Қоғам • 20 Қараша, 2019

Worldskills kazakhstan 2019: Ең үздік кәсіптік мамандар анықталды

20 реткөрсетілді

Елордада «WorldSkills Kazakhstan 2019» республикалық кәсіби шеберлік чемпионаты өтті. Білім және ғылым министрлігі мен «Кәсіпқор» холдингі» коммерциялық емес акционерлік қоғамы бірлесіп биыл бесінші рет ұйымдастырған додаға еліміздің 17 өңірінен келген үздіктер қатысты.

Бір аптаға жалғасқан жарыс­тың апта басындағы ашылуында сөз алған Білім және ғылым министрі Асхат Аймағамбетов чем­пионаттың ел экономикасы үшін маңызы зор екенін атап өтті. «Бұл еліміз үшін өте ма­ңызды іс-шара. Президент Қасым-Жомарт Тоқаев білім саласына өте үлкен көңіл бөледі. Қа­былдауы кезінде Мемлекет бас­шысы техникалық және кә­сіп­тік білім саласын дамыту бо­йынша нақты тапсырмалар бер­ді. Соның ішінде WorldSkills қозғалысын дамыту мәселесін де көтерді. WorldSkills мамандығын білім бағдарламаларына енгізу мәселесі – біздің алдымызда тұрған басты мақсат», деді министр.

Конкурсқа қатысушылар «Кір­­піш қалау», «Плиткамен қап­тау», «Құрғақ құрылыс және сылақ жұмыстары», «Сырлау және сәндік жұмыстары», «Сан­­­техника және жылыту», «Элек­тромонтаж жұмыстары», «Ағаш ісі», «Дәнекерлеу техно­логиясы», «Электроника», «Сан­дық бағдарламалық басқа­руы бар станоктар токарлық жұ­­мыс­тары», «Көрнекі мерчен­дайзинг және витринистика», «Жеңіл автомобильдерді жөн­деу және қызмет көр­сету»,­ «Ку­зовты жөндеу», «Про­тотип­теу», «Шатыр жұмыс­тары», «Ме­ха­троника», «Зертханалық және химиялық сараптау», «Веб дизайн және әзірлеу», «Графикалық дизайн», «Желілік және жүйелік басқару», «CAD инженерлік гра­фи­касы», «Бизнеске арнал­ған IT шешімдер», «Ұялы робо­т­техника», «Ақпараттық-кабель­дік желілер», «Интернет заттар», «Өндірістік автоматика», «Ұш­­қышсыз ұшу аппараттарын­ басқару», «Мейрамханалық қыз­мет көрсету», «Кондитерлік ісі», «Аспаз ісі», «Наубайхана ісі», «Қонақүйді басқару», «Ме­ди­циналық және әлеуметтік күтім», «Шаштараз өнері», «Сән тех­нологиясы», «Мектепке дейін­гі оқыту», «Бастауыш сыныптар­да оқыту», «Флористика» сияқты кәсіптік мамандықтар бойынша сайысқа түсті.

Жас мамандарды экономика­ның өндірістік секторына тартуға, елдегі техникалық және кәсіптік білім беруді дамытуға ықпал етуді мақсат тұтқан жарысқа 18 бен 22 жас аралығындағы колледж және жоғары оқу орындарының сту­денттері, кәсіпорындардың жас қызметкерлері қатысып, олар­дың жұмыстарын 500-ге жуық сарапшы бағалады. «Жас­тар шеберліктерін жақсы көр­сетті. Біздің колледж үш жыл­дан бері қатысып келеді. Қатысу­шыларымыз әр жылы жүл­делі болады. Осы жолы үш студентіміз жарыстың CAD ин­женерлік графикасы, жеңіл автомобильдерді жөндеу және қызмет көрсету, кузовты жөндеу сияқты түрі бойынша бақ сынады. Бұл жарыс білікті мамандарды даярлауға, жаңа идеялар мен трендтер жасауға, кәсіби білім сапасын арттыруға мүмкіндік береді, сондай-ақ кәсі­би шеберлік дағдыларын жетіл­діретін алаңға айналады», дейді Шымкент қаласы Жол-көлік колледжі директорының оқу ісі жөніндегі орынбасары Әбдімүтәліп Ақмолдаев.

WorldSkills дүниежүзілік қозғалысы 1946 жылы Испанияда құрылған. Бүгінде әлемнің 82 елі осы ұйымға мүше. «2014 жылы Қазақстан WorldSkills International (WSI) толық құқылы мүшесі болды. Осыдан соң WSI «Кәсіпқор» холдингі» коммерциялық емес акционерлік қоғамын WorldSkills Kazakhstan қозғалысын дамыту бойынша қызметті жүзеге асыратын мүше ұйым ретінде қабылдады. Соған сай холдинг пен WSI арасында серіктестік келісім бар. 2015 жылдан бастап инженерлік, техникалық және жұмысшы мамандықтарының мәртебесін арттыруға бағыт­тал­ған WorldSkills чемпионат­тары аймақ­тық және респуб­ли­калық деңгейде өткізіліп келеді. Ең алғашында 7 кәсіптік маман­дықтың түрімен басталған са­йыс биыл 38 мамандық бойынша кіл жүйріктерден шын жүйрікті анықтады. Республикалық жарыс­тың жеңімпаздары халықаралық чемпионаттарға жіберіледі. Қа­­зір­ге дейін олар Бразилия, Шве­­­­ция, БАӘ, Венгрия, Ресей сияқ­ты елдерде өткен конкурсқа қа­тысып, бағын сынады. Мысалы, соң­ғы рет Қазан қаласында өткен жарыс­та ұшқышсыз ұшу аппараттарын басқару түрі бойынша біздің елден қатысқан Әли Әскерханов 3-орынды иеленді. Яғни, қатысушылардың кәсіби шеберлігі жыл сайын артып, шыңдалып келеді. Ал әлемдік 45 чемпионатқа қатысқан еліміздің мехатроника мамандары кәсіби шеберлік бойынша арнайы ме­дальді еншіледі. Бұл біз үшін үлкен жеңіс. Өйткені онда біздің қатысушылар Германия, Испания, Ресей сияқты ең мықты деген елдердің кәсіптік мамандарымен тайталасқа түсіп отыр.

Демек WorldSkills-ті жұмыс беруші мен білім саласы­ның ара­сындағы көпір деу­ге бола­ды. Осылайша жастар кәсіп­тік мамандыққа деген қызығу­шылығын арттырып, біліктігін шыңдаса, жұмыс беруші де өзі­не қажетті маманды табады. Өйткені бұл жоғары стандарт­тарға сай жұмыс істеуге жетелей­ді. Мәселен, бізде токарлар май-май болып станоктарда тұрады де­ген ұғым қалыптасқан. Ал қазір­гі токарлық алаңдарда адам­­дар жабық нысанда ақ халат­­пен жұмыс істейді», дейді «Кәсіп­қор» холдингі» КЕАҚ WorldSkills қозғалысын дамыту департаментінің директоры Санжар Тәтібеков.

 

Соңғы жаңалықтар

Маңғыстауда «Жыл адамы - 2019» анықталды

Аймақтар • 14 Желтоқсан, 2019

Ақтауда тұрғын үй пайдалануға берілді

Аймақтар • 14 Желтоқсан, 2019

Атыраулықтар тағы да үздіктер қатарында

Аймақтар • 13 Желтоқсан, 2019

Ұқсас жаңалықтар