға ең лайықты үміткерлерді іздестіру үшін Қазақстанның барлық аймақтарын аралайды. Команда әлеуметтік желілерде жоба қатысушыларын іздеудің барлық кезеңдерін көрсетеді. Солардың бірі, «100 жаңа есім» жобасының жеңімпазы Асан Жолдасов бұл бастаманың жақсы қырларын, білім саласындағы жастардың еңбегін көрсетуге септігін тигізетінін және Жастар жылында жас мұғалімдерге ерекше назар аударылып жатқанын атап өтті. Ол – математик, бағдарламашы және оқытушы. 2018 жылы «Қоғам» бағытында 15 757 дауыспен жеңімпаз атанған А.Жолдасов оқушы кезінен-ақ математикадан республикалық, халықаралық олимпиадаларға қатысқан және 19 жасында өз мектебін ашқан. Оқытудың арнайы әдістемесін жасап, «Пифагор» мектебін үлкен компанияға айналдырған. Осылайша 10 жылда 10 мыңнан аса баланың математикаға қызығушылығын оятқан.
