Аталған жобалардың шағын тұсаукесері қалалық білім беру бөлімінің ұйымдастыруымен өтті. Осы шараға арнайы жиылған мамандар ұлттық ат спорты ойындарын тақырып ете отырып жасалған қуыршақ роботтарға жоғары баға беріп, екі жобаны алдағы уақытта болатын «RoboLand-2020» халықаралық фестивалінің бағдарламасына енгізді.
«Қыз қуу» және «Теңге алу» ойындары оқушы балалардың үлкен қызығушылығын тудырды. Мысалы, кішкентай арба мінген жігіт-робот жолында қаз-қатар тізілген жүлделі түйіншіктерді әжептәуір жылдамдықпен келіп бірінен соң бірін іліп әкетеді. Ал қазақтың ұлттық киіміне малынған қыз-робот басына бөрік, үстіне бешпент киген жігіт-роботтан қаша жөнеледі. Егер қуғыншы жетіп алса, робот «сұлудың» бетінен сүймейді екен, бар болғаны «аттан» түсіріп кете барады.
«Бұл жобаларды жүзеге асыруға тоғыз айдай уақытым кетті. Әлі де болса жетілдіре түсетін тұстары бар. Алдағы уақытта роботтарға арналған «Көкпар» ойыны жобасын жасауды ойластырып жүрмін», дейді №34 орта мектептің ақпарат және робот техникасы пәнінің мұғалімі Дулат Ақылтаев.
Ақылтаев жасаған ақылды машиналардың болашағы жарқын дегенді айтады мамандар. Ал «RoboLand-2020» халықаралық фестивалі – ұлттық нақыштағы жобаның бағын ашар үлкен мүмкіндік.
ҚАРАҒАНДЫ
