«Біз біргеміз!» челленджін елорданың жүздеген мың тұрғыны қолдап, коммуналдық қызметтерге қар құрсауымен күресуге көмектесуде. Аталған акция аясында біріккен елордалықтар қар тазалау бойынша жалпы қалалық сенбілік ұйымдастырды. Қала тұрғындары елорданың аулалары мен тротуарларындағы қарды тазалап, коммуналдық қызметтерге көмек қолын созды.
Қаланың әр бөлігінде тұрғындардың күшімен 4800 текше метрден астам қар жиналды. Волонтерлер, блогерлер, қазақстандық эстрада өнерпаздары Рүстем Жүгінісов, Айгүл Иманбаева, Тұрсынбек Қабатов, TerriTima, Әлия Әлімжанова, Әділ Ахметов, Ғани Әжікенов сияқты белсенді қала тұрғындарының бірлескен күшімен көмекке мұқтаж зейнеткерлердің үйінің аулалары қардан тазартылды. Қазақстан халқы Ассамблеясы этномәдени бірлестіктерінің өкілдері «Өндіріс» тұрғын үй алабында тұратын ҰОС ардагерлері мен қарт зейнеткерлерге қар күреуге қол ұшын созды.
Сонымен қатар бұл іске жоғары оқу орындары мен колледж студенттері, білім беру және денсаулық сақтау мекемелерінің қызметкерлері де қатысып, олар өз ғимараттарының аумағын қардан тазартты.
Сенбілік іс-шараға барлығы 475 қызмет көрсетуші ұйым қатысып, 978 аула жиналды. Елордалық волонтерлер штабының жетекшісі Шыңғыс Тілеулин атап өткендей, қысқы мерзім ішінде мұндай көмек мұқтаж тұрғындарға тұрақты негізде көрсетілетін болады.
«Суық біз үшін қорқынышты емес. Сондай-ақ ыстық шай мен азық-түлік себеттерін тарататын боламыз, қар тазалап, елордалықтарды бірлесіп игі істер жасауға шақырамыз», деді ол.
Естеріңізге сала кетейік, «Біз біргеміз!» челленджі елордалық тұрғындар арасында танымалдылыққа ие болып, қала тұрғындарының көбі қала аумағын қардан тазартып, әлеуметтік желілерде #Бізбіргеміз хештегімен бейне және фотосуреттерді орналастыруда. Акция жыл басында басталған болатын. Гидрометеорологиялық орталықтың мәліметтері бойынша қаңтар айында Нұр-Сұлтанда қар қалыңдығы рекордтық дәрежеге жеткен. Соңғы рет мұндай көрсеткіш 1964 жылы белгіленді.
