Тәуелсіз елдің іргесін бекіткен Тұңғыш Президент

Конференция жұмысына Се­нат пен Мәжіліс депутаттары, Әзербайжан, Болгария, Қыр­ғыз, Моңғолия, Сербия, Татар­стан, Түркия елдерінің парламент өкілдері қатысты. Бұған қоса форумға БҰҰ ДБ, ЕҚЫҰ, ТүркПА, ҰҚШҰ сияқты халықаралық ұйымдар мүшелері мен АҚШ, Швеция және басқа да шетелдерден сарапшылар келді.

Басқосуда сөз тізгінін ұста­ған Парламент Мәжілісінің Төр­ағасы Нұрлан Нығматулин жыл сайын Тұңғыш Президент күні қарсаңында өткізіліп келе жат­қан бұл конференция бүгінде Қазақстанның қол жеткізген табыстары туралы халықаралық деңгейде диалог құратын ерекше форумға айналғанын айтты.

– Биылғы конференцияның маңызы да зор, орны да бөлек. Се­бебі алдағы жылы біздің елі­мізде Президенттік басқару инс­титутының құрылғанына тура 30 жыл толады. Бұл – біздің егемен еліміз үшін айтулы белес және тарихи кезең. Осы 30 жылда барлық реформалар жоғары деңгейде орындалып, біздің Қазақстанымыз аз уақыттың ішінде саяси, эко­но­ми­калық және әлеуметтік табыс­ты мемлекетке айналды. Бұл тәуел­сіз Қазақстанның негізін қалау­шы Тұңғыш Президент – Елба­сы Нұрсұлтан Назарбаевтың көре­ген саясатының, батыл қа­дамы­ның және бірлігі жарас­қан хал­қы­мыздың ерен еңбекте­рінің жемі­сі екені сөзсіз. Бүгінде Елба­сы­ның бастамаларын Мемлекет бас­шы­сы Қасым-Жомарт То­қаев жал­ғастырып, еліміздің стра­тегиялық жоспарларын әрі қарай жүзеге асыруда, – деді Н.Нығ­матулин.

Мәжіліс Спикері 30 жыл ішінде еліміздің Тұңғыш Президенті Нұрсұлтан Назарбаевтың бас­шылығымен экономиканың тұрақ­ты өсуі, әділетті әлеуметтік саясат, қоғамды демократияландыру нәтижесінде барлық салада толық ауқымды реформалар жүзеге асырылғанын атап өтті.

Бұдан кейін сөз алған Қазақстан Сыртқы істер министрінің бірінші орынбасары Шахрат Нұрышев тәуелсіздіктің құндылықтары ашықтық пен тең құқылы өзара қарым-қатынас қағидаттарына негізделгенін, Тұңғыш Президент жүргізген сарабдал саясатының арқасында Қазақстанның бет-беделі қалыптасқанын айтты.

– Елбасы Қазақстанның әлем­дік аренадағы қазіргі кейпін ай­қындап берді. Бүгінгі таңда Қазақстан өңірлік және жаһандық проблемаларды шешуге өз үлесін қосып келеді. Тұңғыш Президентті көп­векторлы, прагматикалық және теңдестерілген сыртқы саясат­тың авторы ретінде білеміз. Мемле­кеттің егемендігі мен аумақ­тық тұтастығына кепіл болған Нұрсұлтан Назарбаев қоғам­ның ұзақ мерзімді перспекти­вада қауіпсіз әрі тұрақты дамуы­ның негізін қалады. Елбасы Қа­зақстанның беделді халықаралық құрылымдарға кіруін қамтамасыз етіп, мемлекетіміз 182 елмен дип­ломатиялық қарым-қатынас орнатты, – деді ол.

Келелі кеңесте төрден орын алған шетелдік құрметті қонақ­тар да өздерінің жылы лебіз­дерін жеткізіп, Қазақстанның жетістіктері туралы сөз қозғады. Со­ның бірі Татарстан Мемлекеттік Кеңе­сінің Төрағасы Фарид Мұха­мет­шин осынау іс-шараға шақырту алғаны үшін алғыс айтып, қазақтармен түбі де, тілі де бір екенін, қашанда құшақ жая қар­сы алатын халқымызбен тәржі­масыз түсінісе алатынын айтты.

– Демократиялық мемлекет қа­лыптастыруда Елбасы Нұрсұлтан Назарбаевтың сіңірген еңбегі зор. Кеңес Одағы ыдырағаннан кейін тәуелсіздік алған елдердің көбі бірден аяқтарынан нық тұ­рып кете алмады. Бірақ шамалы уақыттың ішінде Қазақстан халықаралық деңгейде өз атын қалыптастырып, қарқынды даму жолына түсті. Мұның бәрі, әрине көреген көшбасшы Нұрсұлтан Назарбаевтың арқасы. Мен осыдан бірнеше жыл бұрын, яғни 2007 жылы Қазақстанның астанасына ат басын бұрдым. Сол кезде қазіргі Президент Қасым-Жомарт Тоқаев­пен бірге екі ел арасындағы парламентаралық келісімге қол қойдық. Сол уақыттағы елордамен салыстырып қарағанда бүгінгі Нұр-Сұлтан қаласын танымай қалдық. Осы елдің айнасы саналатын астанаға қарап, Қазақстанның даму деңгейін аңғаруға болады. Бү­гінде Татарстанда 170-тен аса ұлт өкілдері өмір сүреді. Қазақстанның Тұңғыш Прези­ден­тінің ұсынысы бойынша Татар­стан Республикасының Халық ассамблеясын құрдық, – деді Фарид Мұхаметшин.

Жиында Болгария Халық жиналысы Төрағасының орынбасары Веселин Марешки екі ел арасында орнаған достық қарым-қатынастар туралы сөз сөйледі.

– Тұңғыш Президент күніне орай ұйымдастырылған осынау конференцияның басынан табылу – мен үшін зор мәртебе. Болгария Қазақстанмен екіжақты қарым-қатынастардың тұрақты әрі достық сипатын жоғары бағалайды деп сеніммен айта аламын. Болгария мен Қазақстан достығы екі халықтың арасындағы ізгі ниеттер, нарықтық және әлеуметтік даму бағытында қабылданған реформалар, дипломатиялық қарым-қатынастар, көптеген сала бо­йынша екіжақты ынтымақтастық негізінде нығая түсті. Бұл ретте Қазақстанның Тұңғыш Президенті Нұрсұлтан Назарбаевтың қос­қан үлесін ерекше атап өту керек. Болгария Президенті Ру­мен Радевтің Қазақстан Прези­денті Қасым-Жомарт Тоқаев­пен кездесулері екіжақты ынтымақтастыққа серпін берді. Парламентаралық диалог екі елдің соңғы жылдардағы саяси байланысын дамытудың маңызды элементі ретінде саналады, – деді Веселин Марешки.

Ал Қырғызстан Жогорку Кене­ші Төрағасының орынбасары Аида Касымалиева бұл дәстүрлі конференцияның Қазақстан Пре­зиденті Қасым-Жомарт Тоқаев­тың Қыр­ғызстанға жасаған мемле­кет­тік сапарымен тұспа-тұс кел­генін, қазақстандық делегация­ны өз елдерінде қуана қарсы алуға қа­шанда дайын екендерін жеткізді.

– Осы іс-шарада Елбасы Нұр­сұл­тан Назарбаевтың есімі ұлық­талып жатқанына қуаныштымын. Бұл ретте Жогорку Кенештің және бүкіл қырғыз елінің атынан бауырлас қазақстандықтарды алдағы Тұңғыш Президент күні мерекесімен құттықтаймын. Қыр­ғызстан алдына демократиялық ел құру міндетін қойды. Толыққанды парламенттік мемлекетке айналу үшін көптеген жұмыс атқа­ру керек. Осы тұста біз қаты­сып отырған халықаралық кон­фе­ренцияның тақырыбы өте өзекті болмақ. Қазақстан Кеңес одағы құрамында болған елдердің ара­сында өзінің даңғыл даму жолымен, тұрақтылығымен ерекше­ленеді. Қырғызстан ба­уырлас елдің әр жетістігіне сүйініп отырады. Елбасының бастамасымен іске асырылып жатқан ілкімді реформалар бауырлас елдің ілгерілеуіне даңғыл жол ашты, – деді ол.

Сонымен қатар Түркия Ұлы Ұлттық Жиналысы Төрағасының орынбасары Левент Гек бауырлас қазақтардың түрік халқына деген ілтипаты үшін ризашылығын біл­дірді. Ол Қазақстан тәуел­сіз­ді­гін жариялағанда Түркия бұл ақ­жолтай хабарды үлкен қуанышпен қабылдап, алғаш болып егемен ел ретінде мойындағанын, біздің елдердің достығын, түрлі саладағы ынтымақтастығын бүкіл Түркі әлемінің жетістігі деп қарайтынын айтты.

Екі панельдік сессия бойынша өткен конференция жұмысында «Ел­басы және қазақстандық пар­ла­ментаризмнің дамуы» және «Ақ­орда: көпвекторлы бағыт» атты тақырыптар төңірегінде кеңі­нен әңгіме өрбіді.