Ал жаза бер!
Менде қанша өмірбаян бар дейсің,
Арманы өлең, сүйгені күй мен ән дейсің.
Өзін өзі өртеп жүрген жан дейсің,
Жүрегі жомарт, ниеті әппақ таң дейсің.
...Қағазды жай, қаламыңды ал қолыңа,
Анкетаның әрбір үңіл жолына,
Айтқанымның бәрін толтыр торыңа.
Адам деп жаз, анықтап жаз оны да,
Ақын деген сөзді тірке соңына.
Жақында Өскемендегі Пушкин атындағы облыстық кітапханада кезінде осылайша жыр толғаған сыршыл ақын, Хамит Балшабековтің 80 жылдығына орай «Таулар ұйықтамайды» атты кітабының тұсаукесер рәсімі өтті. Салтанатты шара барысында сөз алған Қазақстан Жазушылар одағы облыстық филиалының директоры Әлібек Қаңтарбаев «Шығыстың Мұқағалиы» атанған, Тарбағатайдың тумасы Хамит ақынның шығармашылығына, тағдырына тоқталып: «Хамаңның өмірден өткеніне 12 жыл болса да, жырсүйер қауымға қалдырған мұралары аз емес. Ақынның кешін кітапхананың кішкентай залында емес, облыстық театрдың үлкен залында өткізсек те артық емес еді. Өйткені Балшабеков осындай құрметке лайық ақын. Мен білетін бір шындық бар. XX ғасырдың екінші жартысында Шығыста Хамиттан асқан ақын болған жоқ. Хамит ағаның бір ерекшелігі, оның поэзиясында саясат жоқ. Хамиттың өлеңдері тұнып тұрған лирика» деді.
Реті келгенде айта кетейік, ақынның «Таулар ұйықтамайды» кітабына ғалым Айжан Қартаева редакторлық етсе, туындының жарық көруіне күйші Шалқар Рысқанов ұйытқы болыпты. Қайрат Малғаждаров, Зиядан Бекзадаұлы, Ершікен Ыдырышев, Дәурен Малғаждаров сынды азаматтар демеушілік жасапты.
ӨСКЕМЕН
