КӨМЕК КЕРУЕНІ ТОЛАСТАМАУДА

Ағайынның қадірі басқа қиын күн туғанда білінеді емес пе? Ақсу ауданының Қызылағаш ауылында болған тасқыннан зардап шеккен жұртшылықтың бұл ақиқатқа көзі жете түскендей. Мәселен, Алатау­дың арғы бетін жайлаған қырғыз бауырларымыз 20 наурыз күні 9 “КамАЗ” көлігімен көмектерін ал­ып жетті. Қырғызстанның Төтенше жағдайлар министрінің орынбасары Ақыл Айтбаев бастаған бір топ аза­мат пешпен жылытылатын па­лат­калармен қоса цемент пен ши­фер си­яқ­ты құрылыс материал­дарын әкеліпті. Ал 21 наурыз күні Талды­қорған қаласына Қазақстан халқы Ассамблеясының құрамын­да­ғы республикалық этномәдени ор­талықтардың көмек керуені ат­басын тіреді. Ең бірінші кезекте қажет азық-түлік пен киім-кешек, оқу құрал-жабдықтары мен малға құрама жем жеткізген бұл керуенді Қазақ­стан халқы Ассамблеясы Төраға­сының орынбасары – хатшылық меңгерушісі Ералы Тоғжанов бастап келді. Ағайынның басына түскен ауытпалықтан шет қала алмаған “Еврей мәдени орталықтарының “Мицва” ассоциациясы” қоғамдық бірлестігінің президенті Александр Барон мен дұнған этномәдени бір­лестіктері ассоциациясының пре­зи­денті Хусей Дауров, “Қазақ­стан не­містерінің “Возрождение” қоғам­дық бірлестіктері” заңды тұлғалар бірлестігінің төрағасы Александр Дедерер, “Ахыска” түрік орталығы” қоғамдық бірлестігінің төрағасы Зиятдин Касанов, Қазақстан ко­рей­лері ассоциациясының прези­денті Роман Ким, “Барбанг” күрд ассоциациясының төрағасы Князь Мирзоев, Қазақстан халқы Ассам­блеясынан Парламент Мәжілісінің депутаты Леонид Питаленко, “Қа­зақстанның тәжік мәдени-қо­ғам­дық бірлестіктері ассоциациясы” қо­ғамдық бірлестігі төрағасының орынбасары Бекпулат Ташпулатов, “Әзірбайжан мәдени-қоғамдық бір­лестіктер конгресі” заңды тұлғалар бірлестігінің президенті Абилфас Ха­медов, Қазақстан халқы Ассам­блеясынан Парламент Мәжілісінің депутаты Людмила Хочиева, Бе­ла­русь этномәдени бірлестігі төра­ға­сының орынбасары Петр Цеховой, “Республикалық ұйғыр мәдени ор­талығы” қоғамдық бірлестігінің төрағасы Ахметжан Шардиновтар 22 наурыз күні Қызылағаш ауы­лын­да тасқыннан қаза болғандарға арнап құран оқытып, ас берді. Кең жайылған дастарқан басында ағайынды сабырға шақырып, олардың қиыншылықта жалғыз қалмайтындықтарын сезіндірді. Ағайындық сыналар сәтте әсі­ресе, түрік пен әзірбайжан бау­ыр­ларымыз айрықша жанашырлықта­рымен танылды. Олар екі бірдей жүк көлігінде қыруар затпен қоса көмек қорына 9 миллион теңге кө­леміндегі қаражат қосатын­дықта­рын жеткізді. “Ахыска” түрік орта­лығы” қоғамдық бірлестігінің тө­р­а­ғасы Зиятдин Касанов пен “Мем­лекеттік тілге құрмет” бірлестігінің төрайымы, “қаным әзірбайжан бол­ғанымен, жаным қазақ” дейтін Асылы Осман жүрекжарды тілек­терін айтқаннан кейін Алматы облыстық мәслихатының депутаты, кәсіпкер Үсейн Касанов жаңағы аталған қаржыға Қызылағашқа көпшілікке арналған монша салып беретіндіктерін жеткізді. – Дана қазағым “қайғыны бө­ліс­се жеңілдейді” дейді ғой. “Өмір қымбат, бірақ бәрінен де көңіл қымбат” деген тағы бір ғажап сөз бар. Сол айтқандай, біз бәріміздің қабырғамызды қайыстырған осы бір қайғыны бөлісіп, аз да болса жеңілдету үшін келіп отырмыз, – деді Асылы Әлиқызы. – Қандас­тарымыз қазақтың бізге жасаған жақсылығын ешқашан ұмытпайды. Ендеше бүгінгі күні біз де аянып қа­лайын деп отырған жоқпыз. Бір Ал­маты облысының ғана емес, Шым­кент пен Жамбылдың, тіпті бүкіл Қазақстанның түрігі мен әзірбай­жа­ны осынау игілікті іске өз үлестерін қосуда. Қысқа жібі күр­меуге келмей жүргендерінің өздері де қолдағы барын беруде. Көр­се­тілген бұл көмекті біздің қазақ хал­қына деген ыстық ықыласымыздың бір белгісі деп қабыл алса екен деймін. Қызылағаштық тұрғындар қа­на­тымен су сепкен қарлығаштай бо­лып көмек қолын созған ағайынға шын көңілден шыққан алғыстарын білдірді. Бүгінде Қызылағаштағы бірлік біртіндеп қалпына түсіп келеді. Ау­ылға қайтып оралғандар палаткадан жасалған уақытша қалашыққа ор­наластырылды. Небары үш айдың ішінде салынып бітуі тиіс үйлердің алғашқы қазығы қағылып, құрылыс шындап қарқын ала бастады. Бү­гінде бұл жұмыстармен 47 құрылыс мекемесі айналысуда. Бірнеше күн бұрын тасқын су алып кеткен көпір қайта салынып, қатынас қалпына келтірілді. Облыс басшылары құ­ры­лыстың тоқтаусыз жүріп, зардап шек­кендердің ештеңеден таршы­лық көрмеулері үшін қолдан кел­ген­нің бәрін жасауда. Көмек ке­руе­ні болса, тоқтаусыз ағылу үстінде. Күмісжан БАЙЖАН, Алматы облысы.