Қоғам • 13 Қараша, 2019

Үмітіңді үзбе, үлескер...

450 рет
көрсетілді
3 мин
оқу үшін

Орталық коммуникациялар қызметі алаңында елордадағы үлескерлік құрылыс пен тұрғын үй қолжетімділігі туралы баспасөз мәслихаты өтті. Оған Нұр-Сұлтан қаласы әкімінің орынбасары Алтынбек Қайсағалиев, Индустрия және инфрақұрылымдық даму министрлігінің Құрылыс және тұрғын үй-коммуналдық шаруашылық істері комитетінің төрағасы Мархабат Жайымбетов қатысты.

Үмітіңді үзбе, үлескер...

– Елордадағы өзекті мәселе­нің бірі – үлестік құрылыс. Тұр­ғын­дар­дың оған зор қызығушылық танытуының бірден-бір себебі – үлеске қатысқан кездегі пәтер құны­ның төмендігі. Солай бола тұра оның қауіп-қатері де бар. Мәселен, құрылыс мерзімінің ұзаққа созылуы немесе компания басшылығының үл­ес­керлерді алдап кетуі сынды жағым­сыз жайттар тіркелуде. Соның сал­дарынан дауға қалған ны­­сандар пайда болады, – деді Алтынбек Қайсағалиев.

Қала әкімі орынбасарының айтуынша, бүгінгі таңда мемлекеттік органдардың жəне тұрғын үй-құ­рылыс кооперативтері төра­ға­ла­ры­ның жұмысы нəти­же­сінде сондай 51 нысан 48-ге дейін азайды. Бұл – 13054 үлескер үміт еткен 71 тұрғын үй. 3 нысан пайдалануға беріліп, тағы 7 нысан жыл соңына дейін пәтер иелеріне табысталмақ. Сондай-ақ 2660 үлескердің тағатын тауысқан 19 нысан бойынша іс-қимыл жоспарлары айқындалды. Бұл жұмыстар инвесторларды тарту арқылы дербес жүзеге асырылады. Ал 10394 үлескерді үздіктіріп, айрықша мәселеге айналған 29 нысан құрылысы мемлекеттік «Нұрлы жер» бағдарламасы аясында аяқ­та­ла­ды.

Оған Ұлттық қордан мемлекеттік бағдарлама шеңберінде 40 млрд теңге қарастырылыпты. Əкімдіктің уəкілетті ұйымы саналатын «Елорда құрылыс компаниясы» ЖШС оның 6 млрд теңгесін игерсе, жыл соңына дейін тағы 14 млрд теңге тиісінше жұмсалмақ. Қалған 20 млрд теңге 2020 жылдың бірінші жартыжылдығында игерілетін болады. Сөйтіп алдағы 3-4 жыл мұғдарында дауға айналған нысандар құрылысын толық аяқтау жоспарланып отыр. Бұл мақсатта биыл 10 көпқабатты тұрғын үйдің құрылысы аяқталса, 2020 жылы – 20 нысан, 2021 жылы – 7 нысан, 2022 жылы – 9 үй, 2023 жылы 4 нысан құрылысы тәмамдалады.

Қала әкімінің орынбасары кей нысандардың жобалық-сметалық құжаттамасыз тұрғызылғанын да тілге тиек етті. Сондай-ақ сараптама қорытындысы мен қаржылық-техникалық аудиттік болмауы да жұмысты жүйелі жүргізуге көп кедергі келтірген екен. Алтынбек Қайсағалиев келешек үлескерге кеңес ретінде алдымен Нұр-Сұлтан қаласы əкімдігінің ресми сайтына кіруді, құрылыс салушыларға ақша тартуға берілген рұқсат туралы мəліметтермен танысуды ұсынды.

– Қазақстанда қабылданып жатқан мемлекеттік қолдау шаралары тұрғын үй-құрылысының белсенді дамуын қамтамасыз етті. 2005 жылдан бастап бірнеше мемлекеттік бағдарламаны іске асыру нәтижесінде жаңа тұрғын үйлерді қолданысқа беру көлемі артты. Еліміз егемендікке қол жеткізгелі бері барлығы 141 млн шаршы метр тұрғын үй бой көтеріп, 1 млн 300 мың адамның баспана мәселесінде жағдайы жақсарды. Нәтижесінде, кейінгі 10 жылда 1 қазақстандық азаматтың баспанамен қамтылуы 31%-ға ұлғайып, 21,9 шаршы метр­ге жетті. Түпкі мақсатымыз – 2030 жылға дейін бұл көрсеткішті 30 шаршы метрге жеткізу, – деді Мархабат Жайымбетов.