СДУ Дубай «Экспо-2020» халықаралық студент алмасу бағдарламасының эксклюзивті серіктесі атанды

Қазақстан • 05 Ақпан, 2020

СДУ Дубай «Экспо-2020» халықаралық студент алмасу бағдарламасының эксклюзивті серіктесі атанды

Университет президенті Мейірбек Мәжитов бастаған СДУ делегациясы іс-сапармен Дубайға барып қайтты. Сапар барысында «ЭКСПО-2020 Дубай» дүниежүзілік көрмесінің әкімшілігімен кездесу өткізіп, нәтижесінде тараптар халықаралық студенттермен алмасу бағдарламасы аясында өзара ынтымақтастық туралы келісімге қол қойды.

Egemen Qazaqstan

- Ресми келісімге сәйкес СДУ «ЭКСПО-2020 Дубай» көрмесіне оқыту турларын ұйымдастыру бойынша алғашқы халықаралық серіктес университет мәртебесіне ие болды. Халықаралық студенттермен алмасу бағдарламасы жеті оқыту турын құрайды, оның ішінде студенттер маңызды пәндер бойынша әлемнің жетекші университеттерінің үздік тәжірибесінен толық ақпарат алады. Жалпы ұйымдастырушылардың мақсаты – көрме барысында әлемнің түкпір-түкпірінен студенттерді тарту. Қысқа мерзімді оқыту аясында студенттер тәжірибе алмасу, қолданбалы-ғылыми сипаттағы жобаларды зерттеу, индустрияның жетекші сарапшыларынан қарқынды тренингтерден өтуге мүмкіндік алады. Мұндай әдіс шетелдік студенттердің Дубай қаласында мансап құруға қызығушылығын арттырады, - деп түйіндеді СДУ президенті Мейірбек Мәжитов.

«ЭКСПО-2020 Дубай» бүкіләлемдік көрмесі – «ақыл-ойды біріктіре отырып, болашақты құрамыз» ұранымен өтетін ауқымды іс-шара. Шараның басты мақсаты – миллиондаған адамдарға адамзаттың соңғы жетістіктері мен өнертабыстарын көрсету. Көрмеге келушілердің саны 25 миллионға жуық адамды құрайды, олардың 70 пайызы шетелдіктер болады деп күтілуде, бұл дүниежүзілік көрмелердің 168 жылдық тарихында рекордтық көрсеткіш болады.

Көрме үш тақырыптық бағытта өтеді: «Мүмкіндіктер», «Ұтқырлық» және «Тұрақтылық». Көрмеге келушілер жаңа технологиялар мен тұжырымдамалар жайлы маңызды ақпараттар алады. Ауқымды шараға 200-ден астам қатысушы қатысады деп жоспарлануда.