Бұл шетелде тұратын отандастармен байланыс орнату және нығайту бойынша Қор бағдарламасы сериясындағы төртінші бизнес-форум. Шараның негізгі мақсаты – Ұлыбританиядағы қазақ диаспорасы өкілдерімен іскерлік қарым-қатынас орнату. Форумға Қазақстанның Ұлыбританиядағы елшісі Ерлан Ыдырысов, Дүниежүзі қазақтары қауымдастығы Төрағасының орынбасары Жәнібек Лесбеков, «Отандастар қоры» КеАҚ вице-президенті Мағауия Сарбасов және қазақ диаспорасы өкілдері мен Ұлыбританияда оқып жүрген қазақстандық студенттер қатысты.
Мағауия Сарбасов жиынға қатысушыларды «Отандастар қоры» және Дүниежүзі қазақтары қауымдастығының қызметімен, шетелдегі диаспорамен жұмыс істеу жөніндегі қордың негізгі жобаларының бірі – әлем бойынша Қазақ мәдени-іскерлік үйі желісін құру жөніндегі жоспарымен таныстырды.
Орталық кеңсесі Қазақстан астанасында орналасқан Қазақ мәдени-іскерлік үйі ресми өкілі ретінде шетелдерде тұратын этностық қазақтар тартылатын іскерлік үйлері мен мәдени орталықтар желісін құрады. Олар қазақ мәдениетін, салт-дәстүрін, ұлттық брендтерін дәріптейді және тілді сақтайды. Сондай-ақ қазақстандық экспортты, өнімдерді таратуға атсалысады. Бизнес-келісімшарттар жасауға қатысады, серіктестерді, тың бизнес идеялар мен инновациялық стартаптарды іздейді. Израиль, Армения тәрізді елдерде мәдениетті ілгерілету мен бизнесті дамытуда кеңінен қолданылған бұл ұстаным – диаспора өкілінің білім-білігі мен тұратын елінің тұтыныс қажеттілігі жайлы түсінігін дұрыс бағытта пайдалануда нақты жемісін берген.
Бизнес-форум барысында қатысушылар өзара іс-қимыл, бизнес-бастамаларды ынталандыру және стартаптарды қолдау тетіктерін егжей-тегжейлі талқылады.
Осы жағдайды пайдалана отырып, қор өкілдері қазақ диаспорасы арқылы Ұлыбритания нарығына қазақстандық өнімдерді, атап айтқанда айран, шұбат, қымыз сияқты сүт өнімдерін және еуропалықтардың қызығушылығын тудыратын басқа да өнімдерді шығару мәселелерін талқылады. Сонымен қатар Лондонда «Астана Опера», «Астана Балет», Құрманғазы атындағы оркестр сияқты мәдени және ұлттық брендтерді ілгерілету, диаспора арасында тілді сақтау, сондай-ақ «Абай» мәдени орталығын құру мәселелері қозғалды.
Соңында Қор өкілдері кездесуге қатысушылардың барлығын осы жылдың қараша айында Түркістан қаласында өтетін отандастардың бірінші форумына шақырды.
Лондондағы бизнес-форум Мюнхен, Сан-Франциско, Ыстанбұл және Ташкент қалаларындағы кездесулерден кейінгі бесінші жиын. Түрлі елдерде тұратын отандастармен осындай кездесулерді алдағы уақытта ГФР, АҚШ, ҚХР, Өзбекстан, Түркия және Ресей елдерінде өткізу жоспарда бар. Ал келесі бизнес-форум осы айда Стокгольмде (Швеция) өтеді деп күтілуде.
Дайындаған
Жолдыбай БАЗАР,
«Egemen Qazaqstan»
