Еуропалық Одақ (ЕО) пен Қазақстан арасындағы Ынтымақтастық кеңесі өзінің отызыншы отырысын өткізді. Отырыс ЕО делегациясының басшысы ретінде Литва Республикасының Сыртқы істер министрі Линас Линкявичюстің төрағалық етуімен болды.
Қазақстан делегациясын Қазақстан Республикасы Премьер-Министрінің орынбасары Ербол Орынбаев басқарды. Отырысқа сондай-ақ Еуропа Сыртқы байланыс қызметінің бас операциялық директоры О’Салливэн мен ЕО-ның Орталық Азия бойынша Арнайы өкілі Патриция Флор ханым қатысты.
Ынтымақтастық кеңесі бірқатар салалардағы қатынастарды нығайту үшін екі тараптың айтарлықтай жұмыс атқарғанын растады жəне 2011 жылғы маусымда өткен ЕО мен Қазақстан арасындағы Ынтымақтастық кеңесінің он екінші отырысынан кейінгі кезең ішіндегі қызметке баға берді. Ынтымақтастық кеңесі келіссөздердің жалғасатынына жəне Қазақстан мен Еуропалық Одақ арасындағы əріптестік пен ынтымақтастық туралы жаңа кеңейтілген келісімнің жасалатынына қызығушылығын қуаттады.
Ынтымақтастық кеңесі өңірлік те, сондай-ақ ұлттық деңгейде де Орталық Азия бойынша ЕО Стратегиясын кешенді іске асырудың маңыздылығы туралы тағы да мəлімдеді жəне Қазақстанның Орталық Азия бойынша ЕО өңірлік бастамаларына қатысатынын құптады. Құқық үстемдігі, білім беру мен қоршаған орта сияқты нақты бастамаларға қатысты ахуалды дамыту жайы талқыланды.
Ынтымақтастық кеңесі екі тарап үшін де маңызды болып отырған бірқатар мәселелерді талқылады, атап айтқанда, саяси реформалар, құқық үстемдігі мен адам құқығы, сауда-экономикалық қатынастар, Орталық Азиядағы өңірлік ынтымақтастық (су, энергетика және қоршаған ортаны қоса алғанда) және халықаралық мәселелер әңгіме өзегіне айналды.
Кеңес Қазақстанның Бүкіләлемдік сауда ұйымына кіруі туралы келіссөздердің оң нәтижелерін құптады. ЕО Қазақстан Республикасының БСҰ-ға мүшелігіне қолдау көрсетті, ол қалған саудалық тосқауылдарды еңсеруге көмектеседі және екіжақты сауданы барынша ұлғайтуға ұмтылады.
Кеңес Орталық Азиядағы өңірлік ынтымақтастықты және Ауғанстанды қоса алғанда, халықаралық мәселелерді талқылады. Ынтымақтастық кеңесі өңірдегі жанжалдардың алдын алу және әлеуметтік-экономикалық дамудың тиімді тәсілі ретінде Орталық Азиядағы өңірлік ынтымақтастықтың маңыздылығын атап көрсетті. Осы мән-мәтінде Ынтымақтастық кеңесі Орталық Азия әріптестерін су ресурстарын басқаруға, өңірдегі қауіпсіздік пен энергетика мәселелеріне қатысты тұрақты шешімді іздеуге шақырды. Өйткені, бұл барлық мүдделерді ескеруге және өңірдегі бірлікті сақтауға жәрдемдесер еді.
«Егемен-ақпарат».
