– Орал қаласының тарихында тұңғыш рет ұйымдастырылған толық марафонға қош келдіңіздер! Батысқазақстандықтармен бірге марафонға еліміздің 10 қаласынан, Ресейдің 5 қаласынан мыңнан астам адам тіркелді. Бізді қолдауға келген спортшылар Марат Жыланбаев пен Ержан Жаппаровқа алғысымыз шексіз. Бәріңізге сәттілік тілеймін! – деді марафоншыларды құттықтаған облыс әкімі Ғали Есқалиев.
Марафонға қатысушылар жас ерекшелігіне және дайындығына байланысты толық (42.2 шақырым), жартылай (21.1 және 10.5 км), сондай-ақ кішкентай желаяқтарға арналған kids run (440 метр) сайысына қатысты.
Көпшілік спорттық шараға өңір басшысы Ғали Есқалиев пен Орал қаласының әкімі Абат Шыныбеков те қатысты. Сондай-ақ дәл осы марафонға өзге қалалардан онлайн-режімде 100-ден аса желаяқ жүгіріпті.
Облыс әкімінің айтуынша, болашақта осындай сайыстар Оралда көктем мен күзде тұрақты өтіп тұрмақ.
Әйгілі марафоншы Марат Жыланбаев атап өткендей, жүгіру – ең демократияшыл спорт, өйткені бұған арнайы зал, ғимарат, спорттық құралдар керек емес.
«Aqjaiyq marathon-2019» шарасының қорытындысында 42,2 шақырымдық толық марафон сайысында ерлер арасында қостанайлық Александр Савгуров, әйелдер арасында алматылық Диана Айдосова жеңімпаз атанды. 21,1 шақырымдық жартылай марафонда орынборлық Алексей Ширшов пен алматылық Дана Гусарова үздік шықты. Ал 10,5 шақырымдық сайыста Ислам Аманғос пен Екатерина Грецай (екеуі де қостанайлық) жеңіске жетті.
Батыс Қазақстан облысы
