Қоғам • 24 Желтоқсан, 2019

«Самұрық-Энерго» өз компанияларын цифрландыруды жалғастырып келеді

«Самұрық-Энерго» электрэнергетикалық холдингі өз компанияларындағы ішкі процестерді цифрландырып, автоматтандыру бағытындағы жұмыстарын жалғастырып келеді.

Egemen Qazaqstan

Осы ауқымды жұмыстың аясында холдингке қарасты акционерлік қоғамның бірі – «Алатау жарық компаниясы» диспетчерлік пункттерді қайта құрылымдау жобасының тұсаукесерін өткізді.

Компания басшылығының айтуынша, бұл қалада жеті диспетчерлік пункт болса, соның алтауы қайта жаңартылып отыр, ал біреуі – онсыз да жаңадан салынған нысан. Жоба Алматы қаласының энергожүйесіндегі ауытқулар мен апатты жағдайларды жоюда жылдам әрі дұрыс шешім қабылдауға зор мүмкіндік береді. Бір айта кетерлігі, «Алатау жарық компаниясы» алты аудандық диспетчерлік пункттерді жедел-ақпараттық кешендермен және ұжымдық пайдалануды бейнелеу жүйелерімен (бейнепанельдер негізінде) жарақтандыра отырып, қайта құрылымдау жобасын Қазақстанда алғаш рет жүзеге асырып отырған компания.

Бұл ретте, ұжымдық пайдалану ақпаратын бейнелейтін жүйені ауқымды бейнеқабырға деуге болады. Бейнеқабырғадан негізгі энергия объектілері, соның ішінде барлық коммутациялық аппараттар бейнеленген қосалқы стансалар, жалпы, сол ауданның коммутациялық схемасы түгел көрініп отырады. Бейнеқабырғаны диспетчер жұмыс орнында отырып басқара алады.

«Бұл жоба, бірінші кезекте, электр тораптық кешенді басқару жүйесін үнемі жетілдіруге және тұтынушыларды үздіксіз электр қуатымен қамтамасыз етуге бағытталған. Ал «Алатау жарық компаниясының» басты міндеті де сол, тұтынушыларға сапалы қызмет көрсету», деп атап өтті тұсаукесер рәсіміне қатысқан «АЖК» АҚ Басқарма төрағасы Мұхит Үмбетов.

Диспетчердің жұмыс үстелінде орнатылған SCADA жүйесі тораптардың жалпы схемасын, сондай-ақ Телеметрия деректерін шығара отырып, энергия нысандарының бір желідегі схемасын көрсетуге мүмкіндік береді. Бұл өз кезегінде тораптарды басқару жеделдігін айтарлықтай арттырып, төтенше жағдайларға тез әрекет ету мүмкіндігі пайда болады. Сонымен қатар диспетчерлік пункттерді қайта жабдықтау диспетчерлердің жұмысын тиімді етеді.

Ең бастысы, компания басшылығы атап өткендей, осы жобаның аясында бұрын қағаз жүзінде сақталған барлық құжаттар электронды форматқа көшірілген.

Естеріңізге сала кетейік, «Самұрық-Энерго» холдингіне қарасты «Алатау жарық компаниясы» – Алматы қаласы мен Алматы облысында электр тораптарының сенімді жұмыс істеуін және тиімді дамуын қамтамасыз ететін, ірі өңірлік энергия жеткізуші компания.