Жамбылға Қытайдан келген 37 адам қатаң медициналық бақылауда

Аймақтар • 28 Қаңтар, 2020

Жамбылға Қытайдан келген 37 адам қатаң медициналық бақылауда

Қытайдан шыққан коронавирустық инфекция бүкіл әлемді дүрліктіруде. Қауіпті кеселдің алдын алу мақсатында елімізде де жан-жақты сақтық шаралары жүргізілуде. Жамбыл облысының аумағында да санитариялық-эпидемияға қарсы және санитариялық-профилактикалық іс-шараларды күшейту мақсатында жұмыстар атқарылуда.

Хамит ЕСАМАН

Жамбыл облыстық денсаулық сақтау басқармасының хабарлауынша, бүгінде облыстық балалар жұқпалы аурулар ауруханасы мен аудандық орталық ауруханаларының инфекциялық бөлімшелерінде 503 төсек бар. Оның 185-і ересектерге арналған болса, 318-і балаларға арналған. Қосымша тағы 333 төсек қарастырылып, дайындалған.

Медициналық ұйымдар жеке бас қорғаныс киімдерімен, вирусқа қарсы препараттар мен вируцилидті дезинфекциялық заттардың қорымен қамтамасыз етілген. Обаға қарсы 1826 дана 1 типтік көп реттік костюм, 9942 дана бір реттік қорғаныс костюм, 2717 қаптама тамифлю, 49 қаптама реленза, 960 қаптама оксалин жақпамайы дайындалған.

Сонымен қатар, облыста медицина қызметкерлерінің арасында белгісіз пневмонияның диагностикасы, емдеу және алдын алу туралы кеңес-семинарлар ұйымдастырылды. Барлығы 45 семинар өтіп, оған 3226 медицина қызметкерлері қамтылды. Жергілікті құзырлы мекемелер мамандарының қатысуымен «Әулие Ата» әуежайында белгісіз пневмонияның әкелінуі мен оның таралуының алдын алу, бірінші кезектегі шараларды ұйымдастырып өткізу бойынша оқу-жаттығу сабағы өтті. Емдеу мекемелерінің, оның ішінде жедел медициналық жәрдем станциясының медицина қызметкерлері арасында белгісіз пневмонияның күдікті жағдайларын анықтау, тіркеу, есепке алу, шұғыл хабарлама жолдау, науқастарды қабылдау мен оларға жедел мамандандырылған көмек көрсету бойынша даярлығы шыңдалды. Облыстың барлық медицина ұйымдарының қабылдау бөлімдерінде, қарау бөлмелерінде, жедел медициналық жәрдем станциясында медицина қызметкерлеріне арналған алгоритмдер әзірленді.

Жамбыл облыстық полиция департаменті көші-қон басқармасының мәліметтеріне сәйкес, ағымды жылдың қаңтар айында Қытай Халық Республикасынан Жамбыл облысына 37 азамат келген. Бүгінде олардың барлығы тұрақтанған мекен-жайы бойынша медицина қызметкерлерінің қатаң бақылауында. Қазіргі таңда 25 азамат 14 күндік медициналық бақылауға алынған. 12 азамат медициналық бақылауда, шағымдары жоқ.

Жамбыл облысы