Асығы алшысынан түскен 300-дің арасында болу мен үшін мақтаныш деп білемін. Өйткені іріктелгендер тізіміне ену халық үшін қызмет етуімізге, мемлекетімізді одан әрі дамытуға зор үлес қосуға мүмкіндік береді. Ел болашағы – жастар десек, кадрлық резервке ену осы жолда аянбай тер төгуге артылған сенім.
Мемлекет басшысы Қасым-Жомарт Тоқаев Президенттің кадрлық резервімен кездесуінде аталған жобаға ерекше назар аударды. «Бұл – жас буын өкілдерінің жауапты қызметке келуі үшін жасалып отырған игі бастама. Осы ретте өздеріңіз сияқты білімді әрі талапты азаматтарға үлкен үміт артамыз. Сіздер жаңа Қазақстанның дамуына аянбай үлес қосасыздар деп сенемін. Еліміздің алдында биік мақсаттар тұр. Ең алдымен мемлекетімізді одан әрі өркендетіп, тәуелсіздігімізді нығайтуға тиіспіз. Сондай-ақ азаматтардың әл-ауқатын арттырып, тұрмыс сапасын жақсартуымыз керек», деген еді Қасым-Жомарт Тоқаев.
Жалпы, кейінгі 3 ай бізге марафон секілді болатын. Бірнеше сынақ пен тесттен өтіп, еліміздің барлық аймақтарынан жаңа достар таптық. Олардың бәрі – ақылды, талантты жастар. Мәселен, кадрлық резервке енген жастар жиында көптеген маңызды мәселені көтерді. Мұның бәрі, әрине, жастарымыздың ел болашағына бейжай қарамайтынын байқатады.
Осы орайда, мына нәрсені ескерген жөн. Іріктеу кезеңінен сүрінбей өтіп, өз қатарымыздың алды болуымыз ел алдындағы жауапкершілігіңізді арттыра түсті. Бұл – Қазақстанның қарқынды дамып, еліміздің ертеңі жарқын болу жолында ұлт үшін, ел үшін, халық үшін аянбай тер төгу. Мұны Мемлекет басшысы Қасым-Жомарт Тоқаев та кадрлық резерв мүшелерімен өткен кездесуде атап көрсетті.
Тарихқа көз жүгіртсек, білімді және білікті азаматтардың ортақ мүддеге топтасқанын байқаймыз. Мәселен, алашордашылар ел үшін еңбек ететін, ұлтты биікке жетелейтін, жаңаша дамуға бастайтын шоғыр қалыптастырды. Осы орайда, Президентіміздің Алаш ардақтысы Әлихан Бөкейханның: «Ұлтқа қызмет ету – білімнен емес, мінезден» деп айтқанын тілге тиек етуі бекер емес. Сол кезеңде халық үшін аянбай еңбек еткендердің басым бөлігі «орда бұзар» жастың айналасындағы азаматтар екенін көреміз. Ендеше, Президенттің кадрлық резервін ұйымдастырып, жастарды жауапты қызметке тағайындау жаңа серпін беретіні анық.
Мемлекет басшысы Қ.Тоқаевтың резервке енген жастармен кездесуінде «Мемлекеттік басқарудағы кез келген өзгеріс мұқият зерделенген, ұзақ мерзімді стратегияға сай жүргізілуі керек. Кадрлық саясат мұнда маңызды рөлге ие. Бұл – ең алдымен, мемлекеттің жаңа кадрлық саясатына қатысты мәселе. Оның басты міндеті – мемлекеттік аппаратты жетілдіру және басшылардың жаңа буынына жол ашу. Президенттік кадр резервінің негізгі көздеген мақсаты да – осы. Бүгінгі жастар – мемлекеттік басқару жүйесінің болашағы. Әрқайсыңыздан елді дамытуға тың серпін беретін жаңа идея мен нәтижелі жұмыс күтеміз» деуі де көп нәрсені аңғартады.
Қазірдің өзінде резервке өткендердің арасынан 55 азамат жаңа қызметке бекітілді. Олардың кейбірі орталық мемлекеттік органдардағы басшылық лауазымға тағайындалды. Сондай-ақ биыл резервтегі 100 адамды қызметке тағайындау жоспарланған.
Алдағы уақытта резервке енгендер мемлекеттік органдар мен ұлттық компанияларға жауапты қызметке жіберілмек. Ендеше, кадрлық резервтің әлеуетін толық пайдалануға зор мүмкіндік бар.
Лаура ДЕМЕСІНОВА,
Президенттік жастар кадр резервінің «Bolashaq» қауымдастығының атқарушы директоры
