CGT Кәсіподақтар ұйымы Франция бойынша манифестанттардың жалпы саны 1,8 млн деп болжап отыр. Олардың 24,7 пайызы темір жол жұмысшылары, 12 пайызы бастауыш мектеп мұғалімдері, 19 пайызы оқу орындардың қызметкерлері деген дерек бар. Медицина, сот қызметкерлері, полицейлер де наразылар қатарында. Адам қарасының көптігі сонша, сарапшылар мұны былтырғы «сары кеудешелер» митингілерінен асып түсті дегенді айтады.
Ал халықтың бас көтеруіне ел президенті Э.Макронның зейнеткерлік реформасын жасауы себеп. Францияда зейнеткерлікке қатысты 10-ға жуық бағдарлама бар. Саясаткерлердің айтуынша, оларды қарапайым халықтың түсінуі қиын. Президент бағдарламаларды біріктіріп, бір жүйе әзірлеуді ұсынған. Нақты айтар болсақ, мемлекет басшысы балдық жүйені ұсынып отыр. Яғни, реформа қабылданған жағдайда, зейнетақы ұпайларға сәйкес төленбек. Ал бұл көптеген мамандық иелерінің жағдайын қиындатпақ. Бұл тізімге теңізшілер, заңгерлер, тіпті опера әртістері де еніп отыр. Жалпы, Францияда соңғы 10 жылда зейнетке шығу жасы 60-тан 62-ге ұлғайтылған. Бұл – озық елдердің арасындағы ең төмен көрсеткіштердің бірі. Мәселен, Ұлыбританияда халық 66 жаста зейнетке шығады. Макрон ұсынып отырған реформа бара-бара зейнетке шығу жасын да ұлғайтпақ. Оның айтуынша, жаңа ережелерге сәйкес, 62 жаста зейнетке шығу тиімсіз болып, халық 64 жасында аталған игілікті көретін болады.
Белсенділер жүргізген сауалдаманың нәтижесіне қарасақ, халықтың 75 пайызы реформаға қарсы. Бір қызығы, бұған алаңдатушылық танытқандар 18-34 жас шамасындағы азаматтар.
Франция премьер-министрі Эдуард Филипп зейнетке шығудың төменгі жасын сақтап қалатынын хабарлады. «Бұл таңдау құқығы. Біз азаматтарымызға 62 жасында да жұмысын тоқтауға мүмкіндік береміз. Дегенмен, француз халқын ұзақ әрі көп жұмыс істеуге үгіттеуіміз керек», деді. Реформа қабылданса, депутаттар, құқық қорғаушылар, темір жол жұмысшылары бір ереже бойынша зейнетақы алмақ. Ал жаңа жүйеге сәйкес зейнетке шығатындардың бірінші легі 2004 жылы туғандар деп жоспарланған. Президент бұл реформаны Парламент ақпанда қарайтынын айтты.
