Жалпы, облыстық бейнелеу өнері мұражайында биылдың өзінде төрт бірдей жоба іске асырылды. Атап айтқанда, «Бір суреттің тарихы», «Қарағандының монументалды өнері: мозаикадан стрит-артқа дейін», «Сарыарқаның сәндік-қолданбалы өнері және ою-өрнектері» және суретші Кәріпбек Күйіковтің өмірі мен қызметіне арналған жобалар қала тұрғындары мен қонақтары тарапынан жоғары баға алды.
Жоғарыда аталған экспедиция Қарқаралы, Шет, Жаңаарқа, Ақтоғай және Бұқар жырау аудандары бойынша тиянақты жұмыс істеді. Нәтижесінде, ел ішінен қабырғаға ілінетін тұскиіз, сырмақ, қазақтың бесігі, бесікке арналған жабдықтар, қобыз, үккіш пен келсап, қазақтың дөңгелек үстелі, ас үй бұйымдары – саптаяқ, қамшы, малдың етін ілуге және кептіруге арналған құрал-аспа, бие сүтін сапыруға арналған ыдыс-текшелер, оюмен өрнектелген жастықтар сияқты шебер қолдан шыққан дүниелер жинастырылып, экспонат ретінде көрмеге қойылды.
Сонымен қатар көрме барысында «Сарыарқаның сәндік-қолданбалы өнері және ою-өрнектері» атты кітап-альбомның таныстырылымы өтті.
Мұражайдың ауыз толтырып айтарлық тағы бір жобасы «Бір суреттің тарихы» деп аталады. Оның авторы, музейдің ғылыми қызметкері Айгүл Омарованың айтуынша, бұл жұмыс жергілікті «Saryarqa» телеарнасымен бірлесіп жүргізілген. Бірнеше жылғы ерен еңбектің нәтижесінде 11 мыңнан астам мұражай экспонаттарының ішінен Қарағандының және еліміздің танымал авторларының 12 туындысы, сондай-ақ сталиндік қуғын-сүргін кезінде Арқа төсіне жер аударылған суретшілердің үш шығармасы таңдалып алынып, көрермен назарына ұсынылды.
ҚАРАҒАНДЫ
