Жиында алдымен сөз алған ведомство басышысы атқарылған жұмыстармен қатар, тың жобалар мен жүйелі жоспарларды алға тартты.

– Ақпарат және қоғамдық даму министрлігінің құрылғанына бір жылға жетер-жетпес қана уақыт болды. Мен өз кезегімде 2020 жылға негіз­дел­ген басым бағыттар мен негізгі мақсаттарға тоқталғым келеді. Біз жетекшілік ететін барлық бағыттарды дамыту бойынша нақты жоспарымыз бен стратегиямыз бар. Маңызды шаралар жоспарлануда. Ақпарат саласына тоқталар болсақ, өздеріңіз білетіндей Президент Қасым-Жомарт Тоқаев «Халық үніне құлақ асатын мемлекет» тұ­жы­рымдамасын енгізу туралы тапсырма берген болатын. Осы мақсатқа жету үшін министрлік бір­қатар жоспар құрды, – деді Д.Абаев.

Оның айтуынша, біріншіден, халықпен кері байланыс арналарының жұмыстарына жү­йелі түрде мониторинг жүргізу және талдау жа­сау қажет. Барлық мемлекеттік органдар ха­лық­пен жұмыс жүргізу бойынша жауапты бөлім­ше тағайындап, олар тікелей бірінші бас­шыға ба­ғынуы тиіс. Екіншіден, мемлекеттік орган­­дар ақпараттық қызметінің белсенділігін арт­тыр­ғаны жөн. Мемлекеттік органдардың БАҚ өкіл­дерімен байланысының тиімділігін бағалау­дың жаңа критерийлерін енгізу жоспарлануда. Үшіншіден, мемлекеттік органдар мен заң жо­ба­ларын қарайтын жұмыс топтарының, қоғам­дық кеңестің отырыстарын онлайн көрсету жалғасады.

Президент Қасым-Жомарт Тоқаев ақпарат саласын дамытудың 2020-2023 жылдарға арналған ұлттық стратегия­лық жоспарын құру туралы тапсырма бергенін айт­қан министр, құжат аясында отандық БАҚ-тың бәсе­кеге қабілеттілігіне байланысты жұмыстар қол­ға алынатынына тоқталды. Осыған байланысты бірқатар ша­ра әзірленуде. Біріншіден, мемлекеттік ақпа­рат саясатын іске асыру жұмысы жалғасады. Бұл үшін мемлекеттік ақпараттық тапсырыс те­тік­тері қайта қаралады. Нарықтық бағаны ен­гізу­де санға емес, сапаға мән беріледі. Халық ара­сында сұранысқа ие мультимедиялық кон­тенттің жарияланған саны емес, ғаламтор желі­сіндегі таралымына қолдау білдіріледі. Екін­шіден, коммерциялық телеарналар мен радио стан­салардың цифрлы эфир таралымы өз бағы­тын табуға қолдау көрсетіледі.

Сондай-ақ мемлекеттік саясат тапсырысын орындауда телеарналар мен интернет ресурстардың аудиторияларын медиабағалау үшін 2021 жылы арнайы жүйе құрастырылмақ. Осылайша интернет-телеарналарды рет­теу бойынша нормалар әзірленеді. Өткен жылы министрлік БАҚ саласындағы заңнаманы және ақпаратқа қолжетімділікті оңтайландыру мақ­сатында жоба дайындады. Онда бірқатар мәсе­ле қамтылған.

Отырыста радиохабарларды тарату мәселесі де назардан тыс қалмады. Елбасы Нұрсұлтан Назарбаев Қауіп­сіздік кеңесінің отырысында радиохабар­ларды дамытуға ерекше көңіл бөл­ген болатын. Бұл ретте радиохабарлар таратуды дамытудың Жол картасын әзірлеп бекіту, соны­мен қатар цифрлы радионы енгізудің кон­цеп­туалдық тәсілдерін анық­тау жұмысы Ақпарат және қоғамдық даму вице-министрі Нұргүл Мау­берлиноваға жүктелді.

– Былтыр «Egemen Qazaqstan» газетінің 100 жыл­дық мерейтойы атап өтілді. Биыл «Казах­станская правда» газеті мен «ҚазАқпарат» халық­ара­лық ақпарат агенттігіне 100 жыл толады. Осы мерейтойларды да өз деңгейінде өткізу керек. Бірақ бір ескеретін дүние, Мемлекет басшысы атап өткендей, ағартушылық бағытындағы шараларға басымдық берілуі керек, – деді Д.Абаев.

Министр «ҚазМедиа» орталығының техноло­гия­лық ядросын жаңарту мен отбасылық-ген­дерлік саясатты дамыту жоспарына да тоқталды. Оның айтуынша, 2030 жылға дейін отбасылық-гендерлік саясаттың екінші кезеңін жүзеге асыруға кірісу қажет. Бұл жұмыс көп балалы отбасыларды, жалғызбасты аналарды қолдау шараларын күшейтуді, дағдарыс орталықтарының, әлеуметтік қызметтердің жұмысын жетілдіруді көздейді. Сондай-ақ мемлекеттік жастар саясаты мәселелері бойынша заң жобасын әзірлеу де маңызға ие.

Жастарға арналған арт-хабтың да маңызы зор. ЭКСПО павильонындағы бұл шығар­ма­шы­­лық алаң жастарға арналған бірегей зама­­науи басқосу орны болмақ. Онда жастар өз жо­балары мен бастамаларын қолға алады. Соны­мен қатар «Зере» жастар танымдық лагері, Бесін­ші республикалық әкелер форумы және Халық­ара­лық сараптамалық форум, Қазақстан мен Ресей волонтерлік кеңесінің құрылуы да назарда болады.

Министр «Рухани жаңғыру» бағдарламасы­ның амбассадорлары жобасын жүзеге асыру қа­­жеттігін алға тартты. Оның айтуынша, атал­­ған бағдарламаны жүзеге асырудың тиім­ді­лі­гі бойын­ша сараптамалық баяндама жасау көз­д­елу­де. «Қазақстанның киелі жерлерінің» таны­мал­дылығын арттыру мақсатында «2gis» картасына бірқатар нысанның орналасу орны енгізіледі. Бұл жұмыстар әлі де жалғасады.

Дін мәселесіне қатысты да шаралар жос­пар­ланған. Яғни саланы дамыту бойынша стратегиялық ортамерзімді жос­пар әзірлеу қажет­тігі бар, өйткені 2017-2020 жыл­дарға ар­нал­ған тұжырымдаманың мерзімі аяқталады.

Д.Абаев «Жусан» операциясы арқылы Отанға оралған қыз-келіншектерді 100 пайыз оңалту туралы сөз қозғады. Министр бұл тек психо-эмоционалдық кеңес қана емес, әлеуметтік қолдау екенін де айтты. Сондай-ақ осы жылы Дін­танушылар форумы, Әлемдік және дәстүрлі діндер көшбасшылары съезі Хатшылығының ХІХ отырысы ұйымдастырылады.

Д.Абаев қандастарды қолдауды жалғастыру мақсатында әлеуметтік-экономикалық қолдау шаралары кешенінің нақты пайымдауын әзірлеу қажеттігін жеткізді. Оның айтуынша, алда Отан­дастар форумы мен шетелдегі қазақтардың кіші құрыл­тайын жоғары деңгейде өткізу міндеті тұр. 12 ел­де қазақ тілін үйретуге қатысты 31 онлайн са­бақ жүргізу мен 7 мемлекетте қазақтың мәде­ни-іс­керлік үйлерін ашу қажеттілігі бар. «Қан­дас» статусын «Бір терезе» қағидаты бо­йынша беру қызметін іске қосу қажеттігі де күн тәртібінде тұр.

Алқа мәжілісі барысында негізгі баяндамашыларды тыңдағаннан кейін Б.Сапарбаев алдымен «Рухани жаңғыру» бағдарла­ма­сының іске асу барысына тоқталды.

– Осыдан үш жыл бұрын Елбасы Нұрсұлтан Назарбаев «Рухани жаңғыру» бағдарламасын жариялағанда негізгі мақсат ретінде халқымызға тән әдет-ғұрпымызды, мәдениетімізді, салтымызды дәріптеу арқылы ел бірлігін нығайтуға үлкен көңіл бөлген еді. Бұл бағытта ауқымды жұмыс атқарылды, – деді Премьер-Министрдің орынбасары.

«Рухани жаңғыруға» қатысты пайымын Б.Сапарбаев «Туған жер» бағдарламасымен сабақтастырды.

– «Туған жер» бағдарламасының негізгі мақсаты – жастарды, азаматтарды өзінің Отанын сүюге тәрбиелеу, олардың патриоттық сезімін әрі қарай арттыру. Елбасы осыдан екі жыл бұ­рын «Ауылым – алтын бесігім» акциясын бас­таған болатын. Бұл қос бастаманың мемлекет болашағы үшін мәні зор, – деді Б.Сапарбаев.

Премьер-Министрдің орынбасары мемле­кет­тік органдардың баспасөз қызметін үйлестіру бо­йынша дұрыс бастама көтерілгенін де атап өтті. Оның айтуынша, баспасөз қызметтері мем­лекеттік органдардың атқарып жатқан жұ­мыстарын  халыққа жедел жеткізуі керек.

– БАҚ – билік пен қоғам арасындағы алтын көпір. Ақпарат – уақтылы һәм шындықтың шырағданы болған кезде ғана маңызға ие. Егер БАҚ өкілдері тұрғындарға дұрыс әрі уақтылы ақпарат беретін болса, олар да билік, үкіметтік емес ұйымдар тарапынан атқарылып жатқан жұ­мыстан хабардар болар еді. Осы орайда жұ­мысты жетілдіру қажет деп ойлаймыз, – деді Б.Сапарбаев.

Отырыс соңында қатысушылар өздерін толғандырған сұрақтарын жолдап, ойларын ортаға салды.