Қыркүйектің басынан еліміздегі астықты аймақтардың бірі саналатын Ақмола облысының егістік алқаптары дұрыстап бір дегдімеді десек те болғандай. Бурабай, Біржан сал, Зеренді аудандарында 24-36,2 миллиметр шамасында ылғал түсті. Ал Жарқайың, Есіл, Жақсы аудандарындағы жауын-шашынның мөлшері 11-22,4 миллиметр деңгейде болды. Қорғалжын ауданынан өзге өңірлерде күн қабағы бір ашылмады. Жұмыстың жүруінен тұруы көп болған соң қанша күш салғанымен, науқанның алғашқы күндерінде диқандардың адымы ашылмады.
Енді уақыттан ұту үшін кез келген ашық сәтті тиімді пайдаланған ләзім. Орақ жұмысы егінді тікелей орса, жиын-терім тезірек аяқталар еді. Бірақ дестеге түсірмей тағы болмайды. Кей алқаптардың егіні әлі жап-жасыл. Дестеде жатып пісіп жетілмесе, қамырлылығы артпай, тұқымға да жарамай қалуы мүмкін. Сондықтан диқандар бітік өскен құнарлы жерлерді дестеге де жығып жатыр. Жауын-шашын мол жылы мұның өзіндік машақаты көп. Дестеде астықтың көктеп кетуі ықтимал. Көктеді-ақ екен, шығыны шаш-етектен.
Облыс диқандары үстіміздегі жылы 4 миллион 379 600 гектар жерге дәнді дақыл тұқымын сіңірген болатын. Бүгінге дейін 3 млн 21,7 мың гектар жердің астығы дестеге түсіріліп, 2 млн 996,3 мың гектар алқап бастырылды. Бұл барлық көлемнің 68,4 пайызы. Гектар берекесі әзірге 10,3 центнерден айналуда. Картоп егілген алқаптардан 9,9 мың гектарынан немесе өнімнің 57,1 пайызы жиналды. Көкөністің 74,9 пайызы қоймаға жеткізілді.
Ауа райы қолайсыздау болғанына қарамастан, облыс диқандары бидайдың әр гектарынан – 10,3, картоптың әр гектарынан – 118,5, көкөністің әр гектарынан 94,7 центнерден өнім жинауда.
Алқаптардағы астықты шашпай-төкпей жинап алу үшін жұмысқа 8,4 мың астық жинайтын комбайн тартылды. Олардың 3518-і өнімділігі жоғары шетелдік техника. Астық тасымалдау біршама ұтымды ұйымдастырылуда. Қырманнан қамбаға дейін 4708 жүк көлігі, 7730 трактор тіркемесі жүйткіп жүр. Қызыл дән 494 механикаландырылған қырманға түсуде. Бұл арада қолбайлау болып отырған түйткіл жоқ.
Күзгі дала жұмыстарын уақтылы өткізу үшін 77,5 мың тонна дизель отыны қажет. Биыл облысқа кепілдендірілген 72 мың тонна дизель отыны бөлінген болатын. Оның қазір 78,8 пайызы немесе 66,1 мың тоннасы ғана жеткізілген. Облыс диқандары күн ашық болса алдағы 8-10 күннің ішінде егін орағын толық аяқтаймыз деп отыр.
Облыс әкімдігі Энергетика министрлігіне және Ауыл шаруашылығы министрлігіне өңірдің тауар өндірушілеріне қажетті 30 мың тонна дизель отынын бөлуді сұрап өтінім жасады. Дизель отыны егінді жинап алуға жеткенімен, ылғал дәнді кептіруге жетпейді. Егер осы көлемде жеткізілсе, астық қабылдау кәсіпорындары мен кептіргіш агрегаттары бар ауылшаруашылық құрылымдарына бөлініп берілмек. Қазір қамбаларға 581 мың тонна дән жеткізілді. Оның 326,7 мың тоннасы жұмсақ және қатты бидай. Бір қуанарлығы, қамбаға түскен астықтың 80 пайызға жуығы үшінші класқа жататын сапалы өнім. Жауын көп болған соң астықтың қамырлылығы азаяды деген күні бұрын айтылған сәуегейлік теріске шықты.
Ақмола облысы
