Аймақтар • 03 Желтоқсан, 2019

Болашаққа нық қадам

340 рет
көрсетілді
2 мин
оқу үшін

«Диалог. Сенім. Болашаққа нық қадам». Дәл осындай атаумен Қазақстанның Тұңғыш Президенті күніне орай Түркістанда тұңғыш рет жастар форумы өткізілді. Бұл құрылтай жастардың бизнес, өнер және технология саласында өздерін толғандыратын мәселелер бойынша пікір алмасуға мүмкіндік беретін алаң. Сондай-ақ жас белсенділер шаһар әкімі Рашид Аюповпен ашық әңгімелесіп, қаланы дамытуға қатысты ойларымен бөлісті.

Болашаққа нық қадам

Форумның негізгі миссия­сы идеялар, жастардың құл­шынысын ояту және қаланы көркейту. Ұйымдастырушылар аталған басқосудың жастар мен студенттердің  жыл сайын бас қосып,  қала жастары­ның бел­сенділігін арттыратын және ша­һардың өсіп-өркендеуіне үлес қосатын пайдалы шараға айнала­тыны­на сенімді. Мұндағы мақ­сат – жақын аймақтардан және  жергілікті жастар  ұйым­дары, қауымдастықтар, сол секілді жеке кәсіпкерлердің басын қосып, олармен тәжірибе бөлісу арқылы жастардың тың идеяларын жүзеге асыруға септесу. 

Қала әкімі Рашид Аюпов жастарды қаланы дамытуға белсенді қатысуға шақырып,  туризм және сервистік қызмет көрсету саласындағы бизнес идеяларды дамытуды ұсынды.

– Биыл Түркістанға 1 млн 200 мың турист келді. Қаланы жаң­ғыртсақ, бұл ағын жылына 4 миллионға дейін артады. Түркістан – қоғамдық тамақ­тану, қонақүй қызметтері, біре­гей қолөнер тауарлары сала­сындағы бизнесті дамытуға қолай­лы аймақ, – деді Рашид Аюпов.

Сондай-ақ әкімнің айтуынша, Түркістанда қалалық акселератор ашылады. Мұнда жастардың креативті жобаларына қаржылай қолдау көрсетілмек.

Жастар құрылтайында биз­несті тиімді жүргізудің жолы, сүйікті істен пайда табу, кәсіпті неден бастау керек, франшиза,  инвестиция тартудың тың амалдары, краудфандинг арқылы 15 мың доллар жинау сынды мәселелер бойынша саланың үздіктері өз тәжірибелері­мен бөлісті. Атап айтқанда, бел­гілі блогер Жансерік Қадырбаев,  StudyON лингвистикалық мек­тебінің негізін қалаған Шахноза Нышанқұлова, жас ре­жиссер және жазушы Айдие Ай­дар­беков табысқа жетудің сырын айтып берді.