«Оқушылар жалпы топтарда құрдастарымен тең дәрежеде білім алады. Күн сайын балаға қажетті жеке көмек көрсетіледі», деді «Болашақ» корпоративтік қоры кеңесінің төрайымы Динара Шайжүнісова.
№88 мектеп-лицейінің инклюзивті кабинеті «Шеврон» компаниясының демеушілік қаражаты есебінен қаржыландырылды. Бұл аталған қордың «Әр бала мектепке лайықты» жобасы аясындағы алтыншы кабинеті.
«Шеврон» компаниясының Қазақстанмен серіктестігіне 26 жыл толып отыр. Яғни компанияның елімізде жұмыс істей бастаған күндерінен бері, – деді компания өкілі Жанар Қошпанова – еліміздің медициналық мекемелерін қолдауға, халықаралық стандарттарды енгізуге, жергілікті мамандарды үздік халықаралық тәжірибелермен таныстыруға қолдау көрсетілді. Бұл – елдің әлеуметтік-экономикалық дамуына қосып жатқан үлесіміз».
Премьер-Министрдің орынбасары Бердібек Сапарбаев әлеуметтік жобаларды іске асыруда, атап айтқанда, ерекше қажеттіліктері бар балаларды қолдауға бағытталған мемлекеттің, қоғамдық ұйымдар мен шетелдік кәсіпорындардың өзара тығыз байланысының маңыздылығын атап өтті.
Елорда әкімі Алтай Көлгінов оқушылармен кездесу барысында жаңадан ашылған мектептің алғашқы оқушыларына «Сіздер оқитын мектеп жетекші мектептердің бірі. Білім алу үшін еңбек етіңіздер, ал біз өз тарапымыздан барлық жағдайды жасаймыз, «Шеврон» компаниясына қолдау көрсеткені үшін алғыс білдіремін», – деді. Сондай-ақ қала әкімі инклюзивті кабинеттердің қаланың басқа мектептерінде де ашылатынын жеткізді.
Ата-аналар да алғысын білдіріп, аталған инклюзивті кабинеттердің маңыздылығын атап өтті. Сондай-ақ №88 мектеп-лицейінде гидропоника кабинеті ашылды. Технология көмегімен мектеп оқушылары өздері өсімдік өсіре алады. Сонымен қатар оқушылар физика мен химия пәндері бойынша тәжірибе жасай алатын зертхана кабинеті ашылды.
Мұғалімдермен әңгіме барысында вице-премьер Елбасы мен Президенттің тапсырмасы бойынша педагогтардың мәртебесін арттыруда нақты шаралар қабылданғанын айтты.
«Мемлекет білім беру саласын дамытуға және балаларды қолдауға ерекше көңіл бөледі. Бүкіл ел бойынша жаңа заманауи мектептер салынып жатыр, мұғалімдердің жалақысы артып, жұмыс жағдайы жақсаруда. Ұрпақтың білімді, сауатты және тәрбиелі болып өсуі үшін барынша күш салуымыз керек», – деді Бердібек Сапарбаев.
