Осылайша әккі ұрының кесірінен отыз үй тоналып, жоғалған зат пен ақша, әшекей бұйымдардың құны 1 млн теңгеге жеткен. Тұрғындарды қан қақсатқан қаскөйді құрықтау үшін облыстағы үздік тәртіп сақшыларынан арнайы топ та құрылды. Іске жұмылдырылған із кесушілер ұрлық орнынан табылған саусақ іздерін ұзақ зерттеп, барлық қылмысты бір адамның жасағанына көз жеткізеді. Зерттеулер саусақ ізінің 28 жастағы бұрын сотты болған азаматқа тән екенін анықтаған екен.
Алайда, Алакөл ауданында туған әккі ұрыны ұстау оңай болмады. Тұрақты тіркеуі жоқ қылмыскер облыс аумағында қашып жүріп, жақында ғана қолға түсті. Тергеу кезінде ол Талдықорған қаласынан 30 үйді тонап, ұрланған заттарды сатып 1 млн теңге пайда көргенін мойындады.
