Президент халыққа Жолдауында айтқан басты бес бағыт еліміздің одан әрі даму жолын көрсеткендей. Яғни заман талабына сай тиімді мемлекет құру; азаматтардың құқықтары мен қауіпсіздігін қамтамасыз ету, қарқынды дамыған және инклюзивті экономика, әлеуметтік жаңғырудың жаңа кезеңі, қуатты өңірлер – қуатты ел.
Президент халыққа Жолдауында қазір елімізде елеулі орын алып отырған бірқатар мәселеге тоқталды. Кейбір кемшіліктер мен қайшылықтарға қарсы тиімді күрес жүргізудің оңтайлы құралы заманауи тиімді мемлекет құру екендігін атап өтті. Әр бағытқа нақты тоқтала келе, төртінші, яғни әлеуметтік жаңғырудың жаңа кезеңі бағытында білім беру сапасының жақсаруы жайлы ой жоспарымен бөлісті. Мемлекеттің дамуында білім беру саласы стратегиялық маңызға ие. Президент Жолдауында ауыл мектептеріндегі білім беру саласын жетілдіру жайлы айтылды. Негізгі мәселе – ауылдық жерлердегі білікті педагог кадрлардың тапшылығы екенін көрсеткен Президент қала мен ауыл мектептері арасындағы орта білім сапасы алшақтап бара жатқанын айтты. Бүгінгі таңда ауыл мектептерінде педагог мамандардың тапшылығы сезілуде. Сол себепті «Дипломмен – ауылға!» бағдарламасын қарқынды жүзеге асыру мәселесі де тыс қалмауы керек. Сонымен қатар еліміздегі жоғары оқу орындары жұмысының сапасын арттыруға күш салу қажет. Президент айтқандай, маман даярлау ісі еліміздегі және ғаламдағы еңбек нарығынан тыс қалмағаны жөн. Жастардың бәсекеге қабілетті, білікті маман болып шығуы үшін жоғары оқу орнындағы білім беру сапасын көтеру ісі басты мәселеге айналуы керек.
Тұңғыш Президент – Елбасы 2019 жылды Жастар жылы деп жариялауына байланысты Президентіміз Қасым-Жомарт Тоқаев та жас ұрпақты қолдау – болашақты қорғау екендігін білдірді. Тәуелсіздік алғаннан бері Елбасының пәрменімен дүниеге келген «Болашақ» бағдарламасы ел жастарына әлемнің үздік оқу орындарында білім алу мүмкіндігін ашып берді. Дарынды ауыл жастарын іріктеп, отандық және шетелдік жоғары оқу орындарына дайындау керек. Мемлекет – оқимын, тоқимын деп талпынған жас азаматтар үшін барлық жағдайды жасап отыр. Тек білім ғана емес, отансүйгіштік рухта тәрибелеу ісін де басты назарда ұстау керек.
Ғылым саласындағы ахуал ерекше назар аударуды талап етеді. Елімізде ғылым саласын қаржыландыру көптеген бастаманың нәтижелі болуына септігін тигізеді. Біз ғылымсыз еліміздің дамуын қамтамасыз ете алмаймыз. Мемлекетте экономика мен ғылым саласында тығыз байланыс орнатылған жағдайда, мемлекеттік ресурстар, қазба байлықтар игеріліп, мемлекеттің пайдасына жүзеге асырылатын болады.
Келесі 2020 жылы мемлекетіміз әлемге әйгілі ғұлама ғалымдар, ұлт ұстаздары әл-Фарабидің 1150 жылдық, Абайдың 175 жылдық мерейтойларын атап өткелі отыр. Ұлтты тәрбиелеймін десек, Абайдың өлеңдерімен, шығармаларымен сусындату керек. Себебі Абай мен әл-Фараби шығармаларындағы адам бойындағы қасиеттер адамгершілік тәрбиесі, еңбек ету, білім және ғылым, адамгершілік рух пен әділеттілік жайлы жазылуы, еңбектерінің өшпес мұра екендігіне кепілдік береді. Президентіміздің халыққа Жолдауындағы бес басты бағыттарының жүзеге асырылуы мемлекетімізді одан әрі дамыта түсетіні сөзсіз.
Айжан АКПАР,
Ш.Уәлиханов атындағы
Тарих және этнология институтының кіші
ғылыми қызметкері
