БҰҰ Қауіпсіздік Кеңесіне жаңа тұрақты емес мүшелердің жұмыс басталуының салтанатты рәсімін өткізу дәстүрі Қазақстанның бастамасымен 2018 жылдың қаңтарында оның БҰҰ Қауіпсіздік Кеңесінде төрағалығы кезінде енгізілді. БҰҰ-ға мүше мемлекеттер осы жаңа бастаманы Қазақстанның «жарқын жеке карточкасы» деп атады.
«Қазақстанның бастамасымен БҰҰ құрылған сәттен бастап 75 жыл ішінде үшінші рет өткізіліп отырған бұл рәсімнің мақсаты – халықаралық қоғамдастықтың сіздерге жүктелген жаһандық бейбітшілік пен қауіпсіздікті сақтаудың маңызды және қасиетті міндетін орындауға берілген мандатты мойындау. Сіздердің елдеріңіздің Қауіпсіздік Кеңесіне сайлануы басқа 192 мүше мемлекеттің сіздің үкіметтеріңізге БҰҰ Жарғысының мұраттарын, әсіресе осы қиын-қыстау күндерде сенетіндігін айғақтайды», деді іс-шараны бастау барысында Қазақстанның БҰҰ жанындағы Тұрақты өкілі Қайрат Омаров.
Ол Кеңестің жаңа тұрақты емес мүшелеріне осы дүниежүзілік ұйымның 75 жылдық мерейтойына орай биылғы мерейтойлық жылы сәттілік пен маңызды жетістіктер тіледі.
Айта кетейік, БҰҰ Қауіпсіздік Кеңесінің жаңа тұрақты емес мүшелері ретінде Вьетнам, Эстония, Тунис, Сент-Винсент және Гренадиндер, сондай-ақ Нигер Республикасы келді. Рәсімге БҰҰ Қауіпсіздік Кеңесінің жаңа тұрақты емес мүшелерінің елшілері қатысты. Олар Кеңестегі жұмысының басымдықтары туралы қысқаша баяндама жасап, БҰҰ-ның осы негізгі органында салтанатты жағдайда жұмысқа кірісуге мүмкіндік берген іс-шараны ұйымдастырғаны үшін Қазақстанға үлкен ризашылық білдірді.
Қазақстанның бастамасынан бұрын Қауіпсіздік Кеңесінің залы алдындағы баспасөз қабырғасының жанында БҰҰ Қауіпсіздік Кеңесі тұрақты емес мүшелерінің туларын ауыстыруы рәсімі болды. Жаңа дәстүрді енгізуімен бұл рәсім БҰҰ-ға мүше мемлекеттердің және әлемнің жетекші бұқаралық ақпарат құралдары өкілдерінің кеңінен қатысуымен Кеңестің жыл сайынғы бағдарламасының бірінші жұмыс күніндегі ресми іс-шараға айналды.
2019 жылы қаңтарда Қазақстанның Тұрақты өкілдігі БҰҰ Қауіпсіздік Кеңесі мүшелерінің тулары үшін Қазақстанда жасалған және қазақтың ұлттық оюларымен безендірілген арнайы тұғырлар сыйлады.
Қазақстан БҰҰ Қауіпсіздік Кеңесінде екіжылдық жұмысын 2018 жылғы 31 желтоқсанда аяқтаған.
