Қазақстан Президенті Нұрсұлтан Назарбаев Бельгия Королі Альберт II-ге және оның ұлы Филиппке жоғары биліктің ресми түрде берілуіне байланысты құттықтау жеделхатын жолдады, деп хабарлады Президенттің баспасөз қызметі.
Жеделхатта Қазақстан Президенті Бельгияның ұлттық мерекесі – Корольдің ант беру күнімен құттықтап, бұл күні биліктің берілуінің символдық мәні барын және маңызды тарихи оқиға болып саналатынын атап өтті.
«Өкілеттігіңізді ұлыңызға беруіңіз Бельгия халқының есінде қалатын тарихи маңызы зор оқиға болмақ. Мен Брюссельде өткен екіжақты кездесулерді ықыласпен еске аламын. Елдеріміз арасындағы достық пен екіжақты және көпжақты пішіндегі ынтымақтастықты нығайтуға бағытталған игі қадамдар Сіздің жеке қолдауыңыздың арқасында іске асырылғаны анық», – деп атап өтілген Король Альберт II-нің атына жолданған құттықтау жеделхатында.
Нұрсұлтан Назарбаев ханзада Филипптің Қазақстанға 2010 жылғы қазандағы сапарын да жылы сезіммен еске алатынын жеткізген.
«Біздің елдеріміз арасында қалыптасқан өзара қарым-қатынастар Сіздің қолдауыңызбен алда да екі ел халықтарының игілігі үшін достық және өзара түсіністік рухында одан әрі дамитынына сенемін», – делінген жеделхатта.
Соңында Мемлекет басшысы Альберт II-ге және Король Филиппке зор денсаулық, қызметтеріне мол табыс, ал Бельгия халқына бақ-береке мен игілік тілеген.
