Ауған әйелдеріне арналған бағдарлама

Іс-шараға Қазақстан Сыртқы іс­тер министрінің орынбасары Роман Василенко, Өзбекстан Сыртқы істер министрі Абдулазиз Камилов, Ауған­станның ЕО жанындағы елшісі Нази­фулла Саларзай, Еуропа сыртқы іс-әрекеттер қызметінің басшылығы, Ха­лық­аралық даму және ынтымақтастық жөніндегі Еурокомиссияның Бас директоры, сондай-ақ БҰҰ ДБ мен БҰҰ Әйелдер ұйымы өкілдері қатысты.

Р.Василенко өз сөзінде Ауғанстандағы тұрақтылықты  нығайтуға жәрдемдесу және Орталық Азиядағы өңірлік бейбіт­шілік аймағын қалыптастыру Қазақ­станның сыртқы саясатының маңызды басымдықтарының бірі болып табылатынын тағы да растады.

ЕО, Қазақстан және Өзбекстанның үшжақты білім беру бағдарламасы ауған әйелдерінің құқықтары мен мүмкін­діктерін кеңейтуді қолдау арқылы осы мақсатқа қол жеткізуге ықпал етуі тиіс.

Осы бастама аясында 2025 жылға дейін Қазақстанның жоғары оқу орындарында Ауғанстанның 40 студентін оқыту жоспарлануда. Оқыту ауыл шаруашылығы, қолданбалы статистика және тау-кен ісі сияқты мамандықтар бо­йынша жүзеге асырылады. Тағы 10 қыз Өзбекстанда ауыл шаруашылығын меңгеретін болады.

Р.Василенко ЕО-ға осы бағдарламаны іске қосу жөніндегі қазақстандық ұсы­нысты қолдағаны үшін, атап айт­қанда оны қаржыландыруға 2 млн еуро бөлгені үшін алғысын білдірді. Ол сондай-ақ БҰҰ ДБ мен БҰҰ Әйелдер ұйымына бағдарламаның практикалық имплементациясын өз мойнына алғаны үшін ризашылығын жеткізді.

Оның айтуынша, «бағдарлама Орта­лық Азия елдерінің ынтымақтастық пен өзара түсіністіктің жаңа көрінісі аясында өңірдің ортақ дамуы үшін тиімді шешімдерді бірлесіп ұсынып және оны жүзеге асыра алатынының тамаша үлгісі болып табылады». Сонымен қатар бұл бастама Брюссель мен Орталық Азия астаналарының Орталық Азия бойынша Еуроодақтың жаңа Стратегия­сын іс жүзінде іске асыру бойынша тиім­ді шешімдер ұсынуға дайындығын көрсетеді.

Қазақстандық дипломат қыркүйекте Нью-Йорктегі БҰҰ БА-ның 74-ші сессиясында сөйлеген сөзінде Президент Қасым-Жомарт Тоқаев Алматыда өз қыз­метімен Орталық Азияны да, сондай-ақ Ауғанстанды да қамтитын Тұрақты даму мақсаттары бойынша Өңірлік орта­лық құруды ұсынды. Бүгінде іске қосыл­ған бағдарлама он жеті мақ­саттың алта­уын – сапалы білім (4-мақ­сат), гендерлік теңдік (5-мақсат), ла­йық­ты жұмыс және экономикалық өсу (8-мақсат), теңсіздікті азайту (10-мақ­сат), бейбітшілік, әділ сот және тиімді институттар (16-мақсат) және тұрақты даму мүддесіндегі әріптестікті (17-мақсат) қамтиды.

«Біз алдағы уақытта бұл бағдарлама өзінің құндылығы мен табыстылығын дәлелдейді деп үміттенеміз, бұл, бұрын жоспарланғандай, оны кеңейтуге бағыт­талған жұмысты жүргізуге мүмкіндік береді. Ол Еуразиядағы, Орталық Азия­дағы, Еуропалық одақпен, әсіресе Ауғанстанмен ықпалдаса отырып оған қа­тысты ынтымақтастықтың жаңа те­тік­­терінің прототипіне айналады деп се­неміз», деп мәлімдеді министрдің орынбасары.

А.Камилов та, Р.Василенко да өз баян­дама­ларында халықаралық қоғам­дас­тықты Ауғанстанды проблема ретін­де емес, жаңа мүмкіндіктер көзі ретінде қа­рас­тыруға шақырғанын атап өткен жөн.

Іс-шара аясында Еуропалық сыртқы іс-әрекеттер қызметі, БҰҰ ДБ және басқа да құрылымдар атынан, сондай-ақ Ауған­станның ЕО жанындағы елшісі атынан сөйлеген сөздерінде осы бағдар­ламаның бастаушысы болып, іске асырғаны үшін Қазақстан мен Өзбекстан тарапына жо­ғары баға мен алғыс сөздер айтылды. Қазақ­станның 2017-2018 жылдары БҰҰ Қауіп­сіздік Кеңесіне мүше болған кезінде, әсі­ресе 2018 жылғы қаңтарда ҚК-дегі төр­аға­лығы шеңберінде Ауғанстанды тұ­рақ­тан­дыруға қосқан үлесі ерекше атап өтілді.

Салтанатты шара аясында БҰҰ Даму бағдарламасы ауған қыздарының тарихын баяндайтын, сондай-ақ олардың Қазақ­станда алатын білімінің алдағы уақыт­та үлкен мүмкіндіктер ашатыны туралы сұхбаттарын көрсететін бейне-ролик ұсынды.