Тарихқа толы Тарбағатай өңірінің асқақ Алтаймен жапсарлас жатқан бай мұрасы хақында жарық көрген кітаптың төртінші томы Қазақстан Жазушылар одағының төрағасы Ұлықбек Есдәулеттің осындай кіріспе сөзімен ашылыпты. Күні бүгінге дейін төрт томы жарық көрген «Тарихқа толы Тарбағатай» альманағының шығарушысы Tas Group компаниялар тобының негізін қалаған, TasCredit қаржы компаниясының басшысы, Assyltas қоғамдық қорының президенті Дулат Тастекеев. Мақсатын «Тарбағатайдың қатпарлы тарихына үңілу, әр жусанынан, ескен желінен, аққан суынан сыр аңдау және де өңірдің жұмбағын ашу, ұрпағына өз өлкесінің киесін, қасиетін ұғындыру» деген пікірімен айшықтап, осы жобаның үлгісімен әрбір өлкенің белсенді азаматтары туған өңірі жайлы қызықты жазбалалар беретін парақша ашса, сөйтіп Қазақстанның бүкіл аумағында өлкетану ғылымы жанданып, экотуризм дамыса» деген ойын тұрақты назарда ұстап келетін іскер азамат бұл жолы да туған жердің тереңдегі тарихына үңіліп, ел тарихына деген құрметін мазмұны терең кітапқа сыйғызғандай...
Жеті бөлімнен тұратын кітапта тарихы Тарғытай бабасымен байланыстырылатын киелі мекеннің сарқылмайтын сан алуан байлығы паш етіледі. Археолог Ерден Оралбай құрастырған тарихи том көне заман ескерткіштері, археологиялық зерттеулер барысы, ғалымдардың зерттеу мақалалары, өңірдің іскер азаматтары туралы мәліметтермен толыққан. Ал өңірде әлі де сыры мен жұмбағы ашылмаған ескерткіштер баршылық. Тарбағатайдың күнгейі мен теріскейі, Жоғары Ертіс өңірінің ХХ ғасыр басына дейінгі жекелеген тарихына қатысты тың мағлұматтар әлі толығымен жария етілген жоқ.
Туған өлкесін дәріптеуді әр кез назарда ұстап жүретін ұлтжанды азамат бұл жолы Ақсуат ауылында үш мәрте өткен ақындар айтысының толық мәтінін «Туған жерге туыңды тік» кітабына топтастырып шығаруды да мақсат етіпті. Ақсуат айтысының асыл арнасы жайында сөз еткен ақын, Қазақстанның еңбек сіңірген қайраткері Жүрсін Ерман «Осыдан үш жыл бұрын қанатын қаққан бұл жоба келесі жылы-ақ халықаралық мәртебеге ие болды. Жыл сайын шілде айының соңында Қазақстанның әр аумағынан айтулы ақындар Ақсуатқа ат басын бұрады. Жыр жәрмеңкесінде ақындар Ақсуат аймағының арғы-бергі тарихын телегей жырға айналдырып, тереңнен ой қозғайды. Соған лайық осы өңірді мекендеген Мұрын ананың ұрпақтарының бүгінгі қажырлы еңбегі, қайратты қимылы ауыз толтырып айтуға молынан жетеді» деген жүрежарды жолдарынан кітаптың мазмұнына тереңдей түсесіз. Жыр-шумақтарды шашау шығармай жинақтаған ақын Серік Қалиев. Ақындардың жыр-шумағына арқау болған жер-су аттары мен аймаққа әйгілі тұлғалар туралы мәліметтер де кітаптың ажарын ашып, мазмұнын байыта түседі. Сондай-ақ шырайлы шумақтардың иесі ақындардың өмірдерегінен де қысқаша мәліметтер берілген.
Кітаптың таныстырылымына қазақтан шыққан тұңғыш Олимпиада чемпионы Ә.Жармұхамедов, ақын Ж.Ерман, Қазақстан Жазушылар одағының төрағасы Ұ.Есдәулет, ұлағатты ұстаз О.Қарабалина қатысты.
АЛМАТЫ
