Парламент • 15 Қаңтар, 2020

Бақытжан Жұмағұлов Ақмола облысындағы әлеуметтік нысандарды аралады

158 рет
көрсетілді
1 мин
оқу үшін

Сенатор Бақытжан Жұмағұлов жұмыс бабындағы сапармен Ақмола облысында болды. Бұл туралы Парламент палатасының баспасөз қызметі хабарлады. 

Бақытжан Жұмағұлов Ақмола облысындағы әлеуметтік нысандарды аралады

Сенатор Көкшетау қаласындағы бірқатар білім беру нысанын аралап, оқытушылармен, оқушылармен және студенттермен кездесті. Депутат болған оқу орындарының ішінде Ш.Уәлиханов атындағы Көкшетау мемлекеттік университеті, А.Мырзахметов атындағы Көкшетау университеті, Щучинск қаласындағы жоғары техникалық колледж, Жоғары педагогикалық колледж, №2 орта мектеп, сондай-ақ Ақылбай ауылындағы шағын жинақты мектеп бар.

Кездесулерде «Педагог мәртебесі туралы» заң мен Қазақстан Республикасының 2020-2025 жылдарға арналған білім беру мен ғылымды дамытудың мемлекеттік бағдарламасының ережелері жан-жақты түсіндірілді.

Депутат жаңа заңдағы әдепке қатысты және басқа да құқықтық, әлеуметтік кепілдіктер туралы ережелер туралы айта келіп, педагогтардың өз қызметіне адалдығы бәрінен де жоғары екенін ерекше атап өтті.

Б.Жұмағұлов Бурабай ауданының Жұмыспен қамту және халыққа қызмет көрсету орталығында да болды. Сенатор атаулы әлеуметтік көмек алуға өтініш білдірген азаматтармен әңгімелесіп, әлеуметтік қолдау алуға байланысты көрсетілетін қызметтердің құжаттарын қабылдау, тапсыру рәсімдерімен танысты.