Таяуда аталған мұражайда «Бала қиялындағы әсемдік сыры» атты көрме ашылып, оған өнер мектебі оқушыларының 500-ге тарта композиция, пленарлық этюдтер, кескіндеме, графика және мүсін түріндегі туындылары қойылды.
– Бұл көрме бір жылғы жұмыстың есебі іспетті және ол жыл сайын өтіп тұрады. Мұнда барлық сынып оқушыларының суреттері, сондай-ақ түлектердің дипломдық жұмыстары жинақталған. Көрме «Рухани жаңғыру» бағдарламасы аясында ұйымдастырылды, – дейді Қарағанды облыстық бейнелеу өнері мұражайының жетекшісі Бибігүл Құдабаева.
Мұндай көрмелер 4-тен 17 жасқа дейінгі балалар мен жасөспірімдерді шығармашылық қабілеттерін дамытуға ынталандырып, бейнелеу өнері саласында дарынды өрендерді анықтауға көмектеседі деген пікір айтады мұражай қызметкерлері.
Көрмедегі туындылардың басым көпшілігі туған өлке, салт-дәстүр мен ұлттық мәдени құндылықтарды тақырып негізінде арқау еткен. Сонымен қатар мұнда сурет салудың академиялық тәсілдерімен бірге батыл эксперименталды техника қолданылған жұмыстар да жеткілікті.
Аталған көрменің аясында бейнелеу өнері мұғалімдеріне арналған «Шығармашылық идеялар фестивалі» атты облыстық семинар-практикумын өткізу де жоспарда бар.
ҚАРАҒАНДЫ
