Елдің маңдайалды ақсақалы Тілеуберген Құдайбергенұлын жас-кәрі бәрі таниды. Ешкім алдын кесіп өтпейді. Ақсақалдың айтуынша, бір атадан жалғыз. Құдай: «Он бала берейін бе, он балаға татитын бір бала берейін бе?», дейді екен пендесіне. Міне, сол он балаға татыған жан Тілеукең. Әкесі Құдайберген үш жасында ер тұрманды әкелуге жұмсағанда шешесі Хатша: «Әлі кішкене емес пе? Буыны қатпаған баланы ауыр нәрсеге жұмсамаңызшы» дегенде әкесі: «Өмірге бейім болып, пісіп-жетілсін! Ұлымда шаруаң болмасын!» деп қатты тыйып тастапты. «Осы сөз менің өмірлік бағыт-бағдарымды айқындады. Ешқашан да ауыр жұмыстан қашқан емеспін. Соның арқасында қазір біздің жиһаздарымызды Италияға дейін үлкен сұраныспен алып жатыр. 280 ауылдасымды жұмыспен қамтып отырмын» дейді Тілеуберген Құдайбергенұлы.
Жуырда Шорнақ ауылындағы Айтжанов атындағы мектепте белгілі кәсіпкер Тілеуберген Құдайбергенов атындағы ағылшын пәніне арналған бөлме ашылды. Жергілікті жиһаз өнімін Қазақстаннан тыс Еуропа елдері де қызыға сатып алып отырған кәсіпорынның атағы алысқа кеткен. Алтын сапаға сай өнімімен ғана емес, өзінің үлгілі отбасы ретіндегі меценаттық істерінің өзі бір кітапқа жүк боларлық отағасы Тілеуберген Құдайбергенов БҰҰ «Құрмет белгісі» орденінің Қазақстандағы тұңғыш иегері, Оңтүстік Қазақстан облысының, Түркістан қаласының құрметті азаматы.
Тілеуберген Құдайбергенұлы – Айтжанов атындағы мектептің тұрақты демеушісі. Өткен жылы отыз баланы қыс қарсаңында жылы киіммен қамтамасыз етсе, биыл да тұрмысы төмен отбасыларындағы елу баланы киіндіруге қам қылып отыр. Батыр тұлғалы, етек-жеңі кең, алақаны ашық, нағыз даланың сал-серісі деуге тұрарлық, еңбегінің зейнетін көріп отырған ақсақал, ағылшын тілі бөлмесінің төрінен орын алып, нық отыр. Бүгінде жасы сексенге келіп қалса да, әлі ширақ ақсақалды құттықтап Қызылорда өңірінен келгендер де бар.
Полиция полковнигі Төребей Сапарбаевтың айтуынша, Тілеукең өз қаржысына осы Шорнақтан «Сунақ ата» мешітін салдырған. Өңірдегі барлық мерекелік шараның демеушілігін көтереді. Ары да, дені де, жүрегі де таза, ақкөңіл ақсақалдың дария дарқан мінезін көпшілік сүйеді. Құрметтейді. Қонақтарын қапсыра құшақтап, күректей алақанымен қыса отырып «Еңбектің арқасында осы қолымды Нұрсұлтан Назарбаев, Ислам Кәрімов, Асқар Ақаев қысқан», деп марқайып отырады.
Қазіргі таңда 300 орындық мектепте 748 бала оқуда. Мектеп директоры ауыл ақсақалдарының басын қосып, өз күштерімен 200 орындық бастауыш мектептің сметалық жоспарын жасап қойғанын хабарлады. Алайда, Шорнақ ауылдық округінде 4 мектеп пен бір мектеп-интернат болғанымен соңғы жылдары өңірге көшіп келушілер мен бала туу санының артуына орай, ол да тарлық ететін түрі бар. Осыны ақылдаса келе ауыл ақсақалдары 1200 орындық зәулім мектеп салдыртуға бәтуаласты. Себебі Түркістан облыс орталығы болғандықтан оған іргелес ауылдар да заманауи деңгейде дамуға тиісті. Оның сыртында алдағы бес-он жылда қанатын кеңге жайған Түркістанға он шақырымдағы қосылғалы тұрған ауылдың инфрақұрылымы жоғары болуы керек. Ауылдың қарқынды дамуына Түркістанның қасында болуы, Батыс Еуропа – Батыс Қытай халықаралық автожолының әрі темір жол стансасының жақындығы ықпал етеді. Сырдарияның тиіп тұрғанының да жыл бойы жасыл желекке бөленуіне игі әсері бар. Еңбекшіл адамның ісі табысқа бастайтындығын имани әрекеттерімен өнеге көрсетіп отыр. Еуразиялық құрлықтағы Қазақстанның ағылшын тілінсіз әлемдік жаһандану үдерісіне еркін кіре алмайтынын ұққан шорнақтықтар арнайы бөлмені жабдықтауды Тілеуберген Құдайбергенұлына тапсырған еді. Оны тиянақты атқарған жанға ауылдастары дән риза. Ауылдастарының құрметіне бөленген ақсақал да қазақы шапан киіп, марқайып қалды. «Бір адам қазған құдықтан мың адам су ішеді» деген міне, осы.
Ескендір ЕРТАЙ
Түркістан облысы,
Шорнақ ауылы
