Осы айтулы жоба аясында Шымкент қаласындағы мектептердің 6-10-сынып оқушылары арасында республикалық «Тұлпар мініп, ту алған!» байқауы өтеді. Бұл туралы қалалық әкімдіктің ақпараттық-коммуникация орталығында өткен баспасөз брифингінде айтылды.
Байқау қарсаңында Шымкент қаласындағы С.Ерубаев атындағы №24 мектеп-лицейде «Тұлпар мініп, ту алған!» байқауының таныстырылымы болды. Жиынға қала мектептерінің қазақ әдебиеті пәнінің мұғалімдері мен сайыс үміткерлері қатысты. Бүгінде аталған додада бақ сынауға қаладағы 116 мектептен 1094 оқушы, 610 мұғалім ниет білдірген. Байқаудың аудандық іріктеу кезеңдері 28-31 қазан аралығында, қалалық кезең 6 қараша күні өтеді деп жоспарлануда.
«Қатысушылар жырды толық жаттап, көнерген сөздердің мағынасын түсіндіруі тиіс. Сондай-ақ әдебиет пәнінен қойылатын сұрақтарға жауап береді. Қалалық кезеңде 4 ауданнан 3 оқушыдан іріктеліп, 12 қатысушы бақ сынайды. Биыл «Тұлпар мініп, ту алған» байқауында оқушылар 132 бет, 5206 жолдан тұратын «Қобыланды батыр» жырының Марабай жырау нұсқасын жатқа айтпақ. Іс-шараның таныстырылымына келген үміткерлердің арасынан 100 бетке дейін жаттаған оқушылар іріктеліп, дайындығы пысықталды», деді «Qazaq Epos» қоғамдық қорының Шымкент қаласы бойынша ұйымдастыру комитетінің жетекшісі Кенжебай Нұрдәулет.
Биыл жоба республикалық ауқымда өтуде. Жеңімпаз 1 миллион теңге жүлдеге ие болады. 2-орынға – 600 мың, ал 3-орынға 300 мың теңге беріледі.
Өскелең ұрпақты халық поэзиясына, қазақ халқының рухани асыл мұрасына деген сүйіспеншілікке және патриотизмге тәрбиелеуге шақыратын байқауға ниет білдірген жас өскіндердің қатары жыл өткен сайын артып келеді. Жас буынды елдік пен ерлік рухқа, намысшылдық, қайсарлық қасиеттерге баулу керек дейді ұйымдастырушылар.
ШЫМКЕНТ
