Аймақтар • 20 Қаңтар, 2020

Сабаннан жасалған қалашық

14 реткөрсетілді

Жаңа жыл қарсаңында Қарасу ауданының Жалғызхан елді мекенінде есте қаларлық ерекше мүсіндер қойылды.

Бұл – жергілікті кәсіпкер Владимир Журжаның бастамасымен сабаннан жасалған жаңажылдық туынды. Идея авторы кәдімгі орамдалған шөп­тер­ден шырша, жыл символы – тышқаннан бастап, оның отбасы, Аяз ата мен Ақ­шақар, отарба, ертегілер кейіпкерлері, бөш­келер орнатып, ауыл-аймақты таңдай қақты­рып отыр. Табиғи материалдан істелген олар сәй­кесінше безендірілген.

Ірі агроөнеркәсіп жетекшісі В.Журжа мұндай сирек кезде­сетін ленд-арт туындыларды Украина мен Беларусь елде­рінде саяхаттап жүрген жерінен көріпті. 

– Ауылымыздың ерекше кейіпке еніп, түрлі ертегі ке­йіп­керлерінің болғанын қала­дым. Негізі сабан қалашы­ғын «ЛандштафтСтрой» серік­тестігіне күзде жасатқым келген. Бірақ бұл жаңа жыл қарсаңында тұрғындар үшін тамаша тарту болып отыр. Жалғызханның орталық күре көшелеріне түнгі шамдар тарттық. Ал мүсіндердің маңайына диод­ты, дюральді жарықтар орнатылды. Шам ілінген бағандарды түрлі түстермен бояп, айналмалы отшашулар, жалаушалар ілдік. Қарапайым шөптен жасалған мұндай мүсіндер қараңғыда жар­қырап, құлпырып тұрады, – дейді идея авторы.

Меценаттың ауылдастарына жасаған бұл базарлығына бас-аяғы 1 миллион теңге қаражат жұмсалған. Алайда, кәсіпкер бұл қаржы халықтың мерекелік көңіл күйін көтеруге жарап жатса, бұдан асқан бақыт жоқ екенін жеткізді.

Қазір таңғажайыпқа толы сабан қалашық жергілікті тұр­ғындар мен қонақтар қы­зық­­тап, суретке түсетін орынға айнал­ды. Тіпті бұл көрініс Ұлыс­тың ұлы күні – әз-Наурызға дейін сақталып, сабан шырша – киіз үйге, Аяз ата мен Ақшақар – Қыдыр ата мен Қожанасырға ай­налып жатса артық емес.

 

Қыдырбек Қиысханұлы

 

Қостанай облысы

 

Соңғы жаңалықтар

Оралда Қадыр кеші өтті

Аймақтар • Бүгін, 11:07

Ұқсас жаңалықтар