Аймақтар • 01 Қараша, 2019

Шаһарлар шырайы кіреді

21 реткөрсетілді

Келесі жылдан бастап Қарағанды облысында жергілікті қалалардағы тұрғын үйлердің қасбеттері жөнделе бастайды. Бұл туралы аппарат жиналысында өңір басшысы Жеңіс Қасымбек мәлімдеді.

Қазіргі таңда Сенаттың қа­рауына жіберілген «Тұрғын үй қатынастары туралы» Заңға ен­гізіл­ген түзетулерде пәтер иелері кооперативтерін тарату, үйлерді қалыпты жағдайда ұстап тұру үшін жинақ шоттарын ашу, сон­дай-ақ қалалық және облыстық бюд­жет есебінен көпқабатты үй­лер­дің қасбеттерін жөндеуді қар­жы­ландыру қарастырылғаны бел­гілі. Осы жайтты ескерген облыс басшысы келесі жылдан бас­тап шаһарлардың проблемалық не­гіз­гі көшелерінде жұмысты бастап кетудің жоспарланғанын айтты.

– Бұл бізге ғимарат қасбеттері бойынша белсенді жұмыс істеуге  мүмкіндік береді, жинақ шоттарын ашуды және жөндеу жұ­мыс­тарына бюджеттен қаржы бөлу­ді қарастырады. Бұрын бұл жұ­мыстарды атқару үшін деме­у­шілерді іздестіруші едік, ал қазір мұны қала немесе облыс есебінен іске асыра алатын болдық, – деген Жеңіс Қасымбек қала басшыларына он күн ішінде үй қасбеттерін бірінші кезекте жөндеуді қажет ететін проблемалық көшелердің тізімін беруді тапсырды.

Шынында да Қарағандыдағы және облыстың басқа да қала­ларын­дағы үйлердің сүйкімсіз сұрғылт түсі адамның еңсесін басып тұрушы еді. Енді олар түрлі-түсті, көз қуантатын түстерге боя­лып, сырланатын болғаны бөрік­ті аспанға атып шаттандыр­маса да, қуанарлық жаңалық. Әрине бұдан қарапайым тұр­ғын­дардың тірлігі оңалып, жағ­дайы жақ­сарып кетпесі белгілі. Де­ген­мен айналаңдағы, өзің тұрып жатқан қаланың көшелеріндегі  кемпірқосақтың түсіндей көңілге қуаныш сыйлар бояулардың болғаны қандай жақсы!

Жалпы, экономикасы дамыған елдерде тұрғызылғанына жарты ғасырдан асып кеткен тұрғын үйлер тып-типыл болып сырылып, олардың орнына жаңасы салы­натынын біз жақсы білеміз. Біз­дің де осы күндерге түбі жете­тіні­міз анық. Әзірге жауырды жаба тоқып, еңсені түсіретін ең бір сұрқай түс – сұр бояулардың көзін жойсақ, мұның өзі үлкен жеңіс болар еді. 

Статистикалық деректерге сүйенсек, облыстағы 5815 көп­қабатты тұрғын үйдің қасбеті жөндеуді қажет ететін көрінеді. Бұлардың басым көпшілігі ел арасында «Хрущевка» аталып кеткен қарасұр түсті үйлер болар деп батыл жорамал жасауға болады. Сондай-ақ бұл тізімге Сталин заманында салынып, сырты сатпақ-сатпақ болып тұрған ескі үйлерің кіруі де әбден мүмкін...

Қасбеті әрленіп-сырланып, әдемі кейіпке енген үйлердің ту сыртын да, яғни аула жаққа қ­а­рай­тын бетін де жағдай жақ­сарған кезде көңілді түстерге бояп қоюды ұмытпау керек. Сонда ғана облыстағы қалаларды келген қонақтарға ұялмай көрсетуге болады. Яғни таяқтың екі ұшы барын ұмытпаған жөн.

 

Қарағанды облысы

 

Соңғы жаңалықтар

Оқырманмен ой бөлісті

Руханият • Кеше

«Бір сынаған жаманды...»

Аймақтар • Кеше

Ел игілігін еселеген жан

Руханият • Кеше

Теңгенің тегеуріні

Қаржы • Кеше

Сенім капиталы

Экономика • Кеше

Ұқсас жаңалықтар