Бір сәт үнсіздіктен кейін өзім ала келген «Ұлан» газетін көрсетіп, «мұны жаздырып аласыңдар ма?» дегенімше біразы қолдарын көтеріп те үлгерді. 14 оқушы алады екен, риза болып қалдым. Әңгімені газет төңірегінде өрбітіп, оның оқушыға берері мол екенін, ой-өрісіңді кеңейтіп, көптеген жайттан хабардар ететінін әңгімеледім. «Міне қараңдаршы, жер-жерден газеттің жас достары хат-хабар жолдап, мектептегі жаңалықтар, ауыл-қала өмірінің тыныс-тіршілігі, танымал тұлғалармен кездесу сәтін жазып жатады. Өлеңдер мен шағын әңгімелер, суреттер мен санжұмбақтар, жұмбақ, жаңылтпаштарын жолдайды».
Өз басым осы газетті үзбей оқып отырамын. Сондағы бір байқағаным, біздің өңірден жазатындар некен-саяқ. Оқта-текте Аманкелді, Торғай, Арқалық аудандары жақтан материалдар кезігеді. Науырзым ауданының Қожа ауылынан жазған бір мақаланы көзім шалғаны бар. Мектепте өтіп жататын кештер, өндіріс озаттарымен, соғыс ардагерлерімен кездесу, оқу озаттары, белді спортшылар туралы неге жазбасқа? Міне, балаларға осылайша ой ұсындым.
Бүгінгі ата-аналардың бәрі білімді, алайда көбі баласының оқуына көңіл бөлмейді, салғырт қарайды. Көптеген ата-ана балаларының газет-журналға жазылуына көңіл бөлмейді. Бұл басылымдар ой-өрісіңді кеңейтіп, дүние-танымыңа ықпал етеді. Өкініштісі, кейбір ата-ана осыны ескермейді-ау.
– Қаладағы бұл білім ордасында 600-ден астам бала тәлім-тәрбие алып, білім негізінен сусындауда. Осында басқа ұлттың 9 баласы оқиды. Білімнің берік негізі бастауышта қаланатыны белгілі. Бұл мектепте 40 мұғалім жұмыс істейді, бәрі дерлік жоғары білімді, тәжірибелі ұстаздар. Мұғалімдердің қажырлы еңбегінің нәтижесі болса керек, шәкірттердің тең жартысы «4» пен «5-»ке оқиды. Информатика, дене шынықтыру, бейнелеу өнері, хореография сабақтарын арнаулы білімі бар мұғалімдер жүргізеді. Орыс және ағылшын тілі сабағында сынып топқа бөлінеді. Мектепті жақсы бітіргендер сынақ арқылы қаладағы Ы.Алтынсарин атындағы дарынды балалар мектеп-интернаты мен С.Мәуленов атындағы мектеп-гимназияға қабылданады. Енді бір топ оқушы қалаулары бойынша әскери оқу орнына түсуге дайындайтын кадет сыныбында оқуын жалғастыруда. Жасыратыны жоқ, оқушылар арасында оқи алмайтын, ойын толық жеткізе алмайтындар бар. Содан да олардың білім деңгейі төмен. Тіл білмеген балаға оқу қона ма? Көптеген ата-ана баламен жұмыс істеуге енжар, – дейді директордың оқу ісі жөніндегі орынбасары Гүлнар Сәрсенбаева. Иә, бұл ащы да болса шындық. Ата-ана мен мұғалім бірлесе жұмыс істесе ғана көпшілік түзетілер болар.
Мектеп қалада өтіп жататын түрлі байқаулар мен конкурстарға, турнирлерге, сайыстарға қатысып, жүлделі орындарға ие болғанын айтқан жөн. Мәселен, 2012-2013 оқу жылында қала рейтингінде мектеп 1-орынға шығып, бір миллион теңге ақшалай сыйлыққа ие болды. Мектеп шахматшылары екі жыл қатарынан І, ІІ орынды жеңіп алды. Көркемөнерпаздар байқауында жүлделі ІІ орыннан көрінді. Барлық жетістіктерді санамалап шығу мақсат емес, олар көп-ақ. Оқушылар түгел ыстық тамақпен қамтылған. Тұрмысы төмен 18 отбасының балалары бюджет есебінен тегін тамақтанады. Тағамдар нәрлі, жеміс-жидек, салат үнемі болады, бағасы қымбат емес. Осында дәмхана да жұмыс істейді.
– Бізде ұлағатты ұстаз атанып, ата-аналардың құрметі мен ілтипатына бөленген мұғалімдер көп-ақ. Ботакөз Дөненбаева, Сағила Әлімбаева, Балдырған Рабаева, Ляззат Кәрімова, Роза Тәттібаева, директордың оқу және тәрбие жұмыс жөніндегі орынбасарлары Г.Сәрсенбаева мен Н.Қасенова және басқалар шәкірттердің жүрегіне жол тауып, олардың оқу-білімге деген құштарлығын арттыра білетін майталман ұстаздарымыз, – дейді мектеп директоры Сәуле Елеусізқызы Кәрімова.
Иә, шынында білікті басшы мұғалімдердің шығармашылықпен жұмыс істеуіне қолайлы ахуал туғыза біледі, бұл олардың жемісті жұмыс істеуіне игі ықпал ететіні хақ.
Қанапия МЫРЗАҒОЖИН,
Қазақстанның Құрметті журналисі
Қостанай
