Бұл игілікті істі Мәлік Ғабдуллин музейінің директоры Құдайберлі Мырзабек ұйымдастырған екен. Оған мектептің бұрынғы директоры Мәдина Белгібайқызы, Сандуғаш Асылбекқызы, Баян Жарқызы көмектесіпті. Музей өңіріміздің тарихи тұлғаларын жергілікті тұрғындар мен оқушыларға танытуға бағытталған. Халық ақыны сонау кеңес заманында айтыс өнерінің үзілмей, дамуына айтулы үлес қосқан.
Қазақстанның еңбек сіңірген қайраткері, жазушы-драматург, Сенаторлар кеңесінің мүшесі Жабал Ерғалиев құттықтау сөзінде Көкен Шәкеев музейінің ашылуы Ақмола мен Көкшетау өңірі үшін айтулы тарихи оқиға екенін, халық ақынының есімін ел есінде сақтау үшін музейдің үлкен маңызы бар екендігіне тоқталды. Еліміздің рухын көтеріп, елдігін көрсетіп, елдің санасын оятуға, тарихы мен шежіресін жинауға қисапсыз еңбек еткен Көкен ақынның ізбасары, осы істі ұйымдастыруға үлкен еңбек сіңірген Құдайберлі Мырзабекке алғысын білдірді. Көкшетаудың ән өнерін, серілігі мен салдығын, ақын-жыршыларының өнер жолын жалғастырған Көкен Шәкеев екендігі даусыз мәселе.
Ол Көкшетаудың абыройы, айдыны, айбыны, асқар тауы болды. Шара барысында Краснояр селолық округінің әкімі Нұрлан Айсин мен Маралбек Көкенұлы өздерінің жылы лебіздерін білдірді. Музейдің көк лентасы қиылып, шашу шашылды. Шараға қатысушылар мектептің «Рухани жаңғыру» музейін аралап, мектеп оқушылары мен Көкен Шәкеев атындағы айтыс ақындары мектебінің өнерін тамашалады.
